བསྟོད་པ་ལེགས་བྱས་ཡོངས་འདུའི་སྙེ་མ་ཞེས་བྱ་བ་བཞུགས་སོ། །
བསྟོད་པ་ལེགས་བྱས་ཡོངས་འདུའི་སྙེ་མ་ཞེས་བྱ་བ་བཞུགས་སོ། །
༧གོང་ས་ལྔ་པ་ཆེན་པོ།
ཐུབ་རྣམས་སྤངས་རྟོགས་ཡོན་ཏན་རབ་མཉམ་ཡང༌། །
གདུལ་དཀའི་འགྲོ་ལ་ཉེར་བརྩེའི་སྙིང་སྟོབས་ལ། །
ཕྱོགས་བཅུའི་རྒྱལ་ཀུན་མགྲིན་གཅིག་བསྔགས་པའི་ཡུལ། །
བཅོམ་ལྡན་ཤཱཀྱ་སེང་གེར་མགོས་ཕྱག་འཚལ། །
བདེ་གཤེགས་ཀྱིས་བསྐུལ་ཅོད་པན་མ་ཕམ་དབུར། །
བཅིངས་ཏེ་གཟིགས་པ་ལྔ་ཡིས་འཛམ་གླིང་འགྲོ། །
ཡང་དག་ལམ་ལ་བཀྲི་ཕྱིར་དགའ་ལྡན་ནས། །
འཕོ་མཛད་དམ་པ་ཏོག་དཀར་ཕྱག་འཚལ་ལོ། །
ས་ག་ཟླ་བའི་ཡར་ཚེས་བཅོ་ལྔའི་མཚན། །
སྒྱུ་འཕྲུལ་ལྷ་མོ་གསོ་སྦྱོང་ལ་གནས་དུས། །
གླང་ཆེན་ཐལ་ཀར་མཆེ་བ་དྲུག་ལྡན་གྱི། །
རྣམ་པས་ལྷུམས་སུ་ཞུགས་ལ་ཕྱག་འཚལ་ལོ། །
དབོ་ཟླའི་ཚེས་བཅུར་གློ་གཡས་ནས་བལྟམས་ཚེ། །
ངོ་མཚར་ལྟས་བཟང་ལྷ་ཀླུས་སྲི་ཞུ་མཛད། །
སྐྱེ་མཐར་ཞལ་འཆེས་ལུས་ཅན་བདེ་སྐྱིད་མཐུས། །
དོན་ཀུན་གྲུབ་མཚན་གསོལ་ལ་ཕྱག་འཚལ་ལོ། །
ཡི་གེ་རྒྱལ་དང་གླང་ཆེན་འདུལ་ལ་སོགས། །
དྲུག་ཅུ་རྩ་བཞི་ལས་བརྒལ་སྒྱུ་རྩལ་གྱིས། །
གཞོན་ནུའི་དུས་ནས་སྟོབས་ཆེན་དྲེགས་ལྡན་ཚོགས། །
ཁེངས་པ་འཕྲོག་པར་མཛད་ལ་ཕྱག་འཚལ་ལོ། །
རང་ལོ་ཉེར་དགུའི་བར་དུ་རྒྱལ་པོའི་སྲིད། །
བསྐྱངས་ཚེ་འཇིག་རྟེན་མཐུན་དང་ལོག་རྟོག་རྣམས། །
སེལ་ཕྱིར་ས་འཚོ་གྲགས་འཛིན་གྱིས་མཚོན་པའི། །
བཙུན་མོ་ཁབ་ཏུ་བཞེས་ལ་ཕྱག་འཚལ་ལོ། །
རྒྱལ་གསུང་སིལ་སྙན་སྒྲར་དྲངས་ཉེར་བསྐུལ་ཞིང༌། །
རྒ་ན་འཆི་དང་དགེ་སློང་གཟིགས་རྐྱེན་གྱིས། །
མཆོད་རྟེན་རྣམ་དག་དྲུང་དུ་རབ་བྱུང་བར། །
བརྒྱ་བྱིན་དུར་སྨིག་ཕུལ་ལ་ཕྱག་འཚལ་ལོ། །
ནཻ་རཉྫ་ནར་མཁའ་ཁྱབ་ཏིང་འཛིན་ལ། །
ལོ་དྲུག་དཀའ་བ་སྤྱད་ཚེ་ཟས་གཙང་སོགས། །
དབུགས་དབྱུང་ལེགས་སྐྱེས་འོ་མས་བསྙེན་བཀུར་མཐུས། །
གསེར་མདོག་ལང་ཚོ་དར་ལ་ཕྱག་འཚལ་ལོ། །
སྐྱིལ་ཀྲུང་གཅིག་ལ་བྱང་ཆུབ་མཆོག་བརྙེས་ཕྱིར། །
རྡོ་རྗེའི་གདན་ལ་རྩྭ་ཚོང་བཀྲ་ཤིས་ལས། །
