བོན་གྱི་དཔེ་དཀོན་དཔེ་ཚོགས།
བོན་གྱི་དཔེ་དཀོན་དཔེ་ཚོགས། ཞེས་པའི་དེབ་འདི་ཆེས་གལ་ཆེའི་རང་བཞིན་དང་ལྡན་པའི་དཔེ་ཁག་ཕྱོགས་བསྒྲིགས་ཀྱི་དཔེ་དེབ་ཅིག་རེད། དེ་སྔ་ལག་སོན་མ་བྱུང་བའམ་ཡོད་པར་ཐོས་མཁན་དཀོན་པའི་ལྷོ་གཏེར་ཐེག་དགུའི་རྣམ་གཞག་འདི་དང༌། སྒ་སྟོན་གྱི་དཔེ་ཁག་ཐོར་བུ་གཉིས་པོ་འདིའང་གོ་ཐོས་ཙམ་ཡོད་ཀྱང་སློབ་གཉེར་བ་ཕལ་མོ་ཆེས་མཇལ་ཡུལ་དུ་མ་གྱུར་པ་ཞིག་ཡིན། ལྷོ་གཏེར་ཐེག་དགུའི་དཔེ་འདི་ནི། མདོ་སྨད་རྔ་བ་སྣང་ཞིག་ཕྱོགས་ནས་དགེ་བཤེས་ཞིང་གཤེགས་ཤེས་རབ་ཀུན་གསལ་མཆོག་གིོས་ཕྱག་སོན་བྱུང་། རྩོམ་པ་པོ་སུ་ཡིན་གསལ་ཁ་མ་བྱུང་ནའང༌། དཔེ་འདིར་ཕྱི་རབས་ཀྱི་ཡིག་ཆ་ཁུངས་སུ་མ་དྲངས་ཚུལ་ལ་དཔྱད་ན་ཡིག་རྙིང་ཞིག་ཡིན་པར་ཚོད་དཔག་བྱེད་ཆོག འོན་ཀྱང་དགོངས་མཛོད་རི་ཁྲོད་པའི་སྐོར་གསལ་བས་དུས་རབས་བཅུ་གཅིག་སྔ་རོལ་གྱི་དཔེ་མ་ཡིན་པ་ཁ་ཚོན་གཅོད་ཐུབ། དཔེ་འདི་ནི་ལྷོ་གཏེར་ཐེག་དགུའི་རྣམ་གཞག་གི་སྤྱི་དོན་ཙམ་ཁ་གསལ་གོ་བདེའི་ལམ་ནས་སྟོན་པའི་ཡིག་ཆ་ཞིག་ཏུ་འདུག་པས་གཟིགས་པ་པོ་རྣམས་ལ་ཤིན་ཏུ་སྨན་ངེས་སུ་མཐོང་སྟེ། རྒྱས་བསྡུས་འཚམ་པོ་ཡིན་པ་དང༌། ཚིག་ཉུང་ལ་དོན་འདུས་པའི་ལུང་མང་པོ་དྲངས་འདུག་པའི་ལུང་ཁུངས་ཀྱི་དཔེ་ད་ལྟ་མི་བཞུགས་པའང་ཡོད་སྲིད་སྙམ། སྒ་སྟོན་གྱི་དཔེ་གཉིས་པོ་འདི་ནི། ཁོང་ཉིད་ཀྱི་གསུང་ལས། རང་གཞན་གྱི་གྲུབ་མཐའ་དག་ལ་བློ་གྲོས་ཀྱི་སྣང་བ་ཕྱོགས་མེད་དུ་མཆེད་ཅིང༌། འཆད་རྩོད་རྩོམ་གསུམ་གྱི་དྲི་བསུང་དང་ལྡན་པ་གཤེན་གྱི་བཙུན་པ་ཚུལ་ཁྲིམས་རྒྱལ་མཚན་བྱ་བས་ལེགས་པར་སྦྱར་བ་ཞེས་གསུངས་འདུག་པ་དོན་ལ་དེ་དེ་བཞིན་དུ་གནས་པ་ཞིག་ཡིན་པ་ལྟ་ཅི་སྨྲོས། མི་ལོ་བརྒྱ་ཕྲག་མང་པོའི་གོང་ནས་བརྩམས་པའི་དཔྱད་རྩོམ་འདི་ལྟ་བུ་ནི་དེང་དུས་ཙམ་དུ་མ་ཟད་མ་འོངས་པའི་དུས་རབས་ལ་ཕྱིར་མཆོང་ཐེངས་གཅིག་རྒྱག་པའི་ལེགས་བཤད་རིན་ཐང་བྲལ་བའི་རྩོམ་རིག་གི་བརྒྱ་བྱིན་ཞིག་ཏུ་འདུག་སྙམ། དེབ་འདིར་བསྒྲིགས་པའི་ལེ་ཚན་གསུམ་པོ་ང་ཚོས་སློབ་ཞོར་འབད་བརྩོན་བྱེད་པའི་རྒྱུ་མཚན་ནི། གཞུང་ཆེན་སློབ་གཉེར་བ་དང༌། རིག་གཞུང་ཞིབ་འཇུག་པ་གཉིས་ཀར་དཀོན་ལ་རིན་ཐང་ཆེ་བའི་ཡིག་ཆ་ཉག་གཅིག་གོང་སྨྲས་ལྟར་ལགས་པས་སོ། །བསྟན་པའི་ཤན་འབྱེད་ལེ་ཚན་ནང་དུ་ཁྲི་སྲོང་དང༌། གྲི་གུམ་གཉིས་ཀྱི་ལོ་རྒྱུས་སྐོར་ཅུང་ཟད་འདྲེས་པ་མ་ཟད། ཁྲི་སྲོང་གི་སྲས་རྒྱུད་སྐབས་སུ་ལོ་ངམ་སྐོར་གྱི་ལོ་རྒྱུས་ཐོན་པ་ལྟ་བུ་ཡིག་ནོར་ཡང་བྱུང་འདུག་པས་ཞིབ་དཔྱོད་དགོས་ངེས་ཤིག་རེད་སྙམ། །དེབ་འདི་ནི་རང་ཉིད་ཀྱིས་འོས་འཚམས་ཀྱི་དག་སྒྲིག་ལས་གཞི་བསྒྲུབས་པའི་སྟེང་། རྒྱལ་ཤོད་བླ་ཆུང་གཡུང་དྲུང་འཇིགས་མེད་ལགས་ནས་དེབ་འདིའི་དཔར་སྐྲུན་མཐུན་འགྱུར་བཏང་ནས་མཉམ་རུབ་ཀྱིས་དཔར་སྐྲུན་བྱས་ཏེ་འདི་གའི་གྲྭ་ཚང་ལ་རིན་མེད་དུ་སྤེལ་བ་ཞིག་ལགས་སོ།། །།
