སྙིང་གཏམ་སྙིང་གི་ཐིག་ལེ་ཞེས་བྱ་བ་བཞུགས་སོ།། མཁན་ཆེན་འཇིགས་མེད་ཕུན་ཚོགས་འབྱུང་གནས།།   རབ་འབྱམས་སྲས་བཅས་རྒྱལ་བའི་གསང་གསུམ་ཀུན།།གཅིག་བསྡུས་མཚན་དཔེའི་གཟུགས་སུ་སྨིན་པའི་སྐུ།།གཞོན་ནུ་སྨྲ་བའི་ཉི་མ་གང་དེ་ཡིས།།ཁྱོད་བློ་བྱང་ཆུབ་ལམ་དུ་སྒྱུར་བར་མཛོད།།མཐའ་ཀླས་འགྲོ་བའི་མོས་བློ་དང་འཚམ་པའི།།ཟབ་ཡངས་ཆོས་ཚུལ་དཔག་གིས་མི་ལང་ཡང་།།གནད་དུ་དྲིལ་ནས་ཉམས་སུ་ལེན་པའི་ཚུལ།།སྙིང་གཏམ་སྙིང་པོ་སྙིང་འདྲའི་གྲོགས་ལ་གདམས།།ཚེ་འདིར་ཞེན་ལ་ཆོས་པའི་སྐལ་བ་བྲལ།།འདོད་ལ་སྤྱད་ཅིང་སྤྱད་ཅིང་སྲེད་པ་འཕེལ་ཞིང་།།ཟིན་པའི་དུས་མེད་རྙེད་བདེ་གྲགས་བསྟོད་རྣམས།།རྨི་ལམ་ཉོ་ཚོང་འདྲ་བས་སྐྱུར་ལ་ཐོངས།།གང་ལ་བརྟེན་ན་ཡོན་ཏན་ཚོགས་འཕེལ་ཞིང་།།ཉེས་སྐྱོན་མཐའ་དག་རྒྱང་དུ་སྐྲོད་བྱེད་པའི།།མཚན་ཉིད་ལྡན་པའི་བཤེས་གཉེན་དམ་པ་དེ།མཉེས་པ་གསུམ་གྱིས་སྟེན་དང་བསམ་དོན་འགྲུབ།།ཇི་ལྟར་མཁའ་དབུས་སྐྱེད་མོས་ཚལ་འདོད་བཞིན།།མངོན་པར་མཐོ་དང་ངེས་ལེགས་ཕུན་ཚོགས་ཀུན།།ཚུལ་ཁྲིམས་བྲལ་ལ་འབྱུང་བའི་སྐབས་མེད་པས།།དྲན་ཤེས་བག་ཡོད་ལྡན་པས་རང་རྒྱུད་ཐུལ།།ཐོག་མེད་སྲིད་པར་མ་རིག་མུན་ཀློང་དུ།།བཤེས་བྲལ་སྨྱོན་པ་བཞིན་དུ་ད་བར་འཁྱམས།།ད་ནི་ཞི་བདེའི་ཁང་བཟང་འཚོལ་བའི་ཕྱིར།།གསུང་རབ་རྒྱ་མཚོ་མཉན་ལ་སྤྲོ་བར་རིགས།།ཐོས་པ་ཙམ་གྱིས་སྒྲོ་འདོགས་མི་ཆོད་ཅིང་།།སྟོན་དང་བསྟན་ལ་ཡིད་ཆེས་རྙེད་དཀའ་བས།།རྩོད་འཆད་རྩོམ་པའི་བྱ་བ་བརྒྱ་ཕྲག་གིས།།བསམ་བྱུང་ཤེས་རབ་ཐུགས་ཀྱི་བཅུད་དུ་སྟེན།།གཞུང་ལུགས་རབ་འབྱམས་སྨྲ་བའི་སྟོན་ཆེན་ཡང་།།རང་རྒྱུད་མ་བཏུལ་ནེ་ཙོའི་འདོན་པ་འདྲ།།འཆི་བ་བཙན་ཐབས་འོངས་ན་འགྱོད་པའི་རྒྱུ།།གདམས་དོན་སྙིང་ལ་སྟེན་ཅིག་སྙིང་གྲོགས་རྣམས།།མང་མང་རྒྱལ་བའི་ཆོས་ཚུལ་རང་