བསྟོད་པ་བཀླགས་པའི་འཆར་སྣང༌།
བསྟོད་པ་བཀླགས་པའི་འཆར་སྣང༌།
དོན་གྲུབ་རྒྱལ་གྱི་གསུང་རྩོམ་ལས་དྲངས།
མཁས་པའི་ཕྲག་གི་ཐེམ་སྐས་ལ། །
རྩོམ་གྱི་རྐང་སྟེགས་འཇོག་མཁས་པའི། །
མཁས་རློམ་གཞོན་ནུར་གུས་བཏུད་དེ། །
བསྟོད་པའི་དཔྱད་པ་འདི་ཙམ་ཤོར། །
རིག་རྩོམ་དེབ་ཀྱི་གངས་ཁྲོད་དུ། །
བསྟོད་ཚིག་གཡུ་རལ་གསིག་པ་ཡི། །
འདམ་གྱི་གདོང་ལྔ་འགའ་ཞིག་གིས། །
ཆོ་ངེ་སྒྲ་ལ་ངོ་མཚར་འཛིན། །
མཁའ་ལྡིང་མགྲིན་པའི་ཕུག་པ་རུ། །
ནེ་ཙོའི་རོ་འཛིན་མི་མཛེས་ཀྱང༌། །
འདི་དག་སྨྲ་བའི་རྒྱལ་པོ་མཆོག །
དབྱངས་ཅན་དགའ་མས་འཁྱུད་འདི་མཚར། །
མཁས་པས་གསོལ་འདེབས་བརྒྱ་བྱས་ཀྱང༌། །
ངག་གི་དབང་ཕྱུག་མ་གྲུབ་པར། །
འདི་དག་བསྟོད་ཚིག་ཡ་གཅིག་གིས། །
དབྱངས་ཅན་ཁུགས་པ་དེ་བས་མཚར། །
རིག་རྩོམ་སྒྱུ་རྩལ་སྐྱེད་ཚལ་དུ། །
ས་མོས་སྣ་བརྒྱ་མཛེས་མོད་ཀྱི། །
མདོག་ལེགས་མེ་ཏོག་སྣ་གཅིག་གིས། །
ཁེངས་ན་དཔྱིད་དཔལ་ཉམས་མིན་ནམ། །
བསྟོད་པ་བྲིས་ན་ལོས་ཆོག་ཀྱང༌། །
ཧ་ཅང་བསྟོད་པ་ཐལ་ཆེས་ན། །
གང་གཱའི་ཆུ་བོ་རྒྱ་མཚོར་བཞིན། །
སྨད་པའི་བ་ཚྭར་ངེས་པར་འགྱུར། །
རྩོམ་རིག་སྒེག་མོའི་མགུལ་རྒྱན་དུ། །
བཅོས་མའི་མེ་ཏོག་ཉེར་ཕུལ་ཀྱང༌། །
དཔྱོད་ལྡན་རྐང་དྲུག་གསར་པའི་ཁྱུས། །
སྦྲང་རྩིའི་དགའ་སྟོན་ཇི་ལྟར་མྱོང༌། །
དོན་མེད་ཚིག་གི་ཤིང་སྐམ་ལ། །
མདོ་མེད་ལོ་འདབ་བརྒྱ་བཏགས་པ། །
གཞན་ཕན་མེ་ཏོག་ལྟར་སྣང་ཡང༌། །
འབྲས་བུ་སྨིན་པ་སྲིད་ན་མེད། །
འཚོ་བའི་རླུང་གིས་མ་གཡོས་པའི། །
རྩོམ་གྱི་མཚོ་མོའི་རླབས་ཕྲེང་ནི། །
བརྒྱ་ལམ་ཙམ་ན་མཆིས་སྲིད་ཀྱང༌། །
ལྦུ་བ་བཞིན་དུ་ག་ལ་རྟག །
ལེགས་བཤད་ནོར་བུ་འདིའོ་ཞེས། །
མཆིང་བུའི་མངོན་བརྗོད་འགའ་བསྟན་ནས། །
བླ་མར་བླ་མ་མིན་བྱེད་པའི། །
དོན་མཐུན་འདི་དག་སྙིང་རེ་རྗེ། །
ལོང་བ་དག་ལ་སྤྱན་སྟོང་ཅན། །
འཐེང་པོ་ལ་ནི་མགྱོགས་འགྲོ་ཞེས། །
