མདུན་ངོས། » གསར་རྩོམ། » གནའ་རྩོམ། » ཇོ་བོ་དཱི་པཾ་ཀ་ར་ཛྙཱ་ན་ལ་བསྟོད་པ་བྱིན་རླབས་ཀྱི་རྒྱ་མཚོ་ རོལ་པའི་བཀོད་པ་ཞེས་བྱ་བ།

ཇོ་བོ་དཱི་པཾ་ཀ་ར་ཛྙཱ་ན་ལ་བསྟོད་པ་བྱིན་རླབས་ཀྱི་རྒྱ་མཚོ་ རོལ་པའི་བཀོད་པ་ཞེས་བྱ་བ།


ཇོ་བོ་དཱི་པཾ་ཀ་ར་ཛྙཱ་ན་ལ་བསྟོད་པ་བྱིན་རླབས་ཀྱི་རྒྱ་མཚོ་
རོལ་པའི་བཀོད་པ་ཞེས་བྱ་བ།

རོང་སྟོན་ཤཱཀྱ་རྒྱལ་མཚན།
བླ་མ་དང་ལྷག་པའི་ལྷ་ལ་ཕྱག་འཚལ་ལོ། །
ཚད་མའི་སྐྱེས་བུ་དོན་གཉིས་དབང་འབྱོར་བ། །
འཕགས་པའི་ཡུལ་དུ་གྲུབ་པའི་ཡོན་ཏན་བརྙེས། །
མཁས་མཆོག་རྒྱ་མཚོའི་དབུས་སུ་མངོན་མཐོ་ཞིང་། །
ཡང་དག་རིགས་པས་ཕས་རྒོལ་ཟིལ་གྱིས་གནོན། །
སྒྲ་ཚད་བཟོ་དང་གསོ་བ་ནང་དོན་དང་། །
རྡོ་རྗེ་ཐེག་སོགས་སྡེ་སྣོད་ལ་མཁས་ཤིང་། །
རིམ་གཉིས་ཟབ་མོའི་རྟོགས་པ་ཕུལ་བྱུང་ལྡན། །
རྣམ་དག་སྤྱོད་པ་ལྷུར་ལེན་གདུལ་བྱ་རྣམས། །
དགེ་བའི་ལས་ལམ་མཆོག་ལ་འགོད་པར་མཛད། །
རབ་སྙན་གྲགས་པ་རྒྱ་མཚོའི་མཐར་སོན་པ། །
བྱང་སེམས་ས་སྐྱོང་དབང་པོས་ལེགས་ཐོས་ནས། །
དཀའ་སྤྱད་དུ་མས་བོད་འདིར་ལེགས་དྲངས་ཏེ། །
གདུལ་བྱ་དུ་མ་ཡོངས་སུ་སྨིན་པར་མཛད། །
གངས་རིའི་ཁྲོད་ཀྱི་མཁས་པ་མ་ལུས་པ། །
ཡོངས་སུ་འདུས་ནས་གཙུག་གིས་གུས་པས་མཆོད། །
རྒྱལ་སྲས་གཞན་དོན་ཁུར་གྱིས་མི་ངལ་ཞིང་། །
བྱང་ཆུབ་སེམས་ཀྱི་འོད་ཟེར་རབ་འཕྲོས་པས། །
འགྲོ་བའི་དོན་མཛད་སྤྱོད་པ་ལྷུར་ལེན་པ། །
ཚད་མེད་མངོན་ཤེས་ལྡན་པ་རྒྱལ་བའི་སྲས། །
ངོ་མཚར་རྨད་བྱུང་རྣམ་ཐར་དུ་མ་བསྟན། །
མར་མེ་མཛད་དཔལ་ཡེ་ཤེས་སྒྲོན་མེ་ཡིས། །
མ་རིག་མུན་པ་རྣམ་བསལ་སྟོང་ཉིད་དོན། །
རྟོགས་པའི་འོད་ཀྱིས་དངོས་འཛིན་མུན་པ་འཇིག །
ཀླུ་སྒྲུབ་གསུང་རབ་དགོངས་དོན་ཐུགས་སུ་ཆུད། །
ཕས་ཀྱི་རྒོལ་བ་ཀུན་ལས་རྣམ་པར་རྒྱལ། །
འདི་ནས་སྐུ་ལུས་བོར་བར་གྱུར་མ་ཐག །
དགའ་ལྡན་ལྷ་གནས་བྱམས་པའི་དྲུང་བགྲོད་དེ། །
རྒྱལ་སྲས་དྲི་མེད་མཚན་གྱིས་རབ་བསྔགས་པ། །
ཚད་མེད་ཐུགས་རྗེའི་གཏེར་ལ་གུས་པས་བསྟོད། །
བསྟོད་པའི་དགེ་ཚོགས་སྟོན་ཀའི་ཟླ་འོད་ལྟར། །
རབ་དཀར་དྲི་མེད་གང་གིས་ཐོབ་པ་ཡི། །
འགྲོ་ཀུན་ས་ལམ་རིམ་པས་བགྲོད་གྱུར་ཏེ། །
སྒྲིབ་གཉིས་སྐྱོན་བྲལ་སངས་རྒྱས་མྱུར་ཐོབ་ཤོག །
ཅེས་ཇོ་བོ་དཱི་པཾ་ཀ་ར་ལ་བསྟོད་པ་རོང་སྟོན་ཆེན་པོས་སྦྱར་བའོ།།  ༈ །།