འབྱམས་ཀུན།།རང་རྒྱུད་འདུལ་བ་ཁོ་ནའི་ཐབས་སུ་གདམས།།ཚིག་ལ་མ་འཆེལ་དོན་གྱི་ཟབ་གནད་མཆོག།སྙིང་གི་བཅུད་དུ་སྟིམས་ཞེས་སླར་ཡང་བསྐུལ།།རྙེད་དཀའི་རྟེན་འདི་ཨུ་དུམ་ཝྭ་ར་འདྲ།།ནོར་བུ་འབུམ་ལས་ལྷག་པའི་དོན་འབྲས་ལྡན།།ཕྱི་ནས་འདི་འདྲ་ཤིན་ཏུ་རྙེད་དཀའ་བས།།དོན་ཆེན་འདུན་མ་བསྒྲུབ་ལ་མ་གཡེལ་ཅིག།འཆི་བདག་དགྲ་ཆེན་ནམ་མཁའི་ཐོག་འདྲ་བ།།ནམ་ཙམ་ཐོན་པ་སུས་ཀྱང་དཔོག་མི་ནུས།།ལོ་དང་ཟླ་བར་སྡོད་པའི་ལོང་མེད་ཀྱིས།།ད་ལྟ་ད་ལྟར་དགེ་ཆོས་སྒྲུབ་རེ་རན།།ལུས་ཅན་ལས་ཀྱི་འབྲས་བུ་ཆུད་མི་ཟ།།རྣམ་སྨིན་ཐོག་ཏུ་བབས་ཚེ་བཅོས་སུ་མེད།།ད་ལྟ་སྐལ་ལྡན་རང་དབང་ཡོད་དུས་འདིར།།རང་གིས་རང་ཉིད་བསླུས་ན་སུ་ཡིས་སྐྱོབ།།བཟོད་དཀའ་འཁོར་བའི་སྡུག་བསྔལ་བྱེད་བྲག་རྣམས།།དྲན་པ་ཙམ་གྱིས་བ་སྤུ་གཡོ་ནུས་ན།།བགྲང་ཡས་དུཿཁས་ལུས་སེམས་གདུང་བའི་ཚེ།།ཇི་འདྲ་ཡིན་ཞེས་རང་ལ་གྲོས་མོལ་འཛོད།།འདི་འདྲའི་འཇིགས་ཆེན་ཤིན་ཏུ་ཐར་དཀའ་ལས།།འདྲེན་པའི་ནུས་ལྡན་གཞན་ནས་རྙེད་མི་སྲིད།།བསླུ་མེད་མཁྱེན་བརྩེ་ནུས་པའི་བདག་ཉིད་ཅན།།རིན་ཆེན་རྣམ་གསུམ་སྐྱབས་སུ་བརྟེན་པར་རིགས།།སྲིད་གསུམ་སྡུག་བསྔལ་རང་བདེ་འདོད་ལས་བྱུང་།།བདེ་དགེ་མཐའ་དག་གཞན་ཕན་སེམས་ལས་འཁྲུངས།།དེ་ཕྱིར་ལྷ་མིའི་སྟོན་པའི་རྗེས་བསྙེགས་ཏེ།།བླ་མེད་བྱང་ཆུབ་སེམས་མཆོག་བསྐྱེད་པར་རིགས།།རང་རྒྱུད་རིག་ཁམས་ཤེལ་དཀར་ཨཱ་དར་ཤ།གློ་བུར་སྒྲིབ་པའི་རྡུལ་གྱིས་ཆེར་གཡོགས་ན།།ཟབ་གསལ་ཏིང་འཛིན་གཟུགས་བརྙན་འཆར་དཀའ་བས།།སྟོབས་བཞིའི་རབ་དཀར་ངལ་བས་བསྐྱོད་པར་འོས།།སྣང་གྲགས་རིག་པ་ལྷ་སྔགས་ཆོས་ཉིད་ངང་།།ཡེ་ནས་ཡིན་པར་ཤེས་པའི་ལྟ་བ་དང་།།མ་བྲལ་སྒོམ་པའི་མདེའུ་ཁ་བསྒྱུར་བྱས་ནས།།ཚར་གཅོད་རྗེས་སུ་འཛིན་ལ་དབང་སྒྱུར་མཛོད།།སྲོག་རྩོལ་བྱེད་བཅིང་ལུས