མདུན་ངོས། » གངས་ལྗོང

གངས་ལྗོང

རང་རྩོམ་དཔེ་དེབ།

རང་རྩོམ་དཔེ་དེབ།


  བོད་རིག་པའི་ཞིབ་འཇུག་མཁའ་ལྡིང་གཤོག་ཟུང་། དེབ་འདི་ནི་༢༠༠༩ལོར་བལ་ཡུལ་Vajra Publicationsནས་དཔར་དུ་བསྐྲུན་པ་ཞིག་རེད། འདི་ལ་ལེ་ཚན་གསུམ་ཡོད། ལེ་ཚན་དང་པོ་ནི། བོན་གྱི་དཔེ་གཞུང་ཁག་ཅིག་ལ་དྭོགས་སློང་བྱུང་བའི་སྐོར་བརྗོད་པ། བོན་གྱི་ལྟ་སྤྱོད་སྐོར་ལ་ཡོངས་གྲགས་ལྟ་ཚུལ་དང་། སྟོན་པ་གཤེན་རབ་ཀྱི་གདུང་རབས་དང་འཁྲུངས་ལོའི་སྐོར་གྱི་རྙོགས་འཛིང་སྐོར། འོལ་མོ་ལུང་རིང་ས་གནས་གང་དུ་ཡོད་དམ་དཔྱད་པ། བོན་དང་འཇང་རིགས་གཏོ་པའི་ཆོས་ལུགས་དང་འདྲ་མཚུངས་ཇི་ཡོད་དམ། བོད་དུ་བོན་དང་འབྲེལ་བའི་རིག་གནས་གང་དར་བ་ཡིན་ནམ། བོན་གྱི་ཤིང་རྟའི་སྲོལ་འབྱེད་ཁག་དང་འབྲེལ་བའི་སྐོར་དང་། བོན་གྱི་འདུལ་བའི་ལོ་རྒྱུས་སྐོར། བོན་ཆོས་རིས་མེད་བླ་ཆེན་དགོངས་པ་རབ་གསལ་ངོས་འཛིོན་བྱེད་སྟངས་ཀྱི་རྙོག་འཛིང་། ནུབ་ཕྱོགས་སུ་བོན་ཞིབ་འཇུག་བྱུང་ཚུལ་སྐོར་བཅས་ཀྱི་ལེ་ཚན་བཅས་ཀྱི་བརྗོད་གཞིག་ཁག་ཅིག་ཡིན། ལེ་ཚན་གཉིས་པ་ནི། བོད་མི་རིགས་ཀྱི་རུས་རྒྱུད་ཚན་ཁག་སྐོར་ལ་དཔྱད་པ་སྟེ། འདི་ལ་བོད་མི་རིགས་ཀྱི་ཐོག་མའི་འབྱུང་ཁུངས་གནའ་བོའི་ཡིག་རྙིང་སྐོར་ཞིག་ལ་དཔྱད་སྡུར་བྱས་ཞིབ་འཇུག་བྱས་ཏེ་དང་པོ་སྤྲ་རིགས་ལས་མིའི་འགྲོ་བ་གྲོལ་བར་འདོད་པའི་ལུགས་དང་། གཉིས་པ་སྲིད་པའི་ཀློང་སྒོང་ལས་མིའི་འགྲོ་བ་གྲོལ་བར་འདོད་པའི་ལུགས་དང་།…
ཡུལ་གངས་ཅན་པའི་བརྡ་སྤྲོད་པའི་བསྟན་བཅོས་ཀུན་ཏུ་བཟང་པོའི་མཆོད་སྤྲིན་མཁས་པ་དགའ་སྐྱེད།

ཡུལ་གངས་ཅན་པའི་བརྡ་སྤྲོད་པའི་བསྟན་བཅོས་ཀུན་ཏུ་བཟང་པོའི་མཆོད་སྤྲིན་མཁས་པ་དགའ་སྐྱེད།