ཉེར་བསླངས་ཟོ་བའི་ཆུན་པོ་བཏིང་བའི་སྟེང༌། །
མི་གཡོའི་དམ་བཅའ་བརྟན་ལ་ཕྱག་འཚལ་ལོ། །
བདུད་སྡེའི་མཚོན་ཆར་མཛེས་མའི་སླུ་བྲིད་ཀྱིས། །
མ་ཚུགས་གྲངས་མེད་མཆོད་སྤྱིན་དཔང་པོ་རུ། །
ས་ལྷས་ཐལ་མོ་སྦྱར་ཚེ་འདོད་ལྷ་ཡིས། །
དང་བས་ཆེད་དུ་བསྔགས་ལ་ཕྱག་འཚལ་ལོ། །
སུམ་ཅུ་རྩ་ལྔའི་དགུང་ལོར་ཉེར་བབས་དུས། །
ས་ག་ཟླ་བའི་བཅོ་ལྔའི་ཐུན་དྲུག་གི །
ཐ་མར་བླ་མེད་བྱང་ཆུབ་བདུད་རྩིའི་བཅུད། །
ཐུགས་ཀྱི་དཔལ་བེར་གཏམས་ལ་ཕྱག་འཚལ་ལོ། །
བདུན་ཕྲག་བདུན་མཐར་བཀྲ་ཤིས་ཚིགས་བཅད་གསུངས། །
ཚངས་དབང་གིས་བསྐུལ་ཝ་ར་ཎཱ་སི་རུ། །
ཆུ་སྟོད་ཟླ་བའི་ཚེས་བཞིར་བདེན་པ་བཞིའི། །
ཆོས་ཀྱི་འཁོར་ལོ་བསྐོར་ལ་ཕྱག་འཚལ་ལོ། །
བརྒྱད་ཅུའི་ལོ་ལ་སླེབས་པའི་དཔྱིད་ཐ་ཡི། །
བཅོ་ལྔའི་ཚེས་ཀྱི་ནང་པར་དེ་བཞིན་གཤེགས། །
འཇིག་རྟེན་ཁམས་སུ་མི་སྣང་ལྟར་གྱུར་ནས། །
མྱ་ངན་འདའ་བར་མཛད་ལ་ཕྱག་འཚལ་ལོ། །
ཐུན་མོང་གདུལ་བྱར་བསྟན་ཀྱང་ངེས་པའི་དོན། །
སྐྱེ་འཆི་སྤངས་པའི་སྐུ་ལ་ཕྱག་འཚལ་ཞིང༌། །
ནམ་མཁའ་མཛོད་ཀྱི་སྒོ་འཕར་ཡོངས་ཕྱེ་བའི། །
འཛད་མེད་དངོས་བཤམས་ཡིད་སྤྲུལ་མཆོད་པ་འབུལ། །
ཐོག་མེད་བསགས་པའི་སྡིག་ལྟུང་མ་ལུས་པ། །
གཉེན་པོ་སྟོབས་བཞིའི་སྒོ་ནས་བཤགས་པར་བགྱི། །
རང་གཞན་ཀུན་གྱིས་བསྒྲུབས་པའི་དགེ་བ་ལ། །
དང་བའི་སེམས་ཀྱིས་རྟག་ཏུ་ཡི་རང་ངོ་། །
རྒྱལ་སྲས་སློབ་མར་བཅས་པ་འཁོར་བའི་མཐའ། །
སྟོངས་མིན་ཆོས་ཀྱི་འཁོར་ལོ་བསྐོར་བར་བསྐུལ། །
འགྲོ་ཀུན་ཐར་པའི་ལམ་དུ་མ་བཞག་པར། །
གཟུགས་སྐུ་མྱ་ངན་མི་འདའ་བརྟན་པར་བཞུགས། །
ཉེར་བསགས་བསོད་ནམས་ཕུང་པོ་སྐྱེ་དགུ་རྣམས། །
རྣམ་མཁྱེན་ཡེ་ཤེས་ཐོབ་པའི་རྒྱུ་རུ་བསྔོ། །
དགེ་བའི་འབྲས་བུ་འཇིག་རྟེན་ཁམས་རྣམས་སུ། །
བཀྲ་ཤིས་བདེ་ལེགས་ཆེན་པོས་ཁྱབ་པར་ཤོག །
ཅེས་བསྟོད་པ་ལེགས་བྱས་ཡོངས་འདུའི་སྙེ་མ་ཞེས་བྱ་བ་འདི་ནི་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་ཕོ་བྲང་པོ་ཏཱ་ལར་སྦྱར་བའོ།། །།