་ཀྱི་འཕྲུལ་འཁོར་གྱིས།།བདེ་གསལ་མི་རྟོག་གྲོགས་སུ་འགུགས་ནུས་ན།།འོད་གསལ་སྒྱུ་མའི་ལུས་ལ་དབང་འབྱོར་ཕྱིར།།རྫོགས་རིམ་ཐུགས་ཀྱི་ཐིག་ལེར་བསྟིམ་པར་རིགས།།སྙིགས་ལྔའི་མུན་པ་ལྷག་པར་བདོ་སྐབས་སུ།།ཐེག་བརྒྱད་རྒྱུ་སྐར་འོད་ཀྱིས་འཇོམས་དཀའ་བས།།ཡང་གསང་སྙིང་ཐིག་ཉི་མའི་ཟེར་ཕྲེང་འབུམ།།དད་གསུམ་རྟ་བདུན་ཁྱོགས་ཀྱིས་འདྲེན་པར་རིགས།།གང་ཤར་རིག་པ་མ་བཅོས་རྒྱ་ཡན་ལ།།རང་བབས་རང་བཞག་ངང་དུ་ལྟོས་ཤིག་དང་།།ཡེ་སྟོང་རྩ་བྲལ་རང་གསལ་ངོ་ཤེས་ན།ས་ལམ་ཅིག་ཆོད་འབྲས་བུའི་གཏན་སྲིད་ཟིན།།ཅོག་གཞག་ངང་ནས་བཞུགས་སྟངས་གཟིགས་སྟངས་ཀྱིས།།རང་སྣང་དབྱིངས་ཐིག་རིག་པར་ལོངས་སྤྱད་ན།།གཟུང་འཛིན་འཁོར་བའི་མུན་པ་དབྱིངས་སུ་ཡལ།།སྣང་བཞི་མཐར་འཁྱོལ་འཕོ་ཆེན་འོད་སྐུར་སྨིན།།དེ་སྐད་གྲོང་ཚིག་དུམ་ཆོད་སྙིང་གི་གཏམ།།བློ་གསལ་དགྱེས་པའི་སྙན་ཚིག་བདོག་མིན་ཡང་།།ཐོལ་བྱུང་ཀློང་རྡོལ་འདེམ་ག་སྤངས་པ་འདི།།སྔ་འགྱུར་རིག་འཛིན་བརྒྱུད་པའི་རང་གཤིས་ལགས།།དགེ་བ་འདི་ཡིས་མ་ལུས་འགྲོ་བ་རྣམས།།སྐུ་བཞིའི་རྒྱལ་ཐབས་མཆོག་ལ་དབང་འབྱོར་ཞིང་།།བདག་ཀྱང་འཇམ་དཔལ་གཞོན་ནུའི་སྙིང་སྟོབས་དང་།།སྐད་ཅིག་ཙམ་ཡང་འབྲལ་བར་མ་གྱུར་ཅིག། ཅེས་པ་འདི་ནི་རྒྱ་ནག་རི་བོ་རྩེ་ལྔའི་ཡང་དབེན་ལྷ་མཆོག་འཇམ་དཔལ་གཞོན་ནུས་རྒྱས་སྲས་ཁྲི་ཕྲག་གཅིག་ལ་ཟབ་རྒྱས་ཆོས་འཁོར་བསྐོར་བའི་རི་རྩེར་ངག་དབང་བློ་གྲོས་མཚུངས་མེད་པས་དུས་ཚོད་སྐར་མ་ཉེར་གསུམ་གྱི་ཡུན་ལ་ཤར་མར་སྤེལ་བ་དགེ། །། མེ་ཡོས་ཟླ་༥ཚེས་༣ལའོ།

  འཕགས་པའི་སྐྱེ་བོ་དམ་པ་ཁུང་ཙི་སོགས་ཀྱི་སློབ་མའི་བསླབ་བྱ་སྟོད་ཆ། མཁན་པོ་བསོད་དར་རྒྱས་ཀྱིས་བསྒྱུར། སྤྱིའི་སྡོམ་ཚིག སློབ་མའི་བསླབ་བྱ་འདི། ། འཕགས་པའི་སྐྱེ་བོའི་གསུང་། ། སྲི་ཞུ་གུས་བཀུར་དང༌། ། བག་ཡོད་ཡིད་རྟོན་བྱ། ། ཀུན་ལ་བྱམས་པས་སྐྱོང༌། ། བཤེས་གཉེན་དམ་པ་བསྟེན། ། ད་དུང་སྒྲུབ་ནུས་ན། ། ཤེས་བྱ་གཞན་ཀྱང་སློབ། །སློབ་མའི་བསླབ་བྱ་ཞེས་པ་འདི་ནི་སྔོན་གྱི་འཕགས་པའི་སྐྱེ་བོ་དམ་པ་ཁུང་ཙི་…

