ཁྱད་པར་གྱི་བརྡ་བཅོ་བརྒྱད་པ།

བླ་ཆེན་པོ་དྲན་པ་ནམ་མཁའ་ལ། སློབ་དཔོན་བེ་རོ་ཙ་ནས་ཞུས་པ། སྣང་བ་བརྡ་ཁྲོལ་གྱི་གདམས་ངག་གསུང་པ་

དེ་གང་ལགས། ཞེས་ཞུས་པས། བརྡ་ལ་གཉིས། འཁྲུལ་སྣང་ཐབས་སུ་འཁྱེར་བའི་བརྡ་དང༌། ^{(དུག་ལྔ་ཐོག་བརྫི་བ།)}རིག་པ་རང་སར་གྲོལ་ནས་བརྡ་གསུང་པ། ^{(ཅིར་སྣང་རིག་པ་ཡིན་པས།)} བུ་འཁོར་བ་ལ་ཕྱི་ཕྱག་འཚལ་ཞིང༌། ^{(འཁོར་བ་ཕྱིར་མི་ལྡོག་ཅིང༌།)} ཐར་པའི་སྐྲས་ཆེན་འཛུགས་ན། ^{(ཕྱི་མའི་བདེ་བ་ཞེ་ཐག་པ་ནས་བསྒྲུབ་ན།)} བྱ་རྒན་གྱི་འདབ་གཤོག་བྲེགས་ཤིག ^{(འདོད་ཅིང་ཆགས་པ་བསྐྱུངས་ལ་སྦྱིན་པ་བཏང༌།)} དུག་སྦྲུལ་རྩིས་གསོས་ཤིག ^{(ཞེ་སྡང་ལ་བྱམས་པ་བསྒོམ།)} ཕག་རྒོད་མུན་ཁང་ནས་ཐོན་ཅིག ^{(གཏི་མུག་སྤངས་ལ་ཡེ་ཤེས་བསྐྱེད།)} སྨྱོན་པའི་མཚོན་ཆ་ཕྲོགས་ཤིག ^{(ང་རྒྱལ་ཅན་ལ་ཞི་བ་བསྒོམ།)} གཅན་ཕྲང་ལ་རྫུ་འཕྲུལ་གྱིས་རྒྱུག་ཅིག ^{(ཕྲག་དོག་སྤངས་ལ་ཡངས་པ་བསྒོམ།)} རྟ་རྒོད་སྒྲོག་ཏུ་ཆུག་ཅིག ^{(ཤེས་པ་འཁྲུལ་སྣང་ལ་འཁྱམས་སུ་མི་འཇུག)} ཁྱི་རྐུན་སྒོར་ཐོན་ཅིག ^{(སྔར་ཞེན་གྱི་བག་ཆགས་དང་བྲལ།)} རིག་པ་རང་གྲོལ་གྱི་བརྡ་ལ་ནམ་མཁའི་ངོགས་ལྟོས་ཤིག ^{(རིག་པ་སྟོང་གསལ་ཆེན་པོ་ལ་མ་ཡེངས་པར་བྱ།)} རྒྱ་མཚོའི་འཆིང་དུ་ཉོལ་ཅིག ^{(བོན་ཉིད་གཡོས་པ་མེད་པའི་ངང་དུ་བཞག)} གསལ་བྱེད་ཉི་མ་དང་མི་བྲལ་བར་གྱིས་ཤིག ^{(རིག་པ་རང་གསལ་གྱི་ཉམས་དང་མི་འབྲལ།)} ཤེལ་སྒོང་དྭངས་པ་བཙའ་རྫི་བསྐྱེད་ཅིག ^{(གསང་སྔགས་ལ་གཙོར་དམ་ཚིག་ཆེ་བ།)}སྟོང་གསུམ་ཐབས་ཀྱིས་གཤོགས་ཤིག

^{(སྣང་སྲིད་རིག་པར་ཤེས་པར་བྱའོ།)}གསེར་གྱི་མཆོད་རྟེན་ཁྲི་འཕང་དགུ་པའི་ཁ་ལ་སྡོད་ཅིག ^{(ཐེག་དགུའི་ཡང་རྩེ་རྫོགས་ཆེན་དོན་ལ་གནས་པར་བྱའོ།)} ཡབ་ཡུམ་གཉིས་དང་མ་བྲལ་བར་གྱིས་ཤིག ^{(ཐབས་ཤེས་ཟུང་དུ་འཇུག་པ་གལ་ཆེ།)} གསས་ཁང་ཆེན་པོ་བརྩིགས་ཤིག ^{(རང་གྲོལ་སྐྱེ་འཇིག་མེད་པའི་དོན་ལ་བསམ།)} རིན་ཆེན་གླིང་དུ་སོང་ཞིག ^{(བཟང་ངན་བླང་དོར་མེད་པའོ།)} རྒད་པོ་གསུམ་གྱི་དངོས་གྲུབ་ལོངས་ཤིག ^{(བོན་སྐུ་ལོངས་སྐུ་སྤྲུལ་སྐུ་གསུམ་ངོ་འཕྲོད་པར་བྱའོ།)} མིག་ལྔ་དཔྲལ་བར་འཆར་གྱིས། ^{(ཤ་ཡི་ལྷ་ཡི་རྫུ་འཕྲུལ་གྱི་ཤེས་རབ་གྱི་ཡེ་ཤེས་ཀྱི་སྤྱན།)} ཞེས་ཁྱདཔར་གྱི་བརྡ་བཅོ་བརྒྱད་གསུངས་སོ། །རྫོགས་སོ།། །།རྫོགས་ཆེན་ནམ་མཁའ་འཕྲུལ་མཛོད་ནས་དྲངས།