མདུན་ངོས། » གསར་རྩོམ། » གྲགས་རྩོམ། » ཕོ་ཉ་གཞོན་ནུ་དོན་རབ་ཏུ་གྲུབ་པ།

ཕོ་ཉ་གཞོན་ནུ་དོན་རབ་ཏུ་གྲུབ་པ།


ཕོ་ཉ་གཞོན་ནུ་དོན་རབ་ཏུ་གྲུབ་པ།
སྒིས་སྟེང་བློ་བཟང་དཔལ་ལྡན།

འདི་ནས་བྱང་དུ་དཔག་ཚད་ཁྲི་ཕྲག་ན། །རྒྱལ་ཀུན་ཡེ་ཤེས་ཐིག་ལེ་ལྟར་ཆགས་པ། །བདག་གི་དཔྲལ་བའི་མིག་དང་ཁོང་བའི་སྙིང༌། །མཚན་ཙམ་གྱིས་ཀྱང་རྣ་བའི་བཅུད་ལེན་ཡོད། །དེ་རུ་ལས་བཤོལ་མེད་པར་དགོས་པའི་དོན། །ཆ་གཅིག་རིངས་པར་སྒྲུབ་པའི་ཕོ་ཉ་བ། །རིག་བྱེད་ཚིག་གིས་སྤྱི་བོར་དབང་བསྐུར་ན། །ཡོན་ཏན་ཁོ་ལག་རྫོགས་པ་འགའ་ཡོད་དམ། །དེ་ཚེ་རྟེན་འབྱུང་ཚོགས་པ་མ་འགགས་པས། །སྤྲིན་དཀར་གཡོན་མ་འཛུམ་པའི་རྒྱ་གྲོལ་ཏེ། །ལེགས་བྲིས་བུས་པ་བལྟ་བས་མི་ངོམས་ཤིག །དལ་བུར་འཆག་པ་ས་སྲུང་གཞོན་ནུའི་སྤུན། ། ཀྱེ་ཀྱེ་དོན་ཆེན་རབ་ཏུ་གྲུབ་པའི་བུ། ། ཚུར་ཤོག་ཚུར་ཤོག་ཕྱི་ནང་གཙུག་ལག་ལས། །བདེ་ལེགས་སྐྲུན་པའི་བདེན་ཚིག་མེ་ཏོག་གིས། །ཁྱོད་ལ་ཕོ་ཉ་ཏེ་བོར་མངའ་གསོལ་བགྱིད། །ཞབས་སེན་ལུས་སྐྱེས་ཕྲ་མོའི་ཟེར་མ་ཡང། །སྲིད་ཞིའི་གཡུལ་ལས་རྒྱལ་བའི་རུ་མཚོན་གྱིས། །མཁའ་ཁྱབ་བདུད་ལ་མཚོན་དུ་རྣོ་བའི་དཔྱིད། །དེ་ཡི་དགེ་ལེགས་དམ་པས་ཁྱོད་ལ་སྲུངས། །དཀར་ཕྱོགས་ལྷ་ཀླུ་མཐུ་དང་རྫུ་འཕྲུལ་གྱི། །ཤུགས་ལྡན་གཞན་ཕན་བརྩེ་བའི་བ་དན་ཅན། །འདི་ལ་ལུས་གྱི་གྲིབ་མ་ལྟར་འགྲོགས་ནས། །སྲུང་ཞིང་སྐྱོབ་པ་ཉམས་ལས་གཡེལ་མི་འཚལ། །བདག་གི་ཁྱིམ་ན་རྟ་དང་གླང་བོའི་ཁྱུ། །བྱ་རྒོད་ཤུགས་ཀྱིས་ཉིན་ཞག་བཅོ་བརྒྱད་ཙམ། །ཉུལ་ཡང་ཕྱི་མའི་མཐའ་ནི་མི་དམིགས་པའི། །སྟོབས་དང་འབྱོར་བ་ནོར་རྩེན་ཕོ་བྲང་བཞིན། །དེ་ལྟ་མོད་ཀྱི་ཁོ་བོ་ཡིད་བྱུང་ནས། །གྱོ་མའི་སྣོད་ཐོགས་ངུར་སྨྲིག་ཙམ་བླངས་ཏེ། །ཆགས་པ་མེད་པར་ཞི་བའི་བས་མཐའ་རུ། །ཨེ་མ་དྲང་སྲོང་འདི་འདྲ་ཆེད་དུ་བྱས། །དེ་བས་སྣ་ཚོགས་ནོར་བུའི་རྒྱན་བྱིན་པའི། །རྟ་དང་གླང་བོ་ཁྱོགས་ཀྱི་བྱེ་བྲག་མང༌། །རྫོངས་བརྡ་བྲལ་འདིས་དགོངས་ཚོམ་མི་བཞེས་པར། །ཤིང་འབྲས་ཤས་ཙམ་ཕྲག་ལ་བསྣམས་ཏེ་བཞུད། །ཡང་ན་སྒོ་སྲུང་རྒྱ་སྟག་གཞོན་ནུ་མས། །སྤུ་གྲིའི་རྗེས་འགྲོ་མཆེ་བའི་གཅོང་རོང་དུ། །དྲངས་པའི་ཝ་སྐྱེས་བསད་པའི་ཤ་གཟུག་གི །ལྷག་མར་སྤྱོད་པ་འདི་ཡང་ཆས་སུ་ཟུངས། །ད་ནི་ཛ་ལནྡྷ་ར་ཡི། །ཉལ་འགྲོ་ཛ་ཧུའི་བུ་མོ་ལྟའི། །འགྲམ་པའི་རི་མོ་སྐྱེས་ཀྱི་བཤུལ། ། འགྲིམ་པའི་དཀའ་ཐུབ་ལོངས་སུ་བྱོས།། གྱེན་དང་ཐུར་ལ་བྱེད་པོ་ཡིས། །བཙུགས་པའི་ལམ་ནི་ཐེམ་པའི་སྐས། །མཐོང་ན་དབུགས་དང་དོན་སྙིང་ཟུང༌། །འགྲན་བཞིན་ལྡང་བའི་ཟློས་གར་རྩེན། །མཐོན་མཐིང་ནེའུ་གསིང་རྨ་བྱའི་མགྲིན་འདྲ་ལ། །མཐོ་རིས་འོད་ལྔ་ཆགས་འདྲའི་མེ་ཏོག་ལྡེམ། །ཟིར་ཟིར་སྦྲེང་བའི་རྐང་དྲུག་རི་སྐྱེས་ཀྱི། །བུ་རྣམས་རྩེད་འཇོ་རེས་འགར་ཉམས་སུ་འབབ། །གངས་དཀར་རལ་བ་སྟུག་པོའི་ཐོར་ཅོག་གི །རྩེ་མོ་མཁར་བསྙེགས་ཉི་ཟླའི་རྣ་ཆ་ཟུང༌། །མགུལ་བར་བཟུང་བའི་འབིགས་བྱེད་རི་བོའི་སྤུན། །སྨིག་རྒྱུའི་ཀ་བ་དགུང་ལ་བཙུགས་པ་འདྲ། །གཡའ་དང་རྫ་ཡི་གླེགས་བུ་མ་འཐོར་བའི། །ས་འཛིན་རྩེ་མོ་མཐོངས་ལས་མཐོང་དཀའ་སྟེ། །འདབ་བཟང་དབང་པོ་བྱེའུའི་གོ་འཕང་ལ། །འགོད་ན་འདབ་ཆགས་ཕལ་རྣམས་སྤྲེའུའི་ཁྱུ། །ཤིང་སྐམ་མི་རོ་ལྟར་རེངས་ཤིང༌། །ཁ་བ་བུ་ཡུག་སོག་ལེ་བཞིན༌། །འཐོར་རླུང་དྲག་པོའི་མུན་གཏིབས་པ། །ལུས་དང་སྲོག་གི་ཆོམ་པོར་རྒྱུ། །འཇིགས་རུང་གཅན་གཟན་ནགས་ཀྱི་གཤིན་རྗེའི་ཚོགས། །ཟ་བྱེད་མཆེ་བ་ཁྲག་གི་རྣོ་རྒྱུན་ཅན། ། དཔུང་བ་མཉམ་དུ་བསྒྲིགས་པས་སྲིན་པོའི་ཡུལ། །དག་པའི་ཞིང་དུ་འཁྲུལ་བ་སུར་མི་སྐྱེད། །འཇིགས་དང་ཚ་གྲང་བཀྲེས་སྐོམ་མི་སེམས་ཤིང༌། །རིད་ཀྱང་འཛུམ་པའི་གཟི་བྱིན་མི་གཏོང་བར། །དགེ་ལེགས་སླད་དུ་མཁའ་ལྡིང་འདབ་མའི་གར། །སྐྱེ་བོའི་རྒྱུན་ལམ་ངོས་ལ་དྲག་ཏུ་སྒྱུར། །གསེར་ལྗོངས་ཞེས་བྱ་ས་ཡི་ཐིག་ལེ་ནི། །གྲགས་པ་དཀར་པོའི་དོ་ཤལ་རིང་སོང་བས། །ལྕགས་ཀྱུ་མེད་པར་ལྷ་མིའི་ཡིད་དབང་ཀུན། །འཛིན་པའི་རྩེ་དགའ་ཟད་དུ་མེད་པ་ཡོད། །དེ་ཡི་ཕང་བར་གྲོང་དང་གྲོང་ཁྱེར་གྱི། །ཚོམ་བུ་སྔོ་བསངས་གདོང་བར་རྒྱུ་སྐར་མའི། །དོག་པས་མ་འགྲན་ཆུ་ཁུར་སྟོད་གཡོགས་ཀྱིས། །སྒྲིབ་པའི་ངལ་བ་སྟོངས་པའི་མཐའ་མ་དཔོག །རོང་སྟོན་འཕྲིན་ལས་བསྐྱངས་པའི་མུ་ཁྱུད་ཀྱི། །ཁོར་ཡུག་ཟླ་ཤེལ་བརྩེགས་པའི་ས་འཛིན་ལ། །བཤད་དང་སྒྲུབ་པའི་ལང་ཚོ་མ་རྙིངས་པའི། །ཆོས་ཀྱི་སྡེ་ནི་ཀུ་མུད་བཞད་པ་བཞིན། །དེའི་སྙིང་ཤེས་རབ་གསེར་གྱི་ཁུ་བ་ཡིས། །བྲན་པས་བཀྲ་ཤིས་པདྨོ་བཞད་པའི་རྫོང༌། །རྣམ་པར་དཀར་བའི་གེ་སར་འཐུལ་བ་ཅན། །མུ་ཏིག་འབྲས་བུ་ལྷག་གེར་འཛུམ་པས་མཚོན། །ཆུ་ནགས་གཡང་ས་བྲག་སྣ་འཐབ་པའི་གཅོང༌། །ལྟ་བྱེད་སྟོང་ཕྲག་བཀྲ་ཡང་བཙལ་དཀའ་བའི། །གསེབ་ལམ་ཆོམ་པོའི་སྦས་ཡུལ་སྐྱི་གཡའ་བར། །མ་ཐེགས་སྲོག་ཀྱང་ལྔ་བའི་ལམ་དུ་འདྲེན། །དེ་གཞན་ལྷོ་བྱང་དོན་མཐུན་ཁྲི་ཕྲག་གིས། །བགྲོད་པ་གཅིག་པའི་གཞུང་ལམ་དར་དཀར་གྱི། །ཁུག་པ་བརྐྱངས་པས་མིའི་ཐུང་གོམ་པ་ཡང༌། །གྲོག་མའི་སུག་པའི་རྗེས་ལ་ཡང་དག་རྟོག །འཕྲང་ཞེས་རྒྱ་ཁབ་ཕྲ་མོའི་བུ་ག་ལས། །ལུས་ཕྲ་ཐོ་རངས་བསེར་བའི་གཟུག་སྒྲ་ཅན། །འཇིགས་པས་སྐྱི་གཡའ་སྲིད་པ་བར་མའི་འཕྲང༌། །གསལ་བྱེད་མེ་ལོང་གཉིས་པ་གཞན་ཡོད་མིན། །དེ་ན་ནོར་བུའི་བ་གམ་འོད་ཚོགས་ཀྱི། །དགའ་མར་འཁྱུད་པས་མི་ངོམས་ཁང་བཟང་གི །དྲ་བ་ཆ་བསགས་ལྟེ་བའི་ཕོ་བྲང་ཀུན། །དུས་ཀྱིས་འཕང་འདྲའི་དགའ་ཚལ་ཡི་གར་འོང༌། །ངུར་སྨྲིག་གསར་བའི་བླ་གོས་ཀྱིས། །ལི་ཁྲིའི་ཆུ་རྡུལ་གྲངས་ལ་འཕྱ། །མཁྱེན་བཟང་མཁའ་ཡི་ཕ་མཐའ་ནི། །འཇལ་ལ་ཐུབ་པ་ཀུན་ཀྱང་ངལ། །ལུང་དང་རིགས་པའི་ཆུ་གཏེར་རླབས། །གྱེན་དུ་འཆེལ་བས་ལུས་མེད་ཀྱི། །མྱ་ངན་ལག་པས་བྲང་ལ་འཐབ། །ཐར་པའི་སྒོ་འཕར་ངང་གིས་གྲོལ། །རོང་སྟོན་རིམ་བྱོན་མཛད་པའི་གུར་ཀུམ་གྱིས། །བྲིས་པ་ནམ་མཁའི་མེ་ལོང་ངོས་གཉིས་པ། །ལུགསབརྒྱར་གསལ་བ་ས་ཡི་སྙིང་པོ་ཞེས། །སྙན་ལས་སྙན་པ་ཆུ་སྒྲོགས་མཐའ་ལ་བཅས། །འཇིགས་མེད་གདོང་ལྔ་འཁྱུག་པས་མཐོར་བཏེག་པའི། །ཡིད་འོང་ནོར་བུའི་འཁྲི་ཤིང་བཀྲམ་པའི་ཁར། །ཞབས་སྐྱེས་མེ་ཏོག་རྩེན་པའི་པཎ་ཆེན་མང༌། །བསྟན་ལས་སྐྱེས་པའི་རྩེ་དགའ་ཅི་ཡང་འཛིན། །ཁྱད་པར་རིང་ནས་མཛའ་བ་མ་བཏང་བའི། །གྲུ་འཛིན་དབང་ཕྱུག་ལག་པའི་པདྨ་ཅན། །དྲེགས་མྱོས་བྱེ་བའི་གཙུག་ཏོར་མཁར་འཕགས་ནས། །ཕན་བདེ་བསིལ་བ་སྙོམས་ལ་གུས་པ་འཆའ། །ཕྱི་ནང་དྲུང་འཁོར་ཉེ་དབང་རྣམ་རྒྱལ་གྱི། །ཁང་བར་འགྱིང་བའི་ཁེངས་པ་སྙོལ་བྱེད་ཅིང༌། །གསོལ་ཁ་བ་དང་སྣངས་ཆེན་དུད་པའི་ཉམས། །དྲི་བཞོན་ལྡན་པའི་རྐང་འཐུང་ཚལ་གྱིས་གཞལ། །གསུང་མཉན་སྐུ་ཡི་རྒྱལ་མཚན་བལྟ་བའི་སླད། །ཕྱོགས་འགྲུལ་སྙིམ་པའི་གཞོང་བ་རིན་ཆེན་གྱིས། །ཕྱིར་བུར་བཀང་རྣམས་དབང་ཆེན་མཚན་མའི་ལྟོར། །འཇིགས་སྡེ་མེ་ནི་རྒྱུན་ཆད་མེད་ལ་རྟོག །སྙན་ཤལ་གངས་ཀྱི་དུ་ཀཱུ་ལ། །སྙིམ་པའི་སྲིད་ལ་འཕུར་ལྡིང་ཅན། །བསྐྱོད་དེ་ཐུགས་རྗེ་རང་མལ་ནས། །ལངས་པའི་རྫ་རྔ་ཁྱོད་ཀྱིས་རྡུངས། །ཚོང་ཟོང་དར་ཟབ་རིན་ཆེན་ཐང་མའི་རྡུལ། །ཁོར་ཡུག་བརྡལ་བ་གདེངས་ཅན་ལམ་སྲང་ཉིད། །མི་རིགས་ཐ་དད་ཕྱོགས་ཀྱི་འདུ་འགོད་ཀྱིས། །ཀཱ་ཤིའི་ཡུལ་གྱི་གཟུགས་བརྙན་གསལ་བར་བྱེད། །ངུར་བའི་འགྲོས་ལྡན་ནུ་ཁུར་དུད་པ་ཅན། །པདྨའི་གཞོན་ལུས་ཨུཏྤལ་མིག་ཅན་མ། །ཟླ་བཞིན་མཛེས་པ་བིམྦའི་མཆུ་སྒྲོས་ཀྱིས། །གཅིག་ལས་གཅིག་ལྷག་ཡིད་སྲུབས་མཚམས་སྦྱོར་མང༌། །དེ་ལྟའི་ཡུལ་ལ་འདོད་པའི་དཔུང་ལྩི་ཡང༌། །ངེས་འབྱུང་ལ་ཐོད་དཀར་པོའི་མིག་དར་དང༌། །སྒྱུ་མའི་ཏིང་འཛིན་བག་ཡོད་འཁར་བའི་གྲོགས། །བསྟེན་ལས་བློ་བྲིད་ཕྱོགས་ལ་མྱ་ངན་བྱིན། །དེ་ནས་ཉི་ཟླའི་རྒྱུ་ལམ་ཡང༌། །འགོག་སྙམ་ས་ཡི་བདག་པོའི་མཁར། ། ལམ་སྲང་བུ་མོ་རྣ་བ་ལ། །མཚོན་ཆའི་ཕོན་པོ་སྙིང་ལ་གཟན། །བཀར་བཏགས་ལོག་པའི་གཉའ་ཤིང་ཁུར། །འབངས་ཀྱི་ཕྲག་ལ་ཐེག་མིན་ཏེ། །ཉིན་བྱེད་གཟའ་ཡིས་ཟིན་པ་ལྟར། །ཕལ་ལ་སྡིག་པའི་མཚན་མར་བཀྲ། །གདོང་ལ་རྒྱུ་བའི་དགྲ་སྡེའི་ཚོགས། །མགོ་བོ་སྙེ་མ་ལྟར་བྲེགས་ནས། །ཁྲག་ཞག་འཁྱིལ་བའི་རྒྱ་མཚོ་མར། །འབྱུང་བོའི་རྐན་སྒྲ་མཚན་མོའི་དབྱངས། །ཚ་གཅུན་དྲག་པོས་འགྲོ་འདའི་ཁྱུ། །རང་ཁྱིམ་ལ་ནི་འགྲོ་འོང་བཞིན། །རྐང་རྡུལ་གཡོས་པས་ཉི་ཟླ་ལས། །དུད་པས་བསྒོས་པའི་ཤེལ་དག་གསལ། །ཆོས་དང་ཕྱི་མ་བཏང་ནས་འདོད་ཆེན་གྱི། །མེ་གང་སྟོང་གསུམ་དངོས་འདིས་མི་ངོམས་ན། །ནམ་ཞིག་རང་གི་ཕ་མའི་མགོ་བོ་ཡང༌། །བསྲེག་བྱའི་བུད་ཤིང་བྱེད་ལ་སོམ་ཉིས་དབེན། །ཀྱེ་ཧུད་ཡ་མུ་ན་གྲོང་ཡང༌། །འཇིགས་པའི་ཡུལ་ཞེས་ཅི་ལ་གྲགས། །རྣམ་དཀར་ཅན་ལ་བདེ་བ་ཡིས། །ལེགས་པར་དབུགས་རབ་མི་དབྱུང་ངམ། །ཨནྡ་རྙིལ་གྱི་མདོག་ལྟར་རབ་སྔོ་བའི།། གཏིང་དཔོག་དཀའ་བ་ལྷ་མིའི་གྲུ་རྫིངས་ཅན། །དེ་ལ་ས་ཡི་ལྷ་བཙུན་ན་རིམ་གྱིས། །བཙུགས་པའི་ཟམ་པ་དགུ་ཚིགས་ཞགས་པའི་གཉེན། །ཉེ་བར་ཟངས་མདོག་རྒྱ་མཚོའི་གོས་ཅན་ལ། །གསེར་དངུལ་དར་ཟབ་ཕོན་པོའི་བང་བ་ཡིས། །རྨུགས་འཛིན་གྲོང་ཡང་པྲེ་ཏའི་ཡུལ་འཁོར་དུ། །གཏོང་བའི་དཔལ་དང་འབྱོར་བས་བརྒྱན་པ་ཡོད། །ངག་ཚིག་མི་གཅིག་ཤ་ཟའི་རང་སྐད་ཀྱིས། །ཅ་ཅོ་རྣ་བར་འཚེར་ཡང་ཟབ་ཆོས་ཀྱི།། དབྱངས་སྙན་རོལ་མོ་ལྟར་འཁྲོལ་ལེགས་བྱས་ཀྱི། །བྱིན་རྟེན་གཞལ་མེད་ཁང་སོགས་རྩིས་པས་བྲལ། །གནའ་བོའི་ཆོས་རྒྱལ་གོང་མའི་སུག་རྗེས་སུ། །བྱུང་བའི་རྒྱ་མཁར་རབ་མཐོ་གྲགས་པ་ཅན། །ཕྱི་ནང་རྡུལ་གྱིས་ལྷག་གེར་མི་སྡུག་པ། །མ་སྟོངས་རོ་མ་ཙམ་ཞིག་ཉེ་བར་སྣང༌། །འཛམ་གླིང་སྟག་ཤར་དཔའ་བོའི་གྲྭ་གྱེས་པ། །མཐོང་ན་དོན་སྙིང་འབྲས་ཡོས་ལྟར་འགས་ཤིང༌། །ཐུར་དུ་འབུབ་པས་རྡུལ་མང་ཐུ་བའི་ཕྱག །དབང་མེད་འཚལ་བའི་མཇིང་བ་བསྣོལ་མར་བསྡེབས། །བྱེ་ཚན་ཉི་ཟེར་ཚ་བས་དམ་འཁྱུད་ལ། །གཤོག་ཡངས་མཁའ་ལྡིང་གིས་ཀྱང་བགྲོད་མིན་པའི། །ལུང་སྲང་མྱ་ངམ་ཐང་གི་རྗེས་འགྲོ་བའི། །སྣེ་མོ་དཔག་ཚད་འདང་བའི་ཁྱོན་ལ་བརྐྱངས། །དེ་རུ་ལྕགས་སྐུད་བསྒྲིལ་བའི་ལྷམ་སྒྲོག་ནི། །གཞུ་རྒྱུད་ལྟར་འཐེན་བུམ་པ་ཅན་བསྟེན་ལ། །རྔུལ་གྱི་ཐིགས་པ་ཐོད་ལ་དོ་ཤལ་དུ། །བཟུང་ནས་སྐྱེན་པོའི་འགྲོས་ལ་ལྕག་ཀྱང་ཆུག །མདའ་ལྟོང་དབྱིབས་ལྡན་གསེར་སྒའི་བི་ས་ཎི། ། རྒྱ་བོད་དོན་མཐུན་རྒྱུ་བ་ཟམ་མི་འཆད། །བཟོད་པའི་མུ་ཁྱུད་ཁྱུ་མཆོག་ལས་ལྷག་པའི། །འཕོངས་ལ་བཀལ་བ་གཟིངས་ཀྱི་རིན་ཆེན་བཞིན། །ག་ཞ་གླུ་གཞས་སྣང་གླུའི་རྒྱུད་མངས་སྒྲ། །འགྱུར་ཁུག་འདེགས་འཇོག་དྲི་ཟའི་རྗེས་སྙེག་པས། །རེས་མོས་དགའ་བར་སྤྱོད་པའི་རྐང་དྲུག་ཁྱུ། །ཇི་སྙེད་ཚོགས་ཀྱང་ཚོར་བདེ་སྐྱེད་དོ་ལོ། །སྣ་ཚོགས་མནྡ་ར་བའི་དྲ་བ་ཡི། །འདབ་བཟང་ཚེམས་ཕྲེང་ལས་ཟེགས་སྦྲང་རྩིའི་ཆང༌། །ལྕེ་ཆུང་ལ་གཞིབ་དུབ་ལས་ངལ་བསོས་ལ། །ལང་ཚོ་ཉམས་པ་གསོ་བའི་བཅུད་ལེན་སྟེན། །ཙག་རྡེའུ་ཞེས་གྲགས་མ་ལ་ཡ་འདྲ་བའི། །ས་འཛིན་ཉི་མའི་ཐོར་ཚུགས་ལྡེམ་པ་ལས། །རབ་རིབ་དྲི་མ་བསྲིངས་པའི་སྣང་བྱེད་ཀྱིས། །ཁོར་ཡུག་སྣོད་བཅུད་ལག་པའི་རྫས་བཞིན་ལྟོས། །ཡན་ལག་བཞི་ཟུང་དང་ལྡན་རྨ་ཆུའི་ཀླུང༌། །གནམ་སྔོན་ཞུ་བའི་གཟི་མདངས་ལ་འཁུ་བ། །རྣམ་མང་གྲུ་ཡི་རྩེ་དགས་འཇུག་པའི་གནས། །ལྷུང་ལྷུང་དབང་པོའི་ཕྱོགས་ལ་དལ་གྱིས་འབབ། །ཟངས་ཞུན་རྒྱ་སྐྱེགས་ཁུ་བ་བསྲེས་པའི་ཚོན། །བྱུགས་རིས་ལང་ཚོས་སྒེག་ལྡན་རི་བོའི་ཕྲེང༌། །ཉི་ཟེར་ཁུ་བས་རབ་མྱོས་ངོ་ཚའི་གོས། །བྲལ་བ་ཡིད་ལ་མཚོན་གྱི་གདེངས་ཀ་ཉིད། །ལོག་ལྟའི་ཁྲག་རྒྱུན་འཐུངས་པས་ནག་ཕྱོགས་ཀྱི། །རང་རྩལ་ཡོན་པོར་རྗོགས་པ་ཀླ་ཀློའི་སྡེ། །སྨུག་རྩིའི་ཕུང་བོ་ས་ཡི་འགྲམ་པ་ལ། །ཐང་མར་བརྡལ་བའི་སྙེམས་པ་རི་བས་མཐོ། །སྟོབས་འབྱོར་ཟླ་བའི་མྱུ་གུ་ཆེས་ཕྲ་ཡང༌། །དད་པའི་མཁུར་ཚོས་བུམ་ཕྲག་ཉི་མའི་གཟི། །གཅིག་ཏུ་བཟླུམས་འདྲའི་གྲོང་སྡེ་འབྲུ་དཀར་གྱི། །སྙེ་མ་དུད་པ་བསྔག་བྱའི་ཡུལ་དུ་སོན། །ཆོས་ཀྱི་ཚོང་རྡལ་ལ་ནི་ལུང་རིགས་ཀྱི། །དྲིལ་ཆུང་དུས་བཞིར་འཁྲོལ་བ་ཀློག་གི་གྲྭ། །རྒྱལ་བྱེད་ཚལ་གྱི་རི་མོ་གཟུགས་ཅན་དུ། །མེས་པོས་བྲིས་པ་ཐབས་ཀྱི་ཕྱོགས་སུ་འཚེར། །རྐང་དྲུག་འཕུར་ལྡིང་རོལ་པའི་མཛུབ་རྩེ་ཡིས། །རེག་པས་འདར་ལྡན་སྣ་ཚོགས་དྲི་བཟང་ཅན། །ཁུ་བྱུག་རྨ་བྱ་མྱོས་པའི་གྲེ་འགྱུར་དབྱངས། །ལ་སོགས་དྲི་ཟའི་འཇིག་རྟེན་ས་ལ་སྣང༌། །གཡུ་ལོ་གསེར་གྱི་གང་བུ་དུད་པ་ཡི། །ཡོངས་རྫོགས་རོ་ལྡན་འབྲས་བུའི་བང་མཛོད་ཅན། །ཚང་ཚིང་མཛའ་བོར་འཐམས་པའི་དྲ་བ་ན། །དབེན་གསུམ་སྙིང་པོའི་ཐིག་ལེ་གཅིག་པུ་ཡོད། །དེ་ན་གང་གིས་བཤད་སྒྲུབ་མི་ནུབ་པའི། །རྒྱལ་མཚན་དང་བོར་བསྒྲེངས་པའི་བ་གམ་ཅན། །མཉན་ཡོད་ཚལ་གྱི་གཞལ་མེད་གནྡྷོ་ལ། །ཚངས་ཆེན་པིར་གྱིས་བྲིས་པ་སུས་མ་རིག །ཕུ་ན་མརྒད་མྱུ་གུ་སྣ་ལྔ་བའི། །ཚོན་གྱིསསྤྲས་འདྲ་མེ་ཏོག་བཞད་ལྡན་པ། །མ་སྨད་འབྲས་བཟང་རོ་བརྒྱའི་བཅུད་ལེན་ཅན། །ཉིང་ཡང་མུན་པ་གཏིབས་པའི་ཚང་ཚིང་འཁྲིགས། །མདོ་རུ་རང་བྱུང་བྲག་རིའི་མུ་ཁྱུད་ལ། །མ་བསླངས་གོར་མའི་ཀ་བ་མཐོངས་ལ་བསྙེགས། །སྔོ་བསངས་རང་ལུས་ལ་ནི་སྙིང་ཉེ་སྟེ། །རགས་པའི་གཟུགས་ནི་སྦས་པའི་ཟོལ་ལ་བརྟེན། །བར་དུ་ཁོད་སྙོམས་ཞིང་ལ་འབྲུ་དྲུག་གི །མགོ་ལྕོག་གུས་པ་དཔྱིད་ཀྱི་མ་མ་བརྒྱས། །སྐྱེད་བསྲིངས་གཡུར་གྱིས་དུད་པའི་འདབ་གཤོག་ཅན། །བསེར་བུས་བདས་པ་གར་གྱི་རི་མོ་བཞིན། །ཉལ་འགྲོའི་ལྦུ་བ་ཟིལ་བའི་མུ་ཏིག་གི། །ཕྲེང་བ་ཙནྡན་གུར་ཀུམ་དྲི་ལེན་གྱིས། །བསྒོས་པའི་ལྗོན་བཟང་སྙེ་མར་སྨིན་པ་ཅན། །མི་ཆུང་མི་ཆེ་གངྒཱ་གཉིས་པ་བཞིན།།ཁང་བ་ཁང་ཆེན་མཛེས་པའི་བ་གམ་ཅན། །སྐར་ཁུང་སྒོ་གླེགས་གང་འཚམ་འབབ་སྟེགས་ཀྱི། །རྟ་བབས་མཐོར་བརྩེགས་ལྟ་ན་སྡུག་པའི་གྲོང༌། །རིག་བྱེད་དབང་པོས་སྤྲུལ་པར་འོལ་མི་དབྱི། །ཡན་ལག་སྟུག་ཅིང་ལུས་བོངས་ཁོ་ལག་ཆེ། །འཁྲུགས་པའི་སྡང་མིག་སོད་གཏུབས་སྐད་ཀྱི་གདངས། །སྒྲ་བརྒྱར་གླལ་བའི་ང་རོ་འཚེར་བ་ཅན། །དཔའ་བོའི་ཚོགས་ནི་གནོད་སྦྱིན་ཁྲོས་དང་མཚུངས། །ཟླ་བཞིན་འཆར་བ་ལེགས་བྲིས་གཞོན་ནུ་ལས། །རྣམ་པར་འགོངས་པ་སྐྱེ་བོས་གོས་བགོས་ཤིང༌། །རྒྱན་བཟང་འོག་པག་འཕུར་བའི་མདངས་ལྔ་བ། །ཅི་ཡང་དཀྲིགས་པ་རོལ་པའི་རྩེ་མོར་གཡེངས།། ལང་ཚོའི་མྱོས་བུམ་མཛེས་སྡུག་དོ་ཤལ་བརྒྱའི། །ཁུརགྱིས་ལྩི་སྟེ་དལ་བུའི་གོམ་སྟབས་ནི། །ངུར་བ་བཞིན་དུ་རྒྱུ་བའི་རྐེད་མེད་མ། །འཆི་མེད་བུ་མོའི་དགྲ་ཟླས་ཕྱོགས་ཀུན་གསལ། །གླུ་གཞས་ཟློས་གར་འཁྲབ་པའི་ཡོ་ལང་གིས། །དྲི་ཟ་དགའ་བའི་ཚལ་དང་དཔལ་སྙོམས་པའི། །ཡིད་འོང་དོ་རར་དུས་བཞིའི་དགའ་སྟོན་གྱིས། །ལུས་དང་སེམས་ཀྱི་རིཥྚ་འགུགས་ལ་བརྩོན། །དགའ་མགུ་འདོད་ལྷའི་མེ་ལོང་ལ་ཆགས་ནས། །མདའ་ལྔས་རེག་པ་མ་ཐུབ་དུས་བཏབ་ཀྱིས། །རེ་བ་རྫོགས་དང་མ་རྫོགས་ཧ་རི་ཎིའི། །ཁྱུ་ཚོགས་མཛའ་བའི་རྒྱ་ལས་འགོང་མི་ནུས། །སྐབས་རེར་རང་དང་མུ་སྟེགས་ཀུ་ཅོའི་སྒྲས། །ཐོས་བྱེད་རྡོ་རྗེའི་ཁང་བར་ཡོངས་བསྒྲུབས་ཀྱང༌། །བྱེ་མར་རློག་འདིས་འཇིགས་རུང་གཤིན་རྗེའི་གྲོང༌། །ཕྱིན་འདྲའི་སྣང་བ་རོ་ཟན་མཚོན་དུ་འབར། །དེ་ཡི་ལྟེ་བར་སྐར་ཚོགས་ནི།། པིར་གྱིས་བྲིས་པའི་རི་མོ་བཞིན། །ཆོས་ཀྱི་སྡེ་ནི་བསོད་ནམས་ཀྱིས། །ཡོངས་སུ་དཀར་བའི་ཐིག་ལེ་ཤར། །རིན་ཆེན་ལས་གྲུབ་གཙུག་ལག་ཁང༌། །མདངས་མཚར་དབང་པོའི་གཞུ་ལ་བརྟག །ཆུ་འཛིན་འོད་ཀྱི་ལྡིང་ཁང་མར། ། བ་གམ་ཅན་དུ་འཁྲུལ་བ་འཛིན། །རྩིག་པ་རྩིག་སྐྱབས་འབབ་སྟེགས་དང༌། །ཀ་བ་གདུང་ལྕམ་ལན་ཀན་ཚོགས། །རིན་ཆེན་མཐོན་ཀ་ལོ་ཧི་ཏ།།གསེར་དངུལ་མན་ཤེལ་རྡོའི་སྙིང་པོ། །དབང་སྔོན་མརྒད་བྱི་རུའི་བྱ་འདབ་རྣམས། །རིམ་པར་འཕུར་བའི་ཆུ་སྲིན་ཁ་འགྲམ་ལས། །སྨིན་པའི་དྲ་བ་གཡེར་ཁའི་དྲིལ་ཆུང་ཅན། །དྲི་བཞོན་བུ་མོས་མྱོས་ཏེ་རྒོད་པ་བཞིན།། འཇིགས་མེད་གྲུབ་པས་ཟུང་འཇུག་སྒྱུ་མའི་གཟུགས། །རྙེད་དེ་རྒས་འཁོགས་ནོར་བུའི་ཟ་མ་ཏོག །རང་བསྲེལ་ཟོལ་གྱིས་མ་ལུས་སྲི་ཞུའི་མགྲོན། །ཕྲོགས་པས་བདེ་གཤེགས་གཞན་ལ་གནོང་བ་སྦྱིན།། ཉི་ཟླའི་ར་བ་གདེངས་ཅན་འཛིན་མའི་མཐིལ། །གནོད་སྦྱིན་རྟ་བབས་ལྷ་ཡི་གཞལ་མེད་ཁང་། །དྲི་ཟའི་དགའ་ཚལ་སྐབས་གསུམ་ཁྲུས་ཀྱི་རྫིང༌། །ཚངས་པའི་ཁང་བརྩེགས་འཕོས་འདྲའི་ཡང་ཐོག་ན། །སྣ་ཚོགས་རིན་ཆེན་རིམ་པའི་རྐང་སྟེགས་ཅན། །གསེར་གྱི་ཁྲི་འཕང་ནོར་བུའི་འཕྲས་སྤྲས་པ། །ཟ་འོག་པཉྩ་ལི་ཀ་བརྩེགས་པའི་གདན། །ཙམ་པའི་མེ་ཏོག་ཕྲེང་འཛེས་ཤལ་བ་དེར། །རྒྱལ་བ་ལས་ཀྱང་ཆོས་ཀྱི་ཟ་མ་ཏོག །དཔལ་ལྡན་ས་བཅུའི་རྩེ་མོར་ཡོངས་སོན་པ། །དག་པའི་བརྟན་གཡོ་ཇི་སྙེད་ལུས་སྐྱེས་ཀྱི། །ཁང་བར་འཕྱན་ཏེ་གསང་བའི་སྤྲིངས་ཡིག་ནི། །ཀློག་པས་ཐུན་མིན་སྐལ་བ་བཟང་པོའི་ཚོགས། །སྨིན་པའི་ཡོན་ཏན་བསམ་པས་ག་ལ་ལང༌། །གསང་བའི་སྒོ་འཕར་ནམ་མཁས་ཟིན་མིན་པ། །དབྱེ་བ་ལྟ་ཅི་ཐུན་མོང་གཞན་དབང་གིས། །སྣང་བའང་ཚུལ་གནས་མང་ཐོས་ཤེས་རབ་མཆོག ། སྙིང་རྗེ་ལྷག་བསམ་བྱམས་དང་དེས་པའི་མཛོད། །བརྟན་དང་ངང་བཟང་བྱིན་ཆེན་གྲགས་པའི་རྒྱན། །ཆེན་པོ་ལ་འོས་ཡོན་ཏན་འཕགས་པའི་ཚོགས། །མཐའ་དག་རི་མོར་བཀོད་པའི་གཟུགས་ཅན་བཞིན། །ལྟ་ན་སྡུག་པ་བྱ་རྒོད་ཕུང་བོའི་རིར། །མཚན་དཔེའི་སྐྱེ་མཆེད་བཀྲ་བ་ལྷ་ཡི་ལྷ། །འཚོ་ཞིང་གཞེས་པའི་དཔལ་དེ་རྗེས་སུ་དྲན། །གང་སྐུ་གཟི་བྱིན་ལྷམ་མེ་བ། །གསེར་ཞུན་རྡུལ་བརྩེགས་ལྷུན་པོའི་ཟླ། །མཛེས་ཞལ་དཀྱིལ་འཁོར་རབ་རྒྱས་པས། །བསིལ་སྦྱིན་དབང་པོ་ཡང་དག་གསལ། །ངུར་སྨྲིག་འདབ་མའི་འཕྱང་འཕྲུལ་གྱིས། །འཆི་མེད་དབང་པོའི་གཞུ་རིས་བསླུ། །འཛུམ་ཟེར་དྭངས་མས་འོད་ལྡན་གྱི། །ཀུན་སྣང་བྱེ་བའི་དཔལ་ལ་འཁུ། །དེ་ལྟར་ཐུབ་དབང་གཙུག་གི་ཆུ་སྐྱེས་ཀྱང་། །འདི་ཞབས་འདེགས་པ་སྐལ་བ་བཟང་ངོ་ཞེས། །ཁེངས་པས་རབ་མཐོ་ཚངས་སོགས་དྲེགས་པའི་དབང༌། །འདར་ལྡན་རྔུལ་གྱི་མཆོད་ཡོན་ལུས་ལ་སྦྲེངས། །རང་སྲིད་ཉམས་པའི་གདུང་བ་ཆེས་ལྩི་བས། །ཞི་བའི་དགའ་མར་རོལ་པའི་ཙོང་ཁ་བ། །རང་བསྟན་ལང་ཚོ་རྫོགས་ལ་མངོན་ཆགས་ནས། །གར་བརྒྱས་འདི་ཡི་སྐུ་ལ་དམ་དུ་འཁྱུད། །རྫུ་འཕྲུལ་ཤུགས་ཀྱིས་ལྷགས་པའི་འཕགས་ཆེན་མང༌། །མཁའ་དང་ས་ལ་ཏིལ་གྱི་གང་བུ་བཞིན། །དད་འདུན་ཤེས་རབ་ནོར་བུའི་རྣ་ཆ་ཅན། །ཐུན་མོང་བགྲང་ཡང་གུར་ཀུམ་བཀྲམ་པ་བཞིན། །བསྐལ་བར་བསོད་ནམས་ཟོང་གིས་ཁུགས་མིན་པའི། །སྙེད་དཀའི་ལེགས་བཤད་རྣ་བའི་རྒྱན་བྱས་ཏེ། །ཐུན་མོང་ཐུན་མོང་མིན་པའི་རིག་པའི་གནས། །ཅི་ཡང་སྦྱོང་བའི་རྩེ་དགས་སུ་མ་མྱོས། །འདི་གཞན་ལྷག་པའི་དག་ཞིང་ཞེས། །མཆིས་སྐད་རྫུན་གྱི་ངག་ཚིག་ཅེས། །བཟླས་བརྗོད་ལས་དེས་རོ་འཛིན་ནི། །འབར་བའི་ངལ་བ་ཁ་ལ་བརྟེན། །དགའ་དད་སྤྲོ་བའི་བདེ་འཐུང་རོ། །ཁྱབ་འཇུག་གནས་ལ་ཆུ་རྒྱུན་བཞིན། །འཐུངས་འདིས་ཆེན་པོ་གཞན་དག་ལ། །གང་ཞིག་ཆགས་བྲལ་བླང་མི་འགྱུར། །དེ་སྐད་མཐོང་ན་ལྟ་ཅི་ཐོས་པས་ཀྱང༌། །དགའ་དང་རངས་པས་དག་དང་མ་དག་ན། །རང་རང་ལས་ལ་ལེ་ལོའི་མཆོག་བྱིན་ནས། །ལྡང་དང་ཀྱེ་ཧོའི་ཅ་ཅོ་ཁོ་ནས་བྲེལ། །ཨེ་ཧོ་བཟང་པོའི་ལས་ཀྱིས་མ་བཏང་བས། །འདིར་སླེབས་འཁྲུལ་ལམ་རྨི་ལམ་མིན་ནམ་ཞེས། །སྐད་ཅིག་ཡུན་ལ་ཟུང་འཇུག་གྲུབ་པའི་ས། །རྡོག་པས་མནན་འདྲའི་དགའ་དད་མངོན་བྱས་ནས། །ཐལ་མོའི་རྩེ་ཕྲན་སྤྱི་བོར་སོན་པའི་མོད། །མིག་སེར་དབང་གིས་རལ་བ་ས་ལ་ལྷགས། །འཚོལ་ཕྱིར་ཐོད་པ་མདུན་སར་ལན་བརྒྱའི་བར། །རྒྱུག་པའི་ལྷ་ཕྱག་རྩིས་ཀྱིས་ལང་མི་འཚལ། །བསོད་ནམས་ཡན་ལག་བདུན་དང་ལྡན་པའི་གཞུང༌། །དྲུག་སྐྱེས་ས་འཛིན་གླུ་ཡིས་ངེས་བཅིངས་པ། །བདག་སྐྱེས་རི་མོ་གསུམ་པ་ལྟར་སྙན་པས། །བརྗོད