  རྒྱལ་པོ་ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན་ཞེས་བྱ་བ་བཞུགས་སོ།། འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ། ༄༅། །རྒྱ་གར་སྐད་དུ། རཱ་ཛ་ནཱ་ཏིི་ཤཱསྟྲ་བྷུ་མི་པཱལ་སྱཱ་ཨ་ལངྐཱར་ནཱ་མ། བོད་སྐད་དུ། རྒྱལ་པོ་ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། ། རྒྱལ་མཆོག་སྟོན་པ་ཚད་མའི་སྐྱེས་བུ་དང༌། །རྣམ་གྲོལ་འཇུག་ངོགས་བསྟན་པ་རིན་པོ་ཆེ། །དེ་འཛིན་འཕགས་ཚོགས་འཇིག་རྟེན་རྒྱན་གྱུར་པ། །དཀོན་མཆོག་གསུམ་ལ་གུས་པས་ཕྱག་འཚལ་ལོ། །མཁའ་དང་མཉམ་པ་ཡེ་ཤེས་འོད་ཟེར་ཅན། །འགྲོ་བའི་ཡིད་ཀྱི་མུན་པ་རྣམས་སེལ་བ། །འཇམ་དཔལ་སྨྲ་བའི་ཉི་མ་གང་དེ་ཡིས། །སྐྱེས་རྒུའི་བློ་གྲོས་པད་ཚལ་སྐྱོང་བར་མཛོད། །རྒྱལ་དང་རྒྱལ་སྲས་འཕགས་པ་ཆེན་པོ་རྣམས། །བསམ་བཞིན་སྐྱེ་རྒུའི་མགོན་དུ་ལེགས་བཞུགས་པ།…

  བསླབ་བྱ་རིན་ཆེན་ཕྲེང་མཛེས། པཎ་ཆེན་བློ་བཟང་ཆོས་རྒྱན།  ༄༅། ། ན་མོ་གུ་རུ་མཉྫུ་གྷོ་ཥཱ་ཡ། བསླབ་བྱ་རིན་ཆེན་ཕྲེང་མཛེས་ཞེས་བྱ་བ།  བདེ་གཤེགས་ཀུན་གྱི་སྐུ་གསུམ་གྱི། ། ཡེ་ཤེས་གཙང་མའི་རང་གཟུགས་ལ། ། ཤཱཀྱ་སེང་གེར་མཚན་གསོལ་བའི། ། སྟོན་པ་མཆོག་དེས་བདག་སྐྱོངས་ཤིག ། མཁྱེན་པའི་ཆ་ཤས་ཕྲ་མོས་ཀྱང་། ། མཁའ་ལྟར་ཡངས་པའི་ཤེས་བྱའི་ཁྱོན། ། རྡུལ་ཕྲན་གོ་སར་འགོད་མཁས་པ།…

