༧རྒྱལ་བ་སྨན་རིའི་ཁྲི་འཛིན་༣༣པ་མཆོག་གི་རྗེས་དྲན།
༧རྒྱལ་བ་སྨན་རིའི་ཁྲི་འཛིན་༣༣པ་མཆོག་གི་རྗེས་དྲན། །
དྲང་སྲོང་རྣམ་རྒྱལ།
ཕྱི་ནང་གོམས་སྲོལ་ཐ་དད་ས་མཐའི་ཡུལ། །
སྒེར་གྱི་ཆོས་བརྒྱད་བ་དན་མ་ཕྱར་བར། །
སྙིང་སྟོབས་གོ་ཆ་བརྟན་པོའི་སྤྱི་སེམས་ཀྱིས། །
བཤད་སྒྲུབ་རྒྱལ་མཚན་བསྒྲེངས་པའི་མཛད་བཟང་ལྕི། །
ཡུལ་མི་བཀྲེས་སྐོམ་མནར་བའི་ལུང་གཤོང་དུ། །
ཕྱི་མིས་བཀོད་ལེགས་འཛུགས་སྐྲུན་ལྷ་ཡུལ་བཞིན། །
ལྟ་ན་སྡུག་པའི་བྱེས་ཀྱི་སྨན་རིའི་གླིང་། །
མིག་ལ་ལྷམ་མེར་གསལ་འདི་དོན་ཆུང་མིན། །
བདག་མེད་ངག་ལ་བྱང་ཡང་བདག་འཛིན་ནི། །
ལྷུན་པོའི་གཏོས་ལ་འགྲན་པའི་མི་རིགས་ཁྲོད། །
གསང་གསུམ་མཛད་པ་རྒྱལ་བ་མཉམ་མེད་པའི། །
གདན་སའི་ཐོག་ཏུ་བསྒྲིལ་དེ་ངོ་མཚར་ཆེ། །
གོ་རྟོགས་ཉི་མ་ཐོད་དུ་མ་ཤར་ཡང་། །
བྱིས་པའི་མུ་ཅོར་མོད་པའི་ཁོར་ཡུག་ཏུ། །
དུས་ཀྱི་སྐྱ་རེངས་གཅིག་པུ་ཤར་བའི་མོད། །
དམུས་ལོང་རྣམས་ལ་དུས་རབས་མིག་བུ་བྱིན། །
བཤད་སྒྲུབ་དགའ་ཚལ་རྣ་བའི་དཔྱིད་ལྷུང་བས། །
ཧི་མ་ལ་ཡ་གོམ་པས་བརྒལ་བའི་བློ། །
དང་པོ་སྐྱེས་པའི་ཚུལ་ལ་བསམ་པ་ན། །
རང་ལའང་དམ་པའི་བཀའ་དྲིན་གཞལ་དུ་མེད། །
ན་ནིང་ནུབ་ཕྱོགས་ས་མཐའི་ཡུལ་གྲུ་ན། །
མི་ལ་ཕན་པ་གང་ནུས་བསྒྲུབ་པ་ཡི། །
ཞུ་ཚིག་དེ་ལ་ཐུགས་རབ་མཉེས་པའི་ཚུལ། །
ད་ལྟ་ཡིད་ངོར་རྡོ་ལ་རི་མོ་བཞིན། །
མངོན་དགའི་ཞིང་དུ་གཤེགས་ནས་ལོ་འཁོར་རྗེས། །
རང་བཞིན་བརྗོད་པའི་རྗེས་དྲན་ཨུཊྤ་ལ། །
དྲུང་ན་ངོ་དགའི་ཚིག་དང་འགྲན་མེད་པ། །
རབ་དཀར་སྙིང་གི་ལྷག་བསམ་མཚོན་ཕྱིར་ཕུལ།། །།
༢༠༡༨ལོའི་ཕྱི་ཟླ་༩ཚེས་༣ཉིན་ཨ་རིར་བྲིས། །