་དང་བསྟོད་པས་སྒྲ་གཞན་ཕོངས་སུ་ཕྲོགས། །དྲི་མེད་ཆུ་སྔོན་བཻ་ཌཱུརྱའི། །དྭངས་མར་འཁྱིལ་བའི་ཨརྒྷཾ་ནི། །ཟག་མེད་བདེ་བའི་རོ་ནུས་ཅན། །སྙིམ་པས་དར་དང་བཅས་ཏེ་མཆོད། །པུས་མོའི་ལྷ་ང་དབྱིག་འཛིན་མའི། །མཁུར་ལ་ཐིག་ལེར་སྦྱིན་བྱས་ནས། །སྟོད་གོས་ཕྲག་པའི་གྲོགས་མོ་དེར། །རྩེ་དགའི་དོ་ཤལ་ཉིད་དུ་བསྟར། །ཚེམས་དཀར་གངས་རིའི་མེ་ལོང་ལས། །འཛུམ་པའི་འོད་ཀྱིས་མདངས་བྱིན་པའི། །ཆུ་ཤེལ་དག་པའི་བཞིན་རས་ནི། །གསལ་བཞིན་གསལ་བཞིན་འདི་སྐད་གསོལ། །ཤིང་བལ་བཞིན་དུ་ལྡང་དང་བསྐྱོད་པ་རྣམ་པར་ཡང༌། །རྩི་མ་གྷི་བཞིན་བགྲེས་རྒུད་དུག་གིས་རེག་མ་གྱུར། །ཉི་མ་བཞིན་དུ་འོད་དང་འོད་ཟེར་ལྷམ་མེ་བར། །ཁྱོད་ཀྱི་སྐུ་ནི་སྐྱེ་འབྲི་མེད་པར་བཞུགས་ལགས་སམ། །སྒྲིབ་མེད་གཟིགས་པ་ཡངས་ལ་མཆོག་ཏུ་སྙན་གསལ་ཞིང༌། །འཛེར་དང་དོག་བྲལ་གསུང་དབྱངས་ལེགས་བཤད་ཁོ་ནར་འགྱུ། །ཐུགས་ལ་གསལ་འགྲིབ་མིང་ཙམ་མ་གྱུར་ཐབས་ཤེས་རྒྱས། །ཁྱོད་ཡོན་སྲིད་ཞིའི་སྙིང་པོར་བྲི་གང་མེད་ལགས་སམ། །རྒྱལ་བའི་མཛད་ཀུན་ཟུར་ཕུད་ངོས་ལ་རབ་བཅིངས་ནས། །བློ་བཟང་རང་སྲིད་ཁོང་བའི་སྙིང་ལ་བཅངས་བཞིན་དུ། །གཅེས་ཤིང་བསྐྱངས་པས་ས་ཆེན་ཀུན་ལ་དབང་བྱས་པའི། །རྨད་བྱུང་སྤྱོད་པར་དུས་ཀྱི་དྲི་མས་མ་གོས་སམ། །ཁྱོད་བཤེས་བློ་གྲོས་བཟང་པོའི་དཔལ་མངའ་ནས། །སྡེབ་ལེགས་སྙན་འཕྲིན་དབྱངས་ཅན་ངག་གི་སྒྲ། །མི་ཕྱེད་སྒྲོམ་ལ་རིམ་པ་བདུན་གྱི་རྒྱ། །བཏབ་སྟེ་བདག་ལ་ཁུར་དུ་བསྐུར་འདི་བཞེས། ། རྡོ་རྗེ་རྫོང་ཞེས་གསང་བའི་སྙིང་པོ་ཀུན། །ལང་ཚོའི་འཁོར་ལོར་རྒྱུ་སྐར་ལྟར་བཀྲ་ཞིང༌། །རབ་མཐོ་བརྩེགས་པ་བྲག་རིའི་ཕུང་བོ་གང་། །གངྒཱའི་ཡབ་གཅིག་ཏི་སེར་སུ་ཡིས་ཕྱེ། །རྐང་འཐུང་ཡལ་ག་གཡོབ་པས་དྲང་སྲོང་ཚོགས། །རིངས་པར་འབོད་པས་ཅི་བགྱི་དུས་གསུམ་དུ། །གནས་གསུམ་དཔའ་བོ་དུ་མའི་རོལ་རྩེད་ལ། །གསེར་ཅན་དགྲ་ཡང་ལྟ་བྱེད་སྟོང་གིས་ངལ། །ཆུ་ཤིང་མཆོག་ལུས་པད་རྩའི་མྱོས་བུམ་དང༌། །བྱུ་རུའི་མཆུ་སྒྲོས་སྦྲང་རྩིའི་འགྲམ་ཆང་ཅན། །མཐོན་མཐིང་ལྕང་ལོ་ཨུཏྤལ་འདབ་མའི་སྤྱན། །སྙིང་སྡུག་ལྷན་ཅིག་སྐྱེས་པ་དུས་སུ་འདུ། །དེ་ཕྱིར་འཇམ་མགོན་ཁྲོས་པ་གར་དགུའི་ཉམས། །ཕྱོགས་ཆར་རྫོགས་པ་དུས་དགྲའི་དབང་པོ་ཡང༌། །འདི་ན་སྙོམས་འཇུག་ལས་ལས་མ་བཞེངས་པས། །བདེ་གཤེགས་ཕལ་ཆེར་རྗེས་ཆགས་ཟོལ་ལ་བརྟེན། །འདི་ན་གང་གནས་ཐབས་ཤེས་མཉམ་འཇུག་པའི། །བརྡ་མཚོན་ཤར་ལྷོའི་ཆུ་བོ་གཉིས་སྦྱོར་ལ། །འདབ་ཆགས་བུང་བ་ལྷག་ལྷག་དགོད་པ་དང༌། །མེ་ཏོག་མགྲིན་པ་འཁྱོག་སྟེ་ལྟ་བ་བཞིན། །ལྟེ་བའི་གསང་ལྕམ་མྱོས་པའི་འཛུམ་ཟེར་གྱི། །བསུས་པའི་གྲོང་ཁྱེར་སྟོང་ཕྲག་དོན་གཉིས་ནས། །མི་འགྱུར་ལྷན་སྐྱེས་དགའ་བའི་རོལ་གར་ཅན།། རྒྱུ་ནས་དུས་ཀྱི་མཁའ་སྤྱོད་སར་གཤེགས་སྙམ། །དེ་ན་ཆོས་སྡེ་གསེར་གྱི་པདྨ་འབུམ། །བཞད་ལས་དྲི་མེད་མདོ་སྔགས་ལི་ཤིའི་དྲི། །ཁོར་ཡུག་འཐུལ་བས་སར་སྤྱོད་འོག་མིན་ཞེས། །ཐེ་ཚོམ་དཔྱང་ཐག་འཛིན་ལ་མངོན་པར་ཕྱོགས། །ཀུན་ཡིད་མིན་པའི་ལང་ཚོ་བཅིལ་བ་ལ། །ཞལ་དབུགས་རྩེ་ཡང་ཟླ་རྒྱས་འབུམ་ཕྲག་ལས། །རབ་གསལ་ཁྲི་ཆེན་དུས་ཀྱི་རྡོ་རྗེ་འཆང༌། །འཚོ་གཞེས་ཚེ་དང་ཡེ་ཤེས་དཔག་པར་ཡས། །རྩོད་པའི