བསླབ་བྱ་གཞན་ཕན་བདུད་རྩིའི་སྙིང་པོ། ལྕང་སྐྱ་རོལ་བའི་རྡོ་རྗེ།   ༄༅།།ན་མོ་གུ་རུ་མཉྫུ་གྷོ་ཥཱ་ཡ། དགེ་ལེགས་དཔལ་དུ་སྡུག་པའི་རིན་ཆེན་སེམས་ཀྱི་ནོར་བུས་ཅི་ཡང་གཏམས།།མ་སྨད་ཡིད་འོང་སྤྱོད་པའི་རླབས་ཕྲེང་འཛུམ་པའི་ཚོགས་གཉིས་ཆུ་གཏེར་ལས། ། ཉེར་འོངས་ཀུན་རྟོགས་སྤྲིན་བྲལ་ཀུན་བཟང་ལྷུན་གྲུབ་འཕྲིན་ལས་སྣང་འབུམ་འགྱེད། ། འགྲོ་བའི་ལམ་བཟང་མཚོན་པའི་མིག་གཅིག་ཐུབ་དབང་སྨྲ་བའི་ཉི་མར་འདུད། ། རྨོངས་པའི་དུག་ཆུས་མྱོས་པའི་ཡིད་ཀྱི་གླང་སྨྱོན་ཁྱུ། ། མི་བཟད་གོལ་བའི་ལམ་དུ་ཡང་ཡང་འཕྱན་པ་ལས། ། ཆོས་བཞིན་སྤྱོད་པའི་དམ་པའི་ལམ་དུ་འདྲེན་བྱེད་པའི། ། ཐབས་ཀྱི་མཆོག་གྱུར་ཀྱོ་བ་རྣོན་པོ་འདིར་བཤད་བྱ། ། ཐོག་མེད་སྲིད་པར་ལན་བརྒྱར་འཕྱན་པ་ལས། །…

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་བཞུགས་སོ།།   གུང་ཐང་དཀོན་མཆོག་བསྟན་པའི་སྒྲོན་མེ། བྱིང་རྒོད་སྐྱོན་བྲལ་ཏིང་ངེ་འཛིན། ། གསལ་བར་ཡོན་ཏན་ཐམས་ཅད་འཆར། ། བཻཌཱུརྱ་མེ་ལོང་ཕྱིས་འདྲ་བའི། ། དྭངས་མཚོར་གཟུགས་བརྙན་ཅི་ཡང་གསལ། །   དངོས་ཀུན་སྟོང་པར་དམིགས་པ་ཡིས། ། འཁོར་བའི་གདུང་བ་ཀུན་སེལ་ཏེ། ། ཆུ་ཀླུང་མཐའ་དག་ཨ་གསྟྱས། ། ཧུབ་ཀྱིས་གཞལ་བས་བདུད་རྩིར་འགྱུར། །…

ཞལ་གདམས་དཔེ་རྒྱན་གསལ་བ་བཞུགས། ཇོ་ནང་ཀུན་མཁྱེན་ཆེན་པོ་ཏཱ་ར་ནཱ་ཐ། ཨོཾ་སྭཱ་སྟི། བདག་ལྟ་སོ་ལྡན་དྲེགས་པའི་དགྲ། རྒྱལ་བ་རི་དྭགས་དབང་པོ་གང༌།། དཔག་ཡས་ཡོན་ཏན་འབྱོར་བ་ཡིས།། ཁེངས་པས་སེངྒེའི་སྒྲ་བསྒྲགས་བཞིན།། གཉིས་མེད་གསུང་པའི་བསྟན་པ་ལ།། གུས་པས་བློ་ལྡན་ཕྱག་འཚལ་ཏེ།། གདམས་པའི་སྒྲོན་མེ་རབ་སྦར་བས།། སྙན་ཚིག་རི་མོའང་གསལ་བར་བྱ།། འབྱོར་བ་བཅུ་དང་ལྡན་པའི་ལུས།། ཡིད་བཞིན་ནོར་བུ་ལྟ་བུར་དཀོན།། མི་ཟད་གཏེར་ཆེན་དམ་པ་ལྟར།། ཕུན་ཚོགས་ཐམས་ཅད་འདི་ལས་ཐོབ།། ཅེས་པ་འདི་ནི་ཆོས་ཀྱི་དཔེ།། ལུས་འདི་ཆུ་ཡི་ལྦུ་བ་འདྲ།། དབུགས་ཀྱང་སྟོན་ཀའི་ན་བུན་བཞིན།། མཐོ་རིས་འབྱོར་བའི་དཔལ་འདི་ཡང༌།། རྨི་ལམ་ལྟད་མོ་ཇི་བཞིན་ནོ།།…