དེབ་འདི་ནི་༢༠༡༡ལོར་རྩེ་དྲུག་དྲི་མེད་ཤེལ་བྲག་གླིང་གི་བཤད་སྒྲུབ་འདུས་སྡེས་ཁྲིན་ཏུ་ནས་དཔར་དུ་བསྐྲུན་པ་ཞིག་རེད། དེབ་འདི་ནི་བོད་ཀྱི་བརྡ་སྤྲོད་ཀྱི་འགྲེལ་བཤད་ཅིག་ཡིན་ཞིང་། ཆོས་བརྒྱུད་རིས་མེད་ཀྱི་བརྡ་སྤྲོད་མཁས་ཅན་མང་པོའི་འགྲེལ་བཤད་ལ་གོ་སྡུར་དང་ཞིབ་འཇུག དེ་བཞིན་ལེགས་ཆ་བླང་ཡོད་པ་མ་ཟད། དོན་གནད་ཐོག་ལ་དྭོགས་སློང་དང་རང་ལུགས་ཀྱི་མཐའ་མའི་སྡོམ་ཚིག་བཞག་སྟེ་བྲིས་པའི་བོད་ཀྱི་བརྡ་སྤྲོད་སུམ་ཅུ་པ་དང་རྟགས་ཀྱི་འཇུག་པའི་དོན་གནད་ཁ་ཚང་བའི་དཔེ་དེབ་ཅིག་ཏུ་གྱུར། རྩེ་དྲུག་དགོན་གྱི་བཤད་སྒྲུབ་འདུས་སྡེའི་དགོས་འདུན་ལྟར་དཔར་ཐེངས་དང་པོར་ཚོད་ལྟའི་ཚུལ་དུ་དཔར་སྐྲུན་བྱས་པ་ཞིག་ཡིན་ལ། དཔར་ཐེངས་གཉིས་པའི་སྐབས་སུ་རྩོམ་པ་པོ་རང་ནས་ལེགས་བཅོས་ཀྱི་འཆར་གཞིའི་ཐོག་བོད་ཀྱི་སྐད་ཡིག་ལ་ཞབས་འདེགས་སུ་འགྱུར་བའི་རེ་བ་འཆང་བཞིན་ཡོད། །
གངས་རིའི་བརྩེ་དུང་།

གངས་རིའི་བརྩེ་དུང་།


དེབ་འདི་ནི་༢༠༠༥ལོར་རྒྱ་གར་ལྷོ་ཕྱོགས་Guptha Offset printers, Mysore Karnataka South of India ནས་དཔར་དུ་བསྐྲུན་པ་ཞིག་རེད། འདི་ལ་ཚིགས་བཅད་སྡེ་ཚན་དང་ཚིག་ལྷུགས་སྡེ་ཚན་གཉིས་ཡོད་པ་དང་། ཕལ་ཆེར་ནི་སྙན་ངག་རྩོམ་རིག་སྡེ་ཚན་དུ་བསྡུ་ཆོག་ལ། སྙན་ངག་དོན་རྒྱན་སོ་ལྔའི་དཔེ་བརྗོད་ཆ་ཚང་ཞིག་ཀྱང་དེར་བསྡུས་ཡོད་པ་རེད། འགའ་ཞིག་དོན་བརྗོད་ལྷུག་རྩོམ་ཡང་ཡོད། སྙན་ངག་ཕལ་ཆེར་ནི་སྲོལ་རྒྱུན་སྙན་ངག་ཡིན་ལ། ཉུང་ཤས་དེང་རབས་སྙན་ངག་ཀྱང་ཡོད་པ་རེད། གཞན་ཡང་མི་སྣའི་ལོ་རྒྱུས་ཀྱང་ཡོད་པ་རེད། དེར་མ་ཟད་དེའི་ནང་དུ་རྩོམ་རིག་གི་ཤེས་བྱ་སྐོར་གྱི་ལེ་ཚན་ཡང་ཡོད་ལ་མདོར་ན་དེབ་འདིར་ཤོག་ངོས་༣༩༦ལས་གྲུབ་པའི་དེབ་ཅིག་ཡིན་པ་རེད། །
ཞུགས་གནས་ཀྱི་བརྗེད་བྱང་དང་མཚན་ཉིད་གསུམ་གྱི་རྣམ་གཞག་སྐོར།

