ལེགས་བཤད་མཇུག་སྒྲིལ་བའི་དུས་རབས།
ལེགས་བཤད་མཇུག་སྒྲིལ་བའི་དུས་རབས།
བོད་ཀྱི་སྐད་དང་རིག་གནས་ཀྱིས། །
དབེན་པའི་ལྷིང་འཇགས་ཡུལ་གྲུ་ན། །
བོད་ཕྲུག་ཅིག་གིས་བོད་ཡིག་གི །
ཕྱོགས་སུ་བསམ་ནས་གཏམ་འདི་ཐལ། །
གནའ་དུས་བོད་ན་མཁས་པ་མང་། །
དེ་ཡིས་བྱས་པའི་ལེགས་བཤད་མང་། །
དེ་དག་རྣམས་ལ་བཀུར་མཁན་མང་། །
ཕྱི་མིག་བལྟས་ན་ཤེས་རྒྱུ་མང་། །
དེང་དུས་ལག་རྩལ་འཕེལ་ཚད་མགྱོགས། །
སྐད་ཡིག་ཉམ་རྒུད་བང་རྩལ་མགྱོགས། །
རྒྱལ་ཁབ་ཕྱི་ནང་དྲྭ་ལམ་མགྱོགས། །
ཅོལ་ཆུང་ཁ་ལག་དེ་བས་མགྱོགས། །
དྲྭ་བའི་མུན་པར་གནས་བཅས་ནས། །
ལེགས་བཤད་ཉི་འོད་ལ་སྡང་བའི། །
མཁས་རློམ་སྲིན་བྱའི་ཀུ་ཅོ་ཡིས། །
རྐང་གཉིས་མལ་དུ་རྣ་བ་གཟན། །
མི་རེའི་ལག་ན་རྩེད་ཆས་རེ། །
དེ་ན་བྲིས་པའི་ངག་འཁྱལ་རེ། །
ཚད་གཞི་མི་ལྡན་བརྗོད་པ་སྟེ། །
རྐང་ཆད་ལག་ལྡུམ་ལུས་པོ་འདྲ། །
རྩོམ་སྲོག་མེད་པ་བེམ་རོ་འདྲ། །
ཚིག་རྒྱན་སྨྱོན་པའི་གཅེར་རྒྱུག་འདྲ། །
བརྡ་དག་ར་ལུག་འདྲེས་པ་འདྲ། །
མཚམས་སྦྱོར་རྡོ་ཆག་བཙན་བསྒྲིགས་འདྲ། །
ཚད་ལྡན་རྩོམ་གྱི་ལོ་ཏོག་ཏུ། །
ལྡུམ་བུ་སྐྱེས་པ་ཤིན་ཏུ་སྐྱོ། །
ཤེས་མེད་ཞིང་པ་བླུན་པོ་ཡིས། །
ཁ་ཁར་མ་ཕྱེད་དེ་བས་སྐྱོ། །
གོ་རྟོགས་དབེན་པའི་གཞོན་ནུ་འགས། །
སྒོ་ཁའི་འདོགས་ཁྱི་སྤུ་ཅན་ལ། །
གཡུ་རལ་ཡོད་ཅེས་སྒྲོགས་པའི་ཚེ། །
བཀླག་ན་དུས་ཚོད་མི་གྲོན་ནམ། །
མཁས་མང་བྱེ་བའི་རྒྱ་མཚོ་ལས། །
ཐོན་པའི་ལེགས་བཤད་རི་བོང་ཅན། །
བླུན་པོའི་ངན་སྤྱོད་སྤྲིན་ནག་གིས། །
འཇིག་རྟེན་ཐམས་ཅད་མོག་པོར་བྱས། །
ཡོངས་རྫོགས་བོད་པས་རྒྱལ་འཕགས་གསུང་། །
དཀྱུས་གཅིག་བཀླག་ཆོག་རིག་གཞུང་ལ། །
རང་འདོད་བླུན་པོས་བཅོས་པ་ཡི། །