་དུས་ཀྱི་བློ་བཟང་པཎྚི་ཏ། ། མི་ཕྱེད་རྡོ་རྗེའི་སྐྱིལ་ཀྲུང་ལ་བརྟེན་ནས། །ཟབ་མོའི་སྒྱུ་མའི་ཏིང་འཛིན་དཔག་ཡས་པར། །རོལ་ཅིང་ལེགས་བཤད་རྩེ་དགས་ཅི་ཡང་བྲེལ། །གང་ཞིག་ཁྱོད་ཞལ་མཐོང་བ་ལ། །བྲེལ་བའི་ཡིད་ཀྱིས་བརྣངས་བྱས་པ། །རིན་ཆེན་གླིང་ཕྱིན་དེད་དཔོན་ནི། །རང་སྲས་མཐོང་ལ་དེ་ལྟ་མིན། །ཁ་བ་ནག་པོའི་མདངས་ཀྱིས་འབབ། །སྦྲུལ་གྱི་སྐྲ་ལོ་སྐྱེ་ཡང་སྲིད། །མྱུར་བར་དངོས་ཞལ་མི་མཇལ་རི། །ཞེས་པའི་བྲོ་ཚིག་བཟླས་བུར་བརྩོན། །དབང་ཕྱོགས་རི་བོའི་ཕྲག་པ་ལས། །ཉིན་བྱེད་ལྷགས་པ་ལ་འཁྲུལ་ནས། །མཇལ་ཕྱིར་གོམ་པ་བརྡེག་འཆོས་ཏེ། །བརྒྱལ་ཞིང་ཁྱོར་ཆུ་སྦྱིན་བྱར་གྱུར། །རྨ་བྱ་འཇོལ་མོའི་གྲེ་འགྱུར་དབྱངས། །ཁྱོད་གསུང་ཉིད་དུ་རྣམ་བརྟགས་ནས། །མགྲིན་པ་ཡོ་བའི་ཆོ་ག་ལ། །མཚན་ཡང་མནལ་ཐབས་དགུང་ལ་ཡལ། །ད་ནི་ཞག་བཅུའི་མཇུག་རྩེ་ན། །ཆོས་ཀྱི་བགྲོ་བ་མཛད་དོ་ཞེས། །རེ་བའི་མིག་འབྲས་རི་མོ་བཞིན། །ཟུམ་པ་མེད་པར་ཁྱོད་ལ་བཙུགས། ། ཉེ་བའི་མངག་གཞུག་རིན་པོ་ཆེ་ཡི་མིང༌། །བཀོལ་བདེ་གཞོན་ནུ་ཕྲ་མོ་ལས་འཕགས་ནས། །སྲི་ཞུར་སྒྲིམ་པའི་བག་ཡོད་ཉིན་མཚན་དུ། །རང་གིར་འཁུར་ལ་ལས་བཤོལ་ག་ལས་རྙེད། །མ་གོམས་ཕྱིར་ན་གཡོས་སྦྱོར་སྣ་ཚོགས་ལ། །ལག་སོར་ཤིང་སྐམ་ཡལ་ག་ལྟར་གྱོང་བས། །སྨྲས་ཀྱང་ཧྲིག་ཧྲིག་མིག་དང་ཅག་ཅག་གི །འདེགས་འཇོག་མང་བོས་ས་ལ་ངལ་བ་སྟེར། །སྣུམ་ཁུ་ཁོལ་མ་སྤྲིན་གྱི་སྙིང་པོ་གང༌། །གྲོ་ཕྱེ་ཐུལ་བ་རལ་བས་མ་ཐེག་སྟེ། །འགྱོད་པའི་ཤུགས་ཀྱིས་སོ་ཕྲེང་བུད་པའི་ཤུལ། །སྤྲིན་བྲལ་གློག་སྟོང་འགྱུ་བའི་གཅོང་རོང་ཉིད། །ཤ་ཚིལ་མངར་བོའི་རོ་བཅུད་སྲོག་བྱས་པའི། །རྒྱུ་མའི་ཚོད་མ་གྱ་གྱུ་ལྷུང་བའི་ལྩིད། །མ་ཟིན་ཟངས་མཐིལ་གོར་མོར་བརྡོལ་བ་ལ། །བླ་གོས་གླན་པ་བཞད་གད་རྒྱུན་མའི་གསོས།། ཉིན་གཅིག་མཐར་བྱེད་དབྱུག་ཏོ་སོག་མ་ལྟར།། ཟིལ་གནོན་འཁར་བ་རིང་བོས་འཇིགས་བསྐྱེད་ནས། །གཡང་དཀར་ཅེ་སྤྱང་དྲག་པོས་བདས་པ་ལྟར།། བགྲོད་བྱེད་ས་ལ་བརྡེག་འཆའ་བཞིན་དུ་དེད།། བྲེད་ཤ་ཐོན་པའི་ཕྱི་མིག་བགྲད་བཞིན་དུ། །ལྷམ་དང་བཅས་པར་དམར་ནག་འདྲེས་མའི་ཆུར།། ཚོམ་མེད་བརྒལ་ཚེ་བར་སྣང་ལེགས་བྲིས་བུའི།། བཞད་གད་དབྱར་དུས་འབྲུག་སྒྲའི་ཟོལ་གྱིས་བྱུང༌། །མཛོད་གཉེར་ལས་ཚན་སོ་སོར་མ་དམིགས་པས།། གང་གང་དགའ་བ་དེ་དེས་རེས་མོས་སུ།།གཏོང་བའི་ཕྱག་རིང་སྣ་ཞགས་ལྟར་རྐྱོང་བས།། བྱིན་ཟས་ནམ་མཁའ་མཛོད་ལ་སྐྱེངས་པ་སྟེར།། དེ་སྐད་གང་འོས་གཏམ་གྱི་མེ་ཏོག་ནི།། ལྷུགས་པར་བཀྲམ་ན་རབ་དགེའི་ཕོ་ཉ་བ།། ཁྱོད་ལ་བཟང་དགུའི་ཟས་སྣ་སྟོང་ལྡན་པས།། རྣམ་པར་དགེས་པའི་དགའ་སྟོན་ཅི་ཡང་འགྱེད།། ལེགས་བཤད་སྨྲ་བའི་ལྕེ་རྩེ་གློག་ལྟར་རྣམ་པར་འགྱུ་ཞིང་མགྲིན་པའི་ཕུག་དག་རིག་པའི་དབྱངས་ཀྱི་ང་རོ་འཛིན། མཁས་ལས་མཁས་པའི་ཟུར་ཕུད་ལ་ནི་རྐང་སྟེགས་རབ་འཆའ་རྣ་བར་སྔོན་མེད་ཨུཏྤལ་རྒྱན་བྱིན་རྩེ་དགས་འཁྲིད།། མ་ཁོལ་དབྱངས་དང་ཆོས་དབང་གྲགས་པའི་ངག་རིག་གཅིག་ཏུ་འདྲེས་པ་མིན་ནམ་ཉམས་ཀྱིས་འཕགས་པའི་ལང་ཚོ་འབར།། དུས་ཀྱི་བསོད་ནམས་ཟོང་གིས་ཁུག་མིན་ཀུན་མཁྱེན་ཇི་བཞིན་དཔག་ཡས་མཐུ་ལས་སྨྲ་བའི་ཉི་མ་གཅིག་པུར་གྲུབ། །མཇུག་རྗེས་ནས་མཐུད་རྒྱུ། །