ཞུགས་གནས་ཀྱི་བརྗེད་བྱང་དང་མཚན་ཉིད་གསུམ་གྱི་རྣམ་གཞག་སྐོར།


    དེབ་འདི་ནི་༢༠༡༡ལོར་རྩེ་དྲུག་དྲི་མེད་ཤེལ་བྲག་གླིང་གི་བཤད་སྒྲུབ་འདུས་སྡེས་ཁྲིན་ཏུ་ནས་དཔར་དུ་བསྐྲུན་པ་ཞིག་རེད། འདི་ནི་ཕར་ཕྱིན་སྐབས་ཀྱི་དཀའ་གནས་ཁག་ཅིག་ཟུར་དུ་བཏོན་ནས་དོན་གནད་ཕྲ་མོ་ཁག་ཅིག་ལ་འགྲེལ་བརྗོད་བྱས་པའི་དཔེ་ཞིག་རེད། དེབ་འདིར་ཕར་ཕྱིན་གྱི་ཡན་ལག་ཞུགས་པ་དང་གནས་པའི་འཕགས་པའི་གང་ཟག་གི་དབྱེ་བ་རྒྱས་པར་བརྗོད་དེ་དགག་བཞག་སྤོང་གསུམ་གྱི་མཚན་ཉིད་རིག་པའི་རྩོམ་འགྲོས་ཀྱི་ཐོག་ནས་བརྩམས་པའི་ལེ་ཚན་གཅིག་དང་། ཐུགས་རྗེ་སེམས་དཔའ་འམ་སེམས་ཙམ་པའི་ལྟ་གྲུབ་མཚན་ཉིད་གསུམ་གྱི་ཐོག་ནས་རྣམ་གཞག་བྱས་པའི་སྐོར་ལུང་རིགས་དུ་མས་གསལ་ཁ་བཏོད་དེ་དཀའ་བའི་གནས་དུ་མ་ཞིག་གོ་ཡུལ་དུ་འཆར་བ་ལ་སྨན་པའི་དྭོགས་སློང་དང་། རང་གི་ལྟ་ཚུལ་སྟོན་ཏེ་གསར་དུ་བརྩམས་པའི་ལེ་ཚན་ཞིག དེ་མིན་རང་རིག་སྐོར་གྱི་རྩོམ་ཐུང་གཅིག་བཅས་ཕྱོགས་བསྒྲིགས་བྱས་པ་ཞིག་ཡིན་ཞིང་། འདི་ནི་བསམ་གྱིས་མི་ཁྱབ་པའི་དགེ་རྒན་ཆེན་མོ་དུ་མའི་བཀའ་དྲིན་དང་། རང་གིས་འབད་བརྩོན་ཡུན་རིང་བསྟེན་པའི་ངལ་བ་ཁྱད་བསད་ཀྱི་འབྲས་བུ་ཞིག་ལས་གྲུབ་པའི་ཕུང་པོ་ཞིག་ཀྱང་རེད། །
གངས་ལྗོངས་དྲན་པའི་གླུ་དབྱངས།

གངས་ལྗོངས་དྲན་པའི་གླུ་དབྱངས།


  དེབ་འདི་ནི་༡༩༩༦ལོར་Mysore,Kanataka South India་ནས་དཔར་དུ་བསྐྲུན་པ་ཞིག་རེད། དེབ་འདི་ནི་རང་གིས་མཚན་ཉིད་སློབ་སྦྱོང་བྱེད་པའི་ཞོར་དུ་༡༩༩༤ནས་༡༩༩༦ལོའི་བར་དུ་བྲིས་པའི་སྲོལ་རྒྱུན་སྙན་ཚིག་རིགས་ཕྱོགས་བསྒྲིགས་བྱས་པའི་དཔེ་དེབ་ཅིག་རེད། དེབ་འདི་ནི་རང་གི་དཔེ་དེབ་འདོན་ཐེངས་དང་པོ་དེ་ཡིན་པས་དཔར་སྐྲུན་གྱི་ཆུ་ཚད་མཐོན་པོ་མིན་ཡང་། རང་གི་རེ་བ་ལས་འགོངས་པ་ཞིག་ལ། བོད་རིགས་སྲོལ་རྒྱུན་སྙན་ངག་གི་གནས་ཚད་མཐོན་པོ་ཡོད་པའི་ན་གཞོན་རྩོམ་པ་པོ་ཁག་ཅིག་གིས་གདེང་འཇོག་ཡག་པོ་ཐོབ། དེ་ལ་བརྟེན་ནས་རང་གིས་རྩོམ་འབྲི་མུ་མཐུད་བྱེད་པའི་རྨང་གཞིའི་བསམ་བློའང་རྙེད། དེབ་འདིར་གཞན་ཡུལ་གྱི་དཀའ་སྡུག་ཁག་ཅིག་གིས་མཚོན་འཆར་སྣང་རིགས་དང་། བསྟོད་ཚིག་རིགས། དེ་མིན་རང་ཡུལ་གྱི་འཐུས་ཤོར་ཁག་ཅིག་བཅོས་སྒྱུར་བྱས་ཏེ་ཡར་རྒྱས་ལ་ཁ་ཕྱོགས་དགོས་པའི་སྐུལ་འདེད་ཀྱི་རྣམ་པ་དོད་པའི་རྩོམ་ཐུང་ལྷག་བསམ་རྣམ་དག་གིས་འཚང་འབྱིན་བྱས་པའི་རྩོམ་ཡིག་ཀྱང་འདུས་ཡོད། །  
གངས་ཐིགས།