བླ་སྤྲུལ་དག་ལ་གནང་བའི་སློབ་གཉེར་བསླབ་བྱ།   གུང་ཐང་དཀོན་མཆོག་བསྟན་པའི་སྒྲོན་མེ། རབ་འབྱམས་རྒྱལ་བ་ཀུན་གྱི་ཡེ་ཤེས་ནི། །དུས་མཐར་ཐུབ་བསྟན་རྒྱལ་མཚན་བསྒྲེང་བའི་ཕྱིར།། གསུམ་ལྡན་ངུར་སྨྲིག་འཆང་བའི་རྣམ་རོལ་པ། །ཡབ་རྗེ་འཇིགས་མེད་དབང་པོའི་ཞབས་ལ་འདུལ།། དམ་པའི་སྐྱེས་བུ་འགའ་ཞིག་མདོ་སྔགས་ཀྱི། །ལམ་བཟང་སྒྲུབ་ཚུལ་བསླབ་བྱ་དགོས་སོ་ཟེར།། གཞན་ལ་ཕན་པའི་བསླབ་བྱ་བྱེད་པ་པོ།   །རང་ཉིད་བསམ་ཞིང་རང་ལ་ཡི་མུག་སྐྱེས།། འདི་ཕྱིའི་སྐྱབས་སུ་བླ་མ་བསྟེན་ན་ཡང་།   །བདེན་ཁ་རང་གིས་བཟུང་བ་ཡིད་རེ་མུག ། དལ་འབྱོར་དོན་ཆེ་རྙེད་དཀའ་ཟེར་བཞིནདུ།   །དོན་མེད་སྟོང་པར་གཟད་པ་ཡིད་རེ་མུག ། ནོར་རྐུན་མཐོང་ནས་ཤིན་ཏུ་ཟོན་བྱེད་ཀྱང་།   །མི་རྐུན་གཤིན་རྗེའི་ཟོན་མེད་ཡིད་རེ་མུག །…

  ཁ་ཆེ་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་བཞུགས་སོ། །     ཁ་ཆེ་ཕ་ལུ། གནའ་བོའི་མི་ཆོས་ལ་མཁས་པ་ཞིག སྔོན་རྒྱ་གར་འཕགས་པའི་ཡུལ་ན་སངས་རྒྱས་དགུང་ལོ་བཅུ་ལ་ཕེབས་པ་ན། འཛམ་གླིང་སྤྱི་དང་ལྷག་པར་ཡུལ་དགའ་བའི་གཡས་གཡོན་དུ་རྟགས་དང་རྟེན་འབྲེལ་ཕུན་སུམ་ཚོགས་པ་དང་། རྫུ་འཕྲུལ་མཁས་བཙུན་གྲངས་མེད་དུ་མཛད་པ་རྣམས་འབྲི་དགོས་དང་། ཤོད་དགོས་བྱུང་ན་མི་ཚེའི་ཁ་ལ་མི་ཚེ་མང་པོ་དགོས་འདུག་པས། མཚམས་ཀྱིས་ཞུ་བར། དགུང་ལོ་བཅུ་ལ་ཕེབས་པའི་དུས། དང་པོ་དྲང་པོའི་གཏེར་མཛོད།  གཉིས་པ་ཁྲིམས་ཀྱི་འབྱུང་ཁུངས།  གསུམ་པ་ངོ་ཚའི་རྒྱ་མཚོ། བཞི་པ་སྦྱིན་པའི་རྒྱལ་པོ། ལྔ་པ་ཆོས་གནང་བ་སོགས་རྩ་བ་ལུང་དང་མཉམ་པའི་སྡོང་པོ་ལ་ལོ་འདབ་རྒྱས་པ་ལྟ་བུའི་ཆོས་འཇིག་རྟེན། ལས་རྒྱུ་འབྲས། ཁྲེལ་ངོ་ཚ།…

