སྟོན་པ་གཤེན་རབ་ཀྱིས་དཀའ་ཐུབ་གནང་བའི་ཚུལ་ཞིག   མདོ་གཟེར་མིག་ནས་དྲངས། དེའི་ཚེ་དེའི་དུས་ན། སྟོན་པ་གཤེན་རབ་མི་བོ་ནི། སུམ་ཅུ་རྩ་གསུམ་ལྷ་གནས་སུ་བབས་ནས། ངང་པའི་རྒྱལ་པོ་ཆུ་འབྱེད་ཀྱི་རིགས་དང་ཆུ་ལས་འོ་མ་ཕྱེ་ཞིང་ཐིགས་རེ་དང༌། འབྲས་ས་ལེ་ཉག་མ་རེ་གསོལ་ནས། བྱ་ཡི་དཀའ་ཐུབ་ལོ་གཅིག་མཛད། དེ་ནས་རྒྱལ་ཆེན་རིགས་བཞིའི་ནགས་ལ་བབས་ནས། སྤྲེའུ་རྒྱལ་པོ་ཧ་ནུ་མ་འདའ་དང༌། ཤིང་ཏོག་གི་འབྲུ་རེ་དང༌། ཤིང་ལོའི་ཆར་པ་རེ་དང༌། ཁ་བ་ཆགས་པའི་ཆུ་ཐིགས་རེ་གསོལ་གྱིན། སྤྲེའུ་ཡི་དཀའ་ཐུབ་ལོ་གཅིག་མཛད། དེ་ནས་འོལ་མོ་ལུང་རིང་དུ་མེ་ཏོག་གླིང་ལ་བྱོན་ནས། ཆུ་སིང་གའི་ཐིགས་པ་རེ་དང༌། རྩྭ་ཨུ་མེར་རེའི་མཆོག་མ་རེ་གསོལ་ནས། ནུབ་མོ་མིའི་ཆ་བྱད་དུ་བཞུགས་ཀྱིན། ཉིན་མོ་ཤང་ཤང་བྱ་ཡི་ཆས་སུ་བཞུགས་ནས།…

  བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་རྟོགས་པ་བརྗོད་པའི་སྙན་དངགས་དཔག་བསམ་གྱི་ལྗོན་པ་ཞེས་བྱ་བ། རྗེ་ཙོང་ཁ་པ་ཆེན་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གང་ཞིག་རྟོགས་ན་མཐའ་དག་སྤྲོས་པའི་ཚོགས། །འདབ་བརྒྱའི་གཉེན་གྱིས་རེག་པའི་བ་མོ་བཞིན། །མ་ལུས་དྲུངས་ནས་འབྱིན་པ་ཟབ་མོའི་ལམ། །བརྒྱ་ཕྲག་དཀའ་བས་སྒྲུབ་ལ་བརྩོན་རྣམས་རྒྱལ། །སྔོན་ཚེ་སྔོན་གྱི་རྒྱལ་བ་དུ་མ་ལ། །ལྷག་བསམ་ལྷག་པར་བསྐྲུན་པའི་མཐུ་བརྟས་པ། །རྒྱལ་བའི་རྒྱལ་སྲས་དམ་པ་རྟག་ཏུ་དུས། །ཆོས་ཕྱིར་ཆོས་འཕགས་བསྟེན་ཚུལ་འདིར་བཤད་བྱ། །གང་ཡང་ལུས་དང་སྲོག་ལ་མི་ལྟ་བའི་བརྩོན་འགྲུས་ཀྱི་སྟོབས་བསྐྱེད་ན། །བགྲང་བ་ལས་འདས་པའི་བསྐལ་པར་མེད་ཙམ་ཡང་ཐོས་པར་དཀའ་བའི་བླ་ན་མེད་པའི་བྱང་ཆུབ་ཀྱང་རྙེད་པར་མི་དཀའ་ན། མངོན་པར་མཐོ་བའི་ཕུན་སུམ་ཚོགས་པ་ལྟ་ཅི་སྨོས། དེའི་ཕྱིར་སྲིད་པའི་བདེ་བ་དབང་པོའི་གཞུ་ལྟར་གཡོ་བའི་ངང་ཚུལ་ཅན་དུ་རྟོགས་པའི་མཁས་པ་རྣམས་ཀྱིས་གཏན་གྱི་བདེ་བ་བསྒྲུབ་པའི་ཕྱིར་བརྩོན་འགྲུས་ཀྱི་སྟོབས་བསྐྱེད་པ་ལ་འབད་པར་རིགས་སོ། །དེ་ཡང་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྒྲ་དབྱངས་མི་ཟད་པར་སྒྲོག་པའི་སྲས་ཀྱི་ཐུ་བོར་གྱུར་པ། རྒྱལ་བ་དུ་མ་ལ་དགེ་བའི་རྩ་བ་རླབས་པོ་ཆེ་བསྐྲུན་པས་རྒྱུད་དང་དབང་པོ་ཡོངས་སུ་སྨིན་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་གོ་ཆ་ཆེན་པོ་བགོས་པ། ནག་པོའི་རྩ་ལག་སྡེ་དང་བཅས་པ་གཞོམ་པ་ལ་ཞུམ་པ་མེད་པའི་བློ་དང་ལྡན་པའི་དཔའ་བོ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུ་ཞེས་བྱ་བ་དེས་སྔོན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་སྤྱོད་པ་ན།…

  གཡུང་དྲུང་བོན་གྱི་སྔགས་བསྟན་སྔ་དར་དང་འབྲེལ་བའི་བརྒྱུད་རིམ་ངོས་འཛིན་སྐོར། ཟིན་བདག་རང་ཉིད་ཀྱི་རྩོམ། ང་ཚོས་བོན་ལུགས་ཀྱི་ལྟ་ཚུལ་ཁག་ཅིག་ཕྱོགས་བསྡོམས་བྱས་ན། སྔར་བསྐལ་པ་ཡ་ཐོག་ཏུ་མང་བཀུར་རྒྱལ་པོ་བྱུང་སྟེ་ཆེས་ཐོག་མར་འཇིག་རྟེན་གྱི་རིག་བྱེད་དང་མུ་སྟེགས་སོགས་འཇིག་རྟེན་ཐུན་མོང་གི་བོན་བྱུང་བ་དང༌། དེ་དང་སྟབས་བསྟུན་རྒྱལ་བའི་ཕྲིན་ལས་ལ་བརྟེན་ནས་སྲིད་པ་རྒྱུད་ཀྱི་བོན་ཞེས་པ་རྒྱུ་ཡི་བོན་སྣ་ཚོགས་པས་ཕན་བདེ་བསྒྲུབས་པར་བྱས་པས་བསྟན་པའི་གཞི་ཆགས་པར་གྱུར། འོག་མིན་གྱི་གནས་སུ་བོན་སྐུས་བླ་མེད་ཀྱི་རྒྱུད་རྣམས་ཐུན་མིན་ཤིན་ཏུ་གསང་བ་བསམ་གྱིས་མི་ཁྱབ་པའི་དོན་གོ་བའི་གདུལ་བྱ་ཁོ་ནར་གསུངས་པ་དང༌། དེ་ནས་སུམ་ཅུ་རྩ་གསུམ་ལ་སོགས་ལྷ་ཡི་གནས་སུ་འཆི་མེད་ཡུམ་སྲས་གཤེན་གསུམ་གྱིས་སྤྱི་སྤུངས་སོགས་གསང་བ་སྔགས་ཀྱི་བོན་དེ་དག་གདུལ་བྱ་བློ་མཆོག་རྣམས་ལ་གསུངས་པ་ནི་ཕལ་ཆེར་འདོད་ཁམས་ཀྱི་གདུལ་བྱ་ལ་གསུངས་པ་ལྟ་བུར་ཡོད་དོ། ། དེ་ནས་མི་ཡུལ་དུ་སྟོན་པ་གཤེན་རབ་ཀྱིས་གསང་སྔགས་ཀྱི་བོན་མང་དུ་གསུངས་པ་ཡོད་ནའང༌། སྟོན་པ་གཤེན་རབ་ནི་ཡོངས་གྲགས་ཕྱི་རྒྱུད་མདོ་ཡི་སྟོན་པའི་ཚུལ་དུ་བྱོན་པར་སྟོན་པ་གཤེན་རབ་ཀྱི་རྣམ་ཐར་ཁག་ནས་གསལ་བ་ཡིན་ལ། ཕྱི་རྒྱུད་ཐམས་ཅད་སྤྲུལ་པའི་སྐུ་ལས་བརྒྱུད་ཅེས་པའི་དོན་ཡང་དེ་ཡིན་ནོ། །གཤེན་རབ་ཀྱིས་འདུལ་མངོན་མདོ་སྡེ་སོགས་གང་གསུངས་པ་དེ་དག་སྔགས་ཀྱི་ཆ་ལག་གི་ཚུལ་དུ་ཡོད་པས་མདོ་སྔགས་གཉིས་དོན་དུ་མི་འགལ་ལོ་ཞེས་བཞེད་པའང་ཡོད་དོ། །སྟོན་པ་གཤེན་རབ་སྐུ་གཤེགས་ནས་ལོ་ཉེར་བརྒྱད་ན་འོལ་གླིང་དུ་གསང་སྔགས་ཀྱི་བསྟན་པ་བྱུང་ཚུལ་བཤད་པ་ལྟར་ན་སྟོན་པ་ཞལ་བཞུགས་དུས་སུ་ཆེར་མེད་པར་སྣང་ངོ༌། ། བོད་དུ་སངས་རྒྱས་བསྟན་པ་སྤྱི་ཡི་དབང་དུ་བྱས་ན་སྔ་རབས་མཁས་པ་ཁ་ཅིག་གིས་མདོ་སྔགས་གཉིས་མེ་ཆུ་ལྟ་བུར་བཞེད་པ་བྱུང་བ་དེར་མཁས་པས་དགག་བཞག་མཐའ་ཡས་པ་བྱུང་ཡོད་དོ། །བོན་དཔེ་ཁག་ཅིག་ལས་བརྗོད་ཚུལ་འདྲ་མིན་གསལ་ཡང༌། བོན་གྱི་མཁས་མཆོག་མཉམ་མེད་ཤེས་རབ་རྒྱལ་མཚན་གྱིས་མདོ་སྔགས་ཟུང་འབྲེལ་གྱི་ལམ་སྲོལ་བརྟན་པོ་བཙུགས་ཡོད་པ་དེས་བོན་བསྟན་ལ་མདོ་སྔགས་ཟུང་འབྲེལ་གྱི་དཔེ་མཚོན་རང་བཞིན་གྱི་ཐབས་ཤེས་ཤིག་སྟོན་ཡོད་པ་གསལ་བར་བྱས་འདུག སྔ་དར་རྒྱུད་རིམ་སྐབས་སུ་རྒྱུ་འབྲས་ཀྱི་བོན་གཉིས་འགལ་མེད་དུ་སྤྱོད་ཚུལ་གསལ་བའི་དཔེ་ཁག་ཀྱང་མི་ཉུང་བ་ཡོད་པ་རེད། །ནུབ་ཕྱོགས་ཀྱི་ཞིབ་འཇུག་པ་རྣམས་ནས་བོད་བཙན་པོའི་སྐབས་སུ་བོན་ལ་མ་ལག་ཚང་བའི་གཞུང་ལུགས་མེད་པར་བརྗོད་མཁན་མང་དུ་ཡོད་པ་ནི་དེང་དུས་བོན་ལུགས་པ་རྣམས་ཀྱི་ཤོད་སྟངས་དང་མི་འདྲ་བ་ཡིན།…

  སྡོམ་གསུམ་སྨོན་ལམ་གདབ་པ་འཇིག་རྟེན་ངལ་གསོ་ཞེས་བྱ་བ་བཞུགས་པའོ། ། གཤེན་གྱི་ཀློག་པ་བ་གཡུང་དྲུང་