གངས་ཐིགས།


  དེབ་འདི་ནི་༢༠༡༡ལོར་Vajra publicationབལ་ཡུལ་ནས་དཔར་དུ་བསྐྲུན་པ་ཞིག་ཡིན། །འདི་ནི་ཉེ་དུས་སུ་བྲིས་པའི་རྩོམ་ཡིག་ཐོར་བུ་རིགས་ཕྱོགས་བསྒྲིགས་བྱས་པ་ཞིག་ཡིན་ཞིང་། དེབ་འདིའི་ནང་རྩོམ་ཐུང་བཅུ་གྲངས་ཙམ་བསྡུས་ཡོད་པ་རེད། དེ་དག་ལས། མཆོད་ཚིག་སྐལ་བཟང་དགའ་སྐྱེད། ཚིགས་སུ་བཅད་པ་ཏམ་བུ་རའི་སྒྲ་དབྱངས། ལྷ་མིན་གཡུལ་ལས་རྒྱལ་བའི་རྔ་སྒྲ། གཤེན་བསྟན་དར་རྒྱས་གླིང་། གྲགས་ཅན་སྙན་ངག་པ་ཐེ་ཀོར་རྗེས་སུ་དྲན་པ།ཞེས་པའི་རྩོམ་ཐུང་དེ་དག་བསྟོད་པ་ཚིགས་སུ་བཅད་པ་སྲོལ་རྒྱུན་སྙན་ངག་གི་ལུགས་སུ་བྲིས་པ་ཞིག་ཡིན་པ་དང་། བརྙན་སྡེར་ནང་གི་ཆ་འཕྲིན་ཐུང་ངུ་། ཞེས་པ་རང་གཞན་ཤེས་ཡོན་གྱི་གོ་རྟོགས་གོང་མཐོར་ཡོང་བའི་ཆ་རྐྱེན་དུ་དམིགས་ནས་བྲིས་པ་ཞིག་ཡིན། ལེ་ཚན་ཐུང་ངུ་གཞན་རྣམས་ནི་གཞན་གྱིས་སྐུལ་མ་བྱས་པའི་གཞས་ཚིག་སོགས་ལས་གྲུབ་པའི་དེབ་ཅིག་རེད། །
མཁའ་ཀློང་གསང་མདོས་ཀྱི་སྒོ་ནས་བོད་ཀྱི་མདོས་གླུད་ལ་དཔྱད་པའི་གཏམ་སྐྱ་རེངས་གསར་པ།

མཁའ་ཀློང་གསང་མདོས་ཀྱི་སྒོ་ནས་བོད་ཀྱི་མདོས་གླུད་ལ་དཔྱད་པའི་གཏམ་སྐྱ་རེངས་གསར་པ།


  དེབ་འདི་ནི་སྤྱི་ལོ་༢༠༠༣ལོར་བྲིས་པ་ཞིག་ཡིན། དེ་སྔོན་དཔར་དུ་བསྐྲུན་པའི་གོ་སྐབས་མ་བྱུང་བས་རང་གར་ལུས་ཡོད། བརྗོད་གཞི་ནི་གནའ་སྔ་མོའི་བོན་ལུགས་པ་རྣམས་ཀྱིས་གཏོ་ཆོག་མདོས་ཞེས་པའི་ཆོ་ག་དེ་ཇི་ལྟར་སྤེལ་གྱིན་ཡོད་པ་དང་ཆོི་ག་དེའི་ཤན་ཞུགས་ཐེབས་པའི་མི་རྣམས་ཀྱི་ནང་སེམས་ཀྱི་འདུ་ཤེས་དང་། སྤྱོད་ལམ། དེ་བཞིན་དད་མོས་བྱེད་ཚུལ་གྱི་རྣམ་པ་དང་། ཆོ་ག་མཁན་དེ་དག་གིས་བྱེད་སྒོ་དེར་ཇི་ལྟར་འཇུག་པའི་ཚུལ་དང་། ཆོ་གའི་ནང་དོན་གྱི་ལྷ་དང་འདྲེའི་ཕན་གནོད་ཀྱི་འདུ་ཤེས། དེས་བོད་ཀྱི་དམངས་ཁྲོད་དུ་བག་ཆགས་གཏིང་ཟབ་ཀྱི་རང་བཞིན་ཇི་ལྟར་མངོན་པ་དང་། ད་ལྟའི་བར་ཇི་ལྟར་རྒྱུན་འཛིན་བྱས་ཡོད་ཚུལ་རྒྱས་པར་བརྗོད་པའི་དཔྱད་རྩོམ་རྒྱས་པ་ཞིག་ཡིན་པས་རྗེས་སུ་དཔར་སྐྲུན་ཞུ་ཆོག་ཏུ་ཡོད་པའི་མ་ཡིག་ཅིག་རེད། ། 
བསྡུས་རྟགས་དང་མཚན་ཉིད་གསུམ་གྱི་རྣམ་གཞག་བཅས་ཕྱོགས་སྒྲིག་བཞུགས་སོ།།

