མདུན་ངོས། » གསར་རྩོམ། » གནའ་རྩོམ། » རོང་སྟོན་ཤཱཀྱ་རྒྱལ་མཚན་གྱི་གསུང་བོན་གྱི་མཁས་གྲུབ་གསུམ་ལ་བསྟོད་པ།

རོང་སྟོན་ཤཱཀྱ་རྒྱལ་མཚན་གྱི་གསུང་བོན་གྱི་མཁས་གྲུབ་གསུམ་ལ་བསྟོད་པ།


རོང་སྟོན་ཤཱཀྱ་རྒྱལ་མཚན་གྱི་གསུང་བོན་གྱི་མཁས་གྲུབ་གསུམ་ལ་བསྟོད་པ། 

དམ་པ་རི་ཁྲོད་པ་ལ་བསྟོད་པ་ལྷའི་རྔ་བོ་ཆེ་ཞེས་བྱ་བ།
བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

དགེ་ཚོགས་ཉི་མའི་དཀྱིལ་འཁོར་རབ་རྒྱས་པས། །
བདག་བློའི་མ་རིག་མུན་པ་སེལ་བ་དང་། །
མཐའ་ཡས་གདུལ་བྱ་པདྨོའི་གཉེན་གྱུར་ཅིང་། །
ཏིང་འཛིན་སྦྲང་རྩི་ཡོངས་སུ་འཕེལ་བའི་རྒྱུ། །

 

དམ་པ་རྣམས་ཀྱིས་བསྟོད་པའི་སྒྲ་སྒྲོགས་ཤིང་། །
རི་བོའི་དབེན་གནས་ཚད་མེད་ཏིང་འཛིན་བསྒོམ། །
གངས་རིའི་ཁྲོད་ན་རྣལ་འབྱོར་མཆོག་གྱུར་པ། །
ཐར་འདོད་རྣམས་ལ་ཕན་པའི་དགའ་སྟོན་འགྱེད། །

 

མི་རྟོག་ཏིང་འཛིན་ཕུལ་བྱུང་རབ་མཉེས་ཤིང་། །
བྱིན་རླབས་འོད་ཀྱིས་འགྲོ་ཀུན་སྨིན་མཛད་པ། །
དམ་པ་རྣམས་ཀྱི་བསྟོད་འོས་ཁྱོད་ལ་ནི། །
རྣམ་པ་ཀུན་ཏུ་དད་པས་ཕྱག་འཚལ་ལོ། །

 

དེ་ལྟར་བསྟོད་པའི་དགེ་བ་ལས། །
འགྲོ་ཀུན་ཀུན་མཁྱེན་མྱུར་ཐོབ་ཤོག །
ཅེས་རོང་སྟོན་ཆེན་པོས་དཔལ་ནཱ་ལེནྡྲར་སྦྱར་བའོ།།  ༈ །།

 

མཁས་པ་དཔལ་ཆེན་ལ་བསྟོད་པ་དཔལ་གྱི་འབྱུང་གནས་ཞེས་བྱ་བ།
བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

གསུང་རབ་མང་དུ་ཐོས་པའི་སྨྲ་བ་པ། །
རིག་གནས་ཀུན་ལ་མི་འཇིགས་སྤོབས་པ་ཅན། །
ཉི་མའི་འོད་ཀྱི་སྐར་མའི་ཚོགས་བཞིན་དུ། །
རིག་པའི་སྟོབས་ཀྱི་ཕས་རྒོལ་ཟིལ་གྱིས་གནོན། །

 

འཆད་པ་ཉི་མའི་འོད་ཀྱིས་གདུལ་བྱ་ཡི། །
བློ་གྲོས་པདྨོ་རབ་ཏུ་རྒྱས་པ་དང་། །
སྐྱོན་བྲལ་རྩོམ་པ་མཁས་པ་དགའ་བྱེད་ཅིང་། །
དུས་རྣམས་རྟག་ཏུ་དགེ་བའི་རང་བཞིན་ཅན། །

 

སྤོབས་པ་མི་ཟད་མཁས་པའི་མཆོག་གྱུར་པ། །
བསྟན་པ་ཉིན་མོར་བྱེད་པའི་སྣང་བ་ཅན། །
ཀུན་ཏུ་རྣམ་པར་རྒྱལ་བའི་སྟོབས་མངའ་བ། །
འགྲོ་བའི་དེད་དཔོན་ཁྱོད་ལ་གུས་པས་འདུད། །

 

མཁས་པ་ཕུལ་ཕྱིན་ཁྱོད་ལ་རབ་བསྟོད་པ། །
མཁས་པའི་གོ་འཕང་མཆོག་ཏུ་བརྙེས་གྱུར་ཅིག །
ཅེས་རོང་སྟོན་ཆེན་པོས་ནཱ་ལེནྡྲར་སྦྱར་བའོ།།
བླ་མ་དམ་པ་སྨན་གོང་འདུལ་བ་ལ་བསྟོད་པ་མེ་ཏོག་ཕྲེང་འཛིན་ཞེས་བྱ་བ།
བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

མང་དུ་ཐོས་པའི་གཟི་བརྗིད་ཡལ་འདབ་ཅན། །
ཚད་མེད་ཡོན་ཏན་མེ་ཏོག་རབ་རྒྱས་ཤིང་། །
གསུང་རབ་ཀུན་ལ་མི་འཇིགས་འབྲས་བུ་ཅན། །
ཡང་དག་རིག་པའི་འོད་ཟེར་ཕྱོགས་བཅུར་འཕྲོ། །

 

ཕས་ཀྱི་རྒོལ་བའི་དཔུང་ཚོགས་ཟིལ་གྱིས་གནོན། །
རྩོམ་པ་སྐྱོན་མེད་མཁས་པའི་ཡིད་འཕྲོག་ཅིང་། །
འཆད་པ་ངག་གི་ཟེར་གྱིས་མུན་པ་སེལ། །
མཁས་བཙུན་འགྲན་ཟླ་བྲལ་བའི་ཆོས་ཀྱི་རྗེ། །

 

སྤྱོད་པ་དྲི་མེད་མཛེས་པའི་རྒྱན་དང་ལྡན། །
ངག་གི་སྒོ་ནས་བཀྲ་ཤིས་ཕུན་ཚོགས་པ། །
ལྷ་ཡི་ཡིད་འོང་མེ་ཏོག་ཆར་པ་ཕབ། །
འོད་ཟེར་སྤྲོས་པའི་མཆོད་རྟེན་མངོན་སུམ་མཐོང་། །

 

གང་གི་ཞབས་པད་གུས་པས་བསྟེན་པ་དག །
ཐར་ལམ་མངོན་ཕྱོགས་སྐལ་བ་ཅན་དུ་གྱུར། །
དོན་གཉིས་དབང་འབྱོར་དཔལ་ལྡན་བླ་མའི་ཞབས། །
གཙུག་གི་ནོར་བུས་གུས་པས་མཆོད་པར་བགྱི། །

 

འདི་ལ་དགེ་བ་གང་ཞིག་ཐོབ་པ་ཡིས། །
ཐམས་ཅད་མཁྱེན་པའི་གོ་འཕང་ཐོབ་གྱུར་ཅིག །
ཅེས་རོང་སྟོན་ཆེན་པོས་དཔལ་ནཱ་ལེནྡྲའི་དགོན་པར་སྦྱར་བའོ།།  ༈ །