དུས་ཀྱི་སྐར་ཆེན་ཞིག་ལ་ཕུལ་བའི་སྤུངས་སོའི་མཆོད་པ།

གཟི་མིག་དགུ་པ།

ཞབས་སེན་གངས་ལ་བརྡུངས་པའི་དབུ་ཁྱུད་ཀྱི་འོད་ཐིཊ།།

མདོ་ཁམས་ནོར་འཛིན་འཕང་བའི་ཅོད་པན་ལ་འཁྱུད་དེ།།

བགྲང་བྱ་བདུན་གཉིས་བསྣོལ་བའི་ཐོབ་གྲངས་ཀྱི་རི་མོ།།

རྐང་བཞིའི་འབའ་ངུར་ཁྲོད་ནས་རི་ཀླུང་ལ་ཟགས་སྐད།།

།

གཏོ་སྒྲོམ་ཚིག་ཤུལ་ལྷག་པའི་བརྡ་ཆད་ཀྱི་གླིང་བུ།།

ལྗགས་རྩེ་ནོར་བུའི་ཏོག་གི་མཛེས་རྒྱན་དུ་བསྒྲོན་ཏེ།།

སུག་བྲིས་གྱི་ལིང་འདུར་བའི་གར་སྟབས་ཀྱི་རྨིག་སྒྲ།།

སྤང་གཡའི་ཧྲག་ཏུ་བཏབ་པ་གྲངས་ཀ་ཡིས་མི་ལོངས།།

སོར་ལྔའི་མེ་ཏོག་ཟུམ་པའི་མཚར་སྡུག་གི་འཛུམ་ཕྲེང་།།

གནའ་བོའི་རི་གྲོང་སྐྱ་མོའི་མགོ་ནག་ལ་དགོད་དེ།།

ཐོས་བརྩོན་ཤེས་བྱའི་རླབས་རིས་ཐུགས་ངོས་སུ་འཕྱོ་བའི།།

དུས་ཀྱི་སྐར་ཆེན་ཁྱེད་ལ་མཆོད་དབྱངས་ཤིག་གྱེར་འགྲོ།།

།

གཤེན་བསྟན་རིན་ཆེན་སྤུངས་པའི་ལྷུན་པོ་ཡི་མགུལ་དེར།།

འཁོར་བའི་ལྕེབས་ཐག་ཕྲལ་བའི་འདུལ་ཁྲིམས་ཤིག་བླངས་ཏེ།།

རང་རྒྱུད་མ་རིག་འདུལ་བའི་ཉམས་རྟོགས་ལ་འཁུ་ཞོར།།

གཞན་དོན་འཆད་རྩོད་རྔ་བོ་བོད་འབངས་ལ་བརྡུངས་སོང་།།

དུས་འགྱུར་རླུང་ནག་འཚུབ་པའི་བསྐལ་པ་ཡི་ཁུག་ནས།།

རྣམ་དཔྱོད་འོད་ཀྱི་རུ་མཚོན་མཁའ་དབྱིངས་སུ་ཕྱར་ཏེ།།

མཐའ་ཡས་ཤེས་བྱའི་རྒྱ་མཚོ་སྙིང་སྟོབས་ཀྱིས་བརྒལ་མཁན།།

འོད་ཀྱི་ཁུ་བས་བསྡུས་པའི་ཤེས་རབ་ཀྱི་དམག་དཔོན།།

།

མང་ཐོས་ནོར་བུའི་རྒྱགས་ཕྱེའི་ཁུར་ཆེན་ཞིག་བཏེགས་ཏེ།།

སྙིགས་དུས་སྐྱེ་འགྲོའི་བཀྲེས་ལྟོགས་སྡུག་བསྔལ་དེ་སེལ་མཛད།།

ངེས་དོན་ཟབ་ལམ་མན་ངག་ལྗགས་རྩེ་ནས་འཐོར་བའི།།

དུས་ཀྱི་དཔའ་བོ་ཁྱེད་ལ་མཆོད་དབྱངས་ཤིག་འབུལ་ལོ།།

ཞབས་གཉིས་བརྐྱངས་བསྐུམ་བསྣོལ་བའི་སོར་བཅུ་ཡི་པར་རྗེས།།

ཧི་མ་ལ་ཡའི་ཕྱོགས་གཉིས་ངོ་མཚར་གྱིས་བཞེངས་ཞོར།།

དུས་སྙིགས་བདུད་དཔུང་རྒོལ་བའི་གར་འཁྱམ་ལ་རོལ་ཏེ།།

བསྐལ་པའི་ཆོ་རབས་ཤིག་གི་གཤང་ཆེན་དེ་དཀྲོལ་སོང་།།

སྐལ་ལྡན་ལས་འཕྲོ་ཅན་རྣམས་རང་རྒྱུད་ལྟར་བསྐྱངས་ཤིང་།།

གདམས་ངག་བདུད་རྩིའི་འོ་ཆུའི་ཆར་ཆེན་ཞིག་ཕབ་སྟེ།།

མ་རིག་སྨག་རུམ་སྟུག་པོའི་གཏིང་མཐའ་ནས་གསལ་མཛད།།

འོད་ཀྱི་འཁར་བ་བཏེགས་པའི་དྲང་སྲོང་དེར་བསྔགས་སོ།།

༢༠༡༦/༡༡/༡༨ཉིན།