བསྡུས་རྟགས་དང་མཚན་ཉིད་གསུམ་གྱི་རྣམ་གཞག་བཅས་ཕྱོགས་སྒྲིག་བཞུགས་སོ།།


  དེབ་འདི་ནི་རིགས་པ་སྨྲ་བ་ཡོན་ཏན་རྒྱ་མཚོས་མཛད་པའི་ཐུན་མོང་བསྡུས་གྲྭའི་ངོས་འཛིན་བློ་གསལ་ལྐུགས་ཁ་འབྱེད་པའི་བདུད་རྩི་ཞེས་པ་དེ་དཔེ་དཀོན་ཞིག་ཏུ་གྱུར་པར་སོང་དེབ་འདིའི་རྒྱུ་ཆ་གཙོ་བོ་དང་། དེ་དང་ཀློག་པ་པོ་རྣམས་ལ་སྟབས་བདེའི་ཆེད་དུ་ཁོང་གིས་བརྩམས་པའི་གཏན་ཚིགས་རིག་པའི་རྣམ་གཞག་བློ་སྒྲོམ་སྒོ་བརྒྱ་འབྱེད་པའི་ལྡེ་མིག་དང་། ༧སྐྱབས་རྗེ་ཡོངས་འཛིན་རིན་པོ་ཆེའི་སློབ་སྟོན་གནང་བ་ལྟར། ༧སྐྱབས་རྗེ་ཡོངས་འཛིན་སངས་རྒྱས་བསྟན་འཛིན་གྱིས་མཛད་པའི་ཐུགས་རྗེ་སེམས་དཔའི་ལུགས་ཀྱི་མཚན་ཉིད་གསུམ་གྱི་རྣམ་གཞག་ག་པུར་ཐིགས་པ་བཅས་ཕྱོགས་བསྒྲིགས་ཞུ་དག་དཔར་དུ་བསྐྲུན་པ་ཞིག་རེད། འདི་ནི་རྒྱལ་ཤོད་བླ་ཆུང་གཡུང་དྲུང་འཇིགས་མེད་ཀྱིས་འགྲོ་གྲོན་བཏང་ནས་སྤྱི་ལོ་༢༠༠༧ལོར་Vajra Publication in Nepal བལ་ཡུལ་དུ་དཔར་སྐྲུན་བྱས་པའི་དཔེ་དེབ་ཅིག་རེད། །
དགའ་ལྡན་ལྷ་བརྒྱ་རྒྱས་བསྡུས་ཀྱི་བཤད་པ།

