ཞང་ཞུང་ཡུལ་དུ་རྒྱལ་བསྟན་དར་ཚུལ།

ཡོངས་འཛིན་རིན་པོ་ཆེས་མཛད་པའི་འབེལ་གཏམ་ལུང་གི་སྙིང་པོ་ལས་དྲངས།

ཡུལ་དེར་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པའི་ཚུལ་ཡང་། དང་པོ་རྣམ་པར་དག་པ་འདུལ་བའི་བརྒྱུད་རིམ་ནི། སྟོན་པ་ཁྲི་གཙུག་རྒྱལ་བ། མུ་ཆོ་ལྡེམ་དྲུག དམུ་ཙ་ཏྲ་ཧེ། གཙུག་སྲས་རྨ་བོ། ཁྲི་ལྡེ་གུང་གྲགས། ཁྲི་ལྡེ་འོད་པོ། ལྷང་ལྷང་གཙུག་ཕུད། ཐང་བ་ཡིད་རིང་། ཐུགས་དཀར་ཡེ་ཤེས། གུ་རུམ་ཡེ་ཤེས། འོད་ལྷ་གསལ་འབར། རྫུ་འཕྲུལ་ཡེ་ཤེས་དང་བཅས་པ་འདི་རྣམས་སྟག་གཟིག་གི་མཁན་རྒྱུད་དོ། །ཞང་ཞུང་པ་ནེ་གུ། ༼དེང་དུས་ཁུ་ནུའི་སྐད་ལ་ནེ་གི་ཞེས་པ་དང་དོན་གཅིག་གམ་སྙམ།༽གེ་ཁོད་དཔལ་བྱ་བས་མཁན་ཆེན་རྫུ་འཕྲུལ་ཡེ་ཤེས་ལས་བསྙེན་པ་རྫོགས་ནས་སྤོས་རི་ངད་ལྡན་གྱི་ཤར་ཕྱོགས་སུ་བཞུགས། དེའི་མཁན་བུ་གཡུང་དྲུང་ཚུལ་ཁྲིམས་ནི། ཞང་ཞུང་སྤོས་རི་ངད་ལྡན་གྱི་ཤར་ཕྱོགས་ཤེལ་གྱི་བྲག་དཀར་རྩེ་རྫོང་དུ། གཡུང་དྲུང་ལྷ་རྩེའི་གསས་ཁང་བཞེངས་ཏེ། གནས་སྡེ་དང་མཁས་གྲུབ་དུ་མའི་འཁོར་དང་བཅས་ཏེ་བཞུགས། དེའི་མཁན་བུ་གཙུག་ཕུད་ཚུལ་ཁྲིམས་ཀྱིས་སྲོམ་པོ་དཔལ་གྱི་རི་ལ། གཡུང་དྲུང་བརྩེགས་པའི་འདུ་གནས་གསས་ཁང་བཞེངས་ཏེ། ཞང་ཞུང་ཁྲི་སྡེ་ལ་འདུ་གནས་ཀྱིས་ཁྱབ་པར་༼སྟོད་ཀྱི་མཁན་རྒྱུད་༽མཛད། དེ་རྣམས་ཞང་ཞུང་རྒྱལ་པོ་བྱ་རུ་ཅན་རྣམས་ཀྱིས་ཡོན་བདག་བྱས་ཏེ་ཞབས་ནས་བཏེག་གོ །བྱེ་མ་གཡུང་དྲུང་གི་ཉེ་སྐོར་བཀྲག་གི་ན་མ་དམར་ལྡིངས་སུ་སྔར་ལི་ངུར་ལྷ་རྩེ་ཞེས་པ་ཆགས་པའི་ཤུལ་གསལ་བར་ཡོད་ཅིང་། གཞན་ཡང་འདུ་གནས་འཐོར་ཤུལ་དང་། བྲག་ཕུག་སོགས་ལ་བརྟེན་ནས་ཆགས་ཤུལ་བརྟགས་གཞིག་བྱས་ན་མང་ངོ་། །
གཞན་ཡང་གསང་སྔགས་དང་སེམས་སྡེའི་བོན་རྣམས་ཀྱང་། ཞང་ཞུང་གི་ཡུལ་དུ་དར་ཞིང་རྒྱས་པ་ཡོད་ཅིང་། གསང་སྔགས་ཀྱང་ཞང་ཞུང་མེ་རི་དང་། གེ་ཁོད་བདུད་འདུལ་གསང་བ་དྲག་ཆེན་སྤྱི་སྤུངས་བསྒྲགས་པ་སྐོར་གསུམ་སོགས་ཀྱི་བརྒྱུད་རིམ་ལ་བལྟས་ན་གསལ་ལོ། །སེམས་སྡེ་ཡང་། སེམས་སྨད་སྡེ་དགུ། བསྒྲགས་གསུམ་བཅས་དར་ཡང་། ཁྱད་པར་དུ་ཞང་ཞུང་སྙན་རྒྱུད་ཀྱི་བོན་ལ་སྤྱད་དེ་འཇའ་ལུས་འཕོ་བ་ཆེན་པོའི་སྐུར་བརྙེས་པ་བར་མ་ཆད་པ་ཉི་ཤུ་རྩ་བཞི་ཚེ་སྤུངས་ཟླ་བ་རྒྱལ་མཚན་ཡན་ཆད་དུ་བྱུང་ཞིང་། དེའི་སློབ་མ་རྗེ་ཏ་པི་སྲི་ཙ། དེའི་སློབ་མ་གྱེར་སྤུངས་སྣང་བཞེར་ལོད་པོ་ཡིན་ཞིང་། གྱེར་སྤུངས་ཆེན་པོ་ནི་བོད་རྒྱལ་ཁྲི་སྲོང་ལྡེ་བཙན་གྱིས་ཞང་ཞུང་རྒྱལ་པོ་ལིག་མི་རྐྱ་བཀྲོངས་དུས་ཞང་ཞུང་གི་ཡུལ་དྭ་རོག་མཚོའི་དོ་རུ་བཞུགས་ཡོད་ཅིང་། ཞང་རྒྱལ་གྱི་བཙུན་མོ་ཁྱུང་བཟའ་མཚོ་རྒྱལ་གྱིས་གྱེར་སྤུངས་ལ་བོད་རྒྱལ་ལ་བརྣག་པ་མཛད་པར་ཞུས་པས། གྱེར་སྤུངས་ཀྱི་བཙོ་ཡིས་བོད་རྒྱལ་བསྡིགས་པས་བོད་རྒྱལ་གྱིས་གྱེར་སྤུངས་ཀྱི་ཅི་བགོས་མཉན་པའི་ཆད་བྱས་སོ། །ཞང་རྒྱལ་བཀྲོངས་པའི་སྟང་ཕུལ། གྱེར་སྤུངས་ཀྱི་ཐུགས་དམ་བོན་རྣམས་མི་བསྣུབ་བཞག་པར་ཁས་བླངས་སོ། །དེའི་དྲིན་ལ་བརྟེན་ནས་ད་ལྟ་ཞང་ཞུང་སྙན་རྒྱུད་དང་། མེ་རི་བཀའ་མ་སོགས་གཏེར་དུ་མ་སོང་བ་མང་ངོ་། །