  བྱང་ཆུབ་སེམས་དཔའི་བསླབ་བྱ་མདོར་བསྡུས། ཤར་རྫ་པ་བཀྲ་ཤིས་རྒྱལ་མཚན། ཐར་མེད་བཙོན་རར་ཆུད་པའི་མ་རྒན་རྣམས།།བྱམས་བརྩེའི་སྐྱོ་ངལ་ནམ་ཡང་མི་སྐྱོ་བའི།། རྒྱལ་དང་རྒྱལ་བའི་ངོ་བོ་ཇི་སྙེད་ཀྱི།།ཐུགས་རྗེའི་མངའ་བདག་དྲིན་ཆེན་བླ་མར་འདུད།། ཐམས་ཅད་མཁྱེན་པའི་གོ་འཕང་བསྒྲུབ་པ་ལ།།ལམ་གནད་མ་ལུས་བསྡུས་ན་ངེས་འབྱུང་དང༌།། བྱང་ཆུབ་སེམས་གཉིས་དག་ལ་འདུས་པའི་ཕྱིར།།དེ་ཡང་ཐེག་པ་མཆོག་དམན་གཉིས་ལས་སུ།། ཐེག་དམན་ལམ་ཞུགས་ངེས་འབྱུང་ཤེས་རབ་གཉིས།།རྒྱུད་ལ་སྐྱེས་ན་བསྒྲུབ་བྱའི་དོན་འགྲུབ་ཙམ།། དེ་ལས་བླ་མེད་བྱང་ཆུབ་ཐོབ་འདོད་པས།།གཞན་དོན་བྱང་ཆུབ་མཆོག་ཏུ་སེམས་བསྐྱེད་པ།། མེད་ན་བསྒྲུབ་བྱའི་འབྲས་བུ་ག་ལ་པ།།དེ་ཕྱིར་བྱང་ཆུབ་སེམས་མཆོག་རིན་པོ་ཆེ།། རྒྱུད་ལ་མ་སྐྱེས་པ་དག་སྐྱེས་པ་དང༌།།སྐྱེས་པ་མི་ཉམས་དེ་ཉིད་གོང་འཕེལ་ཐབས།། རྒྱུ་འབྲས་མན་ངག་བདུན་ལ་བློ་སྦྱང་བཞིན།།བྱང་ཆུབ་སེམས་དཔའི་ཚུལ་ཁྲིམས་རྣམ་གསུམ་ལ།། ཐུགས་དམ་གཅེས་སྤྲས་མཛད་པ་བྱང་སེམས་སྡོམ།།འདི་ལྟར་འཁོར་བའི་གནས་འདིར་འཁོར་བ་པ།། གང་ཡང་ཕ་མར་མ་གྱུར་གཅིག་མེད་དེ།།ཐོག་མེད་དུས་ནས་འཁོར་བར་འཁྱམས་པ་དང༌།། མཐོ་དམན་གནས་སུ་སྣ་ཚོགས་ལུས་བླངས་ཕྱིར།།ཕ་མར་བྱས་ཚེ་ད་ལྟའི་ཕ་མ་བཞིན།། བྱམས་བརྩེས་སྐྱོང་དང་ཕན་བཏགས་བསམ་མི་ཁྱབ།།དེ་ཕྱིར་དྲིན་ཆེ་དྲིན་དུ་གཟོ་བ་སྟེ།། ཚེ་འདིར་ཕན་བཏགས་ཕྲ་མོ་བྱས་ནའང༌།།དྲིན་ཆེ་ཡིན་ཞེས་ཕན་ལན་བྱ་དགོས་ན།། ཐོག་མའི་དུས་ནས་སྐྱོང་བའི་མ་རྒན་འགྲོར།།ཅི་ཕྱིར་དྲིན་ལན་ལན་གྱིས་གཟོ་མི་དགོས།། དེ་ཕྱིར་དེ་དག་བདེ་བ་ལྡན་འདོད་དང༌།།སྡུག་བསྔལ་བྲལ་འདོད་བྱམས་དང་སྙིང་རྗེ་དང༌།། ངེས་པར་སྡུག་བསྔལ་བསལ་བྱ་བདེ་བ་དག།འཐོབ་པར་བྱའོ་སྙམ་པའི་ལྷག་བསམ་སོགས།།…