དགའ་ལྡན་ལྷ་བརྒྱ་རྒྱས་བསྡུས་ཀྱི་བཤད་པ།


  འདི་ནི་༧སྐྱབས་རྗེ་ཆོས་ལྡན་རིན་པོ་ཆེའི་བཀའ་ཁྲིད་ཐད་ཀར་ཡིག་ཐོག་ཕབ་སྒྱུར་བྱས་པ་ཞིག་རེད། དཔེ་ཆའི་བརྗོད་དོན་ནི་དགའ་ལྡན་ལྷ་བརྒྱ་མ་ཞེས་པའི་བླ་མའི་རྣལ་འབྱོར་གྱི་ཉམས་ལེན་ཞིག་ཡིན་ལ། ཉམས་ལེན་དེ་ནི་རྗེ་བླ་མ་ཙོང་ཁ་པ་ཞལ་བཞུགས་དུས་ནས་གསང་སྟབས་ཀྱིས་འགའ་ཞིག་ལ་གནང་བ་བྱུང་ཡོད་པར་གསུངས་ལ། རྗེས་སུ་ཡིག་ཐོག་འགོད་པ་པོ་ནི་རྒྱལ་བ་དགེ་འདུན་གྲུབ་ཀྱི་སློབ་མ་འདུལ་ནག་པ་དཔལ་ལྡན་བཟང་པོ་ཁོང་ཡིན་པར་གསལ། དེ་ཡང་བཀའ་ཁྲིད་འདི་བཞིན་ཕྱི་ནང་གི་མི་རིགས་ཀུན་ལ་གོ་བདེ་བ་དང་། ཉམས་མྱོང་གི་ཟབ་གནད་ལྡན་པ། ཞལ་ཤེས་དང་གསུང་རྒྱུན་དམིགས་གསལ་མངའ་བ། དེ་ལ་བརྟེན་ནས་འཇུག་པ་པོ་གང་ཟག་གི་རྒྱུད་ལ་བྱིན་རླབས་ཀྱི་ཚན་ཁ་མྱུར་བ་བཅས་བསྙོིན་མེད་དུ་གྱུར་པས། ཐར་འདོད་ཉམས་ལེན་པ་ཆེས་མང་པོའི་དགོངས་འདུན་སྐོམ་པ་ཆུ་འདོད་ལྟར་གྱུར་པས། བླ་བྲང་གི་ཕྱག་མཛོད་དགེ་བཤེས་ཚེ་བརྟན་དགེ་ལེགས་མཆོག་གི་ལམ་སྟོན་གནང་བ་ལྟར་བཀའ་ཁྲིད་འདི་དག་དཔེ་ཁྲིད་ཀྱི་གསུང་ཐོག་ནས་ཡིག་ཐོག་ཕབ་སྒྱུར་བྱས་ནས་ལས་རོགས་རྣམ་པ་དང་ལྷན་དུ་རྩོམ་སྒྲིག་དང་ཞུ་དག་བགྱིས་ཏེ་སྤྱི་ལོ་༢༠༠༥ལོར་བཀའ་ཁྲིད་གཏེར་མཛོད་འཇམ་དབྱངས་རོལ་པའི་སྡེ་ཚན་གྱིས་རྒྱ་གར་ལྷོ་ཕྱོགས་ནས་དཔར་སྐྲུན་བྱས་པའི་དེབ་ཅིག་རེད། །
བོན་གྱི་བཀའ་འགྱུར་ནང་དུ་བཞུགས་པའི་ཁམས་རྩ་རྣམ་པར་ངེས་པ་ཞེས་པའི་སྟོད་ཆ།

བོན་གྱི་བཀའ་འགྱུར་ནང་དུ་བཞུགས་པའི་ཁམས་རྩ་རྣམ་པར་ངེས་པ་ཞེས་པའི་སྟོད་ཆ།


  ད་ལན་ཁྲི་བརྟན་ནོར་བུ་རྩེ་བཤད་སྒྲུབ་འདུས་སྡེ་སྐབས་བཅོ་ལྔ་པའི་རྒྱུན་ལས་ཁང་ནས་སློབ་གཉེར་བའི་ཤེས་ཡོན་གོང་མཐོར་སྤེལ་བའི་ཆེད་དུ་གལ་ཆེའི་ཡིག་ཆ་གཡུང་དྲུང་བོན་གྱི་བཀའ་འགྱུར་ནང་ཚན་དུ་བཞུགས་པའི་<ཁམས་རྩ་རྣམ་པར་ངེས་པ>ཞེས་པའི་གཞུང་འདི་དཔར་སྐྲུན་ཞུ་དག་གི་ལས་གཞི་ཕྲན་ལ་བཀའ་མངགས་བཅོལ་བ་ལྟར་ལས་དོན་དེ་དུས་ཚོད་དང་འཚམ་པར་ཅི་ནུས་བསྒྲུབས་ཏེ་ད་ལན་དཔེ་དེབ་སྟོད་སྨད་གཉིས་ལེགས་སྤེལ་བྱུང་ཐུབ་པ་ནི་སྤྲོ་བ་བརྟས། འདིའི་གསལ་བཤད་རྗེས་ནས་དགོད་རྒྱུ། །