བསྟོད་ཚིག་མེ་ཏོག་རབ་བསྟོར་ཀྱང༌། །
ཞིབ་ཏུ་དཔྱད་ན་སྙིང་པོས་དབེན། །
བརྗོད་བྱའི་དོན་ནི་བཅོས་མིན་ན། །
རྗོད་བྱེད་ཚིག་གི་སྡེབ་ལེགས་ཀྱང༌། །
“བསྟོད་པ”ཞེས་པའི་མཚར་སྙན་གྱི། །
མདུང་ཐུང་སྒྲ་འཛིན་དཀྲུག་མིན་ནམ། །
རྒྱུན་དུ་མངར་ཟས་བསྟེན་པ་ཡི། །
སྐྱེས་བུ་དེ་ཡིས་འཇིགས་པ་བཞིན། །
རྟག་ཏུ་བསྟོད་པ་འབུལ་རྣམས་ཀྱང༌། །
ཕུགས་སུ་ནོངས་པའི་རྒྱུ་རུ་ཟད། །
བེམ་པོའི་ལུས་ལ་སྲོག་ཞུགས་ཚེ། །
རྣམ་པར་ཤེས་པའི་མཚན་ཉིད་ལྡན། །
རྗོད་བྱེད་ཚིག་ལ་དོན་སྟོངས་ཚེ། །
སྲོག་མེད་རྩོམ་གྱི་བེམ་པོ་ཉིད། །
དོན་དང་ལྡན་མིན་མི་དཔྱོད་ལ། །
ཚིག་སྦྱོར་ལེགས་ཉེས་མི་བརྟགས་པར། །
བསྟོད་པའི་མཛེས་མ་མཐོང་འཕྲལ་དུ། །
དུས་དེབ་བག་མར་བསུ་འདི་མཚར། །
དེང་རབས་རྩོམ་གྱི་ལྷ་ལམ་ངོས། །
སྒྱུ་རྩལ་འཕུར་མདའ་བགྲོད་པའི་ཚེ། །
“བསྟོད་པའི”བོང་བུ་ལ་ཞོན་ནས། །
མཁའ་ལ་འཕུརའདོད་ངལ་བའི་རྒྱུ། །
མཁས་པའི་ལེགས་བཤད་ཆུ་ཡི་གཏེར། །
བ་ལངརྨིག་རྗེས་བཞིན་འགེངས་པའི། །
དེང་གི་གཞོན་ནུ་འགའ་ཞིག་ནི། །
སེང་གེའི་ལྷག་མ་བཟའ་བར་དགའ། །
བསྟོད་པའི་རྩོམ་གྱི་རྫ་གོག་ཏུ། །
སྡོར་ཐལ་ཚྭ་གསུམ་མི་འདེབས་པར། །
རོ་བཅུད་རྩི་གསུམ་འདོན་པ་ལ། །
ཟྭ་ལ་ཟྭ་ཀ་བཏབ་པས་ཅི། །
ཨ་ཁུ་འབྲོང་གི་དབང་བོ་རྣམས། །
གསེར་ལས་གྲུབ་ཅེས་བསྟོད་མཁས་པའི། །
རི་བོང་བློ་ལྡན་འདི་དག་གི། །
གཏམ་ལ་ཆ་འཇོག་ཅི་ཞིག་ཡོད། །
སྒྱུ་རྩལ་མཛེས་མའི་རིན་ཐང་དེ། །
བསམ་བློའི་སྲང་ལ་མི་འདེགས་པར། །
རྩོམ་གྱི་གཉེན་དོན་གཏམ་པ་ཡི། །
སྙུག་ཐོགས་གཞོན་ནུ་བག་ཡོད་བྱོས། །
ལེགས་པར་བརྟགས་ཤིང་དཔྱད་པ་ཡི། །
རྩུབ་མོའི་ཚིག་གི་ལྕགས་ཀྱུ་འདིས། །
དད་ལྡན་ཉ་མོ་འཛིན་དཀའ་ཡང༌། །
ལྷག་བསམ་ཕོ་ཉའི་ཚུལ་དུ་བཏང་། །
རང་མཚང་སྟོན་པ་དྲང་པོའི་གཏམ། །
རྣ་ལ་དུག་གི་ཚེར་མ་བཞིན། །
ཐོས་པས་མི་སྙན་ཁ་བའི་སྨན། །
ཕུགས་སུ་ཕན་འབྲས་ཆེ་ཞེས་གསུང༌། །