ཡུལ་སྐད་ཉི་ཚེའི་གླེགས་བམ་མཐུག །
བརྗོད་བྱ་རྒྱུས་ལོན་མེད་ན་ཡང་། །
རྗོད་བྱེད་ཚད་ལྡན་གྱུར་པ་ན། །
སོ་ནམ་མ་བྱས་ཞིང་ས་རུ། །
ལོ་ཏོག་ལྷུན་གྱིས་གྲུབ་བམ་ཅི། །
གནས་ལུགས་རྗེན་པར་བརྗོད་པའི་དུས། །
རང་བཞིན་བརྗོད་པའི་མཚན་ཉིད་མེད། །
ཉམས་འགྱུར་ནང་ནས་འདོན་པའི་དུས། །
ཕུལ་བྱུང་རྒྱན་གྱི་དྲི་མ་མེད། །
དངོས་ཡོད་ལོ་རྒྱུས་སྨྲ་བའི་དུས། །
ཡང་དག་རིགས་པའི་ཁུངས་སྐྱེལ་མེད། །
འབོལ་རྩོམ་ཐད་ཀར་འབྲི་བའི་ཚེ། །
གལ་ལ་ཐུག་པའི་ཞིབ་ཆ་མེད། །
ལེགས་བཤད་བཀླགས་མྱོང་མེད་པས་ན། །
གཞན་ནས་ལེགས་ཆ་ཐོབ་པ་མེད། །
མཁས་པ་དག་ལ་མ་བསྟེན་པས། །
རང་གིས་སྦྱངས་པའི་འབྲས་རྟགས་མེད། །
བརྡ་སྤྲོད་ཁུངས་ལུང་མ་དམིགས་པས། །
ཨ་མས་བོར་བའི་ཕྲུ་གུ་བཞིན། །
ཉམས་འགྱུར་མ་ཐོན་སྙན་དངགས་ཞེས། །
ཞུམ་བུའི་སྣོད་ནས་བཟའ་བ་བཞིན། །
ལུང་རིགས་མི་ལྡན་བརྒལ་ལན་ཞེས། །
ཤིང་གི་རལ་གྲི་ཕྱར་བ་བཞིན། །
ཞིབ་ཆ་མ་གསལ་ལོ་རྒྱུས་ཞེས། །
མུན་ཁྲོད་འཁྱམས་པའི་བྱི་སྦ་བཞིན། །
ཕྱོགས་སྔའི་འདོད་པ་མ་མཐོང་བས། །
དགག་བཞག་འཇའ་ཚོན་དེད་པ་བཞིན། །
མཁས་པའི་མན་ངག་མ་འཕྲད་པས། །
མཐའ་དཔྱོད་འདམ་ལ་ཕུར་པ་བཞིན། །
མཐོང་ཐོས་མྱོང་བ་མ་བརྒྱུད་པས། །
ཚད་ལྡན་རྩོམ་གྱི་སྲོག་མི་ལྡན། །
བརྗོད་པ་བརྡ་སྤྲོད་རྒྱབ་ཕྱོགས་པས། །
རྩོམ་རིག་ལུས་ཀྱི་མཚན་ཉིད་མེད། །
ཚིག་རྒྱན་དགའ་བའི་ནགས་ཚལ་ན། །
ཞེན་ལྟའི་ཚེར་མས་ལུས་ལ་སྡང་། །
ལེགས་བཤད་པད་མོའི་དགའ་ཚལ་ན། །
ཉེས་བཤད་འབུ་སྲིན་མཆེ་བ་རྣོ། །
གནས་ལུགས་མ་མཐོང་དམུས་ལོང་དག།
མིག་ལྡན་གཞན་ལ་ཆོ་ངེ་འདོན། །
གྲོག་མ་ཐང་ལ་ངལ་བཞིན་དུ། །
དགུང་གི་གཡུ་འབྲུག་འཕྱ་བར་བྱེད། །
རྩོམ་འབྲིའི་འདབ་གཤོག་མ་ལྡན་པའི། །
རྩོམ་རིག་ནམ་འཕང་གཅོད་པ་ན། །
བུང་བས་ལྡིང་འཁོར་རྒྱག་པ་ཡང་། །
འཛམ་གླིང་བསྐོར་བ་ཡིན་ནམ་ཅི། །
ཕུལ་བྱུང་མཁས་པའི་ལེགས་བཤད་ལ། །
ལྐོག་ནས་འཕྱ་བའི་སྐལ་ངན་དག །
ལྕཀྱུས་བཏབ་པའི་ཁྱི་རྒན་གྱིས། །
དཔའ་བོའི་གཟི་བརྗིད་གཞོམས་ནུས་སྙམ། །
ལུང་རིགས་མངོན་སུམ་འཇིག་རྟེན་བཞིར། །
མ་མཐུན་བརྒལ་བརྟག་ཡིན་པ་ན། །
རྒན་མོས་མ་ཎི་བགྲང་བ་དེས། །
ཕས་རྒོལ་གླང་པོའི་ཀླད་འགེམས་སམ། །
ཤོག་ཐོག་རི་མོ་བྲིས་པ་དེ། །
ཡིག་སྦྱོར་ཚད་ལྡན་ཡིན་པ་ན། །
ངང་པས་བཞག་པའི་རྐང་རྗེས་ཀྱང་། །
ཤེས་ལྡན་ཕལ་གྱིས་མི་བཀླག་གམ། །
ལུགས་གཉིས་གོ་རྟོགས་འཕེལ་བ་ཡི། །
གནའ་དེང་བསླབ་བྱ་མི་ལྡན་ཡང་། །
ཤོག་སྒོར་གྲོན་པའི་ལོ་དེབ་ཀྱིས། །
རིག་གཞུང་ཡར་སྐུལ་བྱེད་ཅེས་ཟེར། །
ཆེ་བ་སྲིད་གསུམ་སྣོད་བཅུད་ནས། །
ཆུང་བ་གེ་སར་སྒྲུང་རྒྱུད་ཡན། །
རྩོམ་རིག་བརྗོད་བྱར་འདེམས་ཆོག་ཀྱང་། །
ཁྱོད་ལ་འོས་ཤིང་འཚམ་པ་གང་། །
ཆོས་ལུགས་དྲི་བྲལ་ཟླ་བའི་བཞིན། །
སྲིད་ཀྱི་ཆུ་འཛིན་གྱིས་བཏུམས་པས། །
དོག་ན་གནས་པའི་དབུ་ནག་མིས། །
དེ་གཉིས་ཁྱད་པར་ཕྱེད་མ་གྱུར། །
ཤིང་ཏོག་རུལ་བའི་རྒྱལ་རབས་ཀྱིས། །
གཟུར་གནས་སྐྱེ་བོར་དྲི་ངན་འབྱིན། །
དམངས་མགོ་བསྐོར་བའི་ཆོས་པ་ཡི། །
བསླུ་བྲིད་ཕྲེང་བས་བགྲང་ནུས་མིན། །
རྭ་བས་བསྐོར་བའི་ལྗོངས་དེ་རུ། །
ཆོས་སྲིད་གཉིས་ཀའི་བ་ཚ་ཅན། །
རྙོགས་མ་བགྲུང་དགོས་མང་ལགས་ན། །
འདི་ལ་བསམ་གཞིགས་བྱེད་དམ་ཅི། །
དུས་རབས་རྩོམ་རིག་རྟ་བདུན་ཅན། །
ལུགས་ཟུང་ཡར་སྐུལ་འོད་ཟེར་གྱིས། །
དོག་པའི་མུན་ཁུང་བསལ་བྱས་ནས། །
སྣང་བའི་ནམ་མཁའ་བསྐྲུན་པར་མཛོད། །
ལོ་དེབ་ཐོག་ཏུ་དགོད་རྒྱུ་ཚིགས་སུ་བཅད་པ་ཞིག་བསྐུལ་བ་ལྟར་༢༠༡༥ཟླ་༡༠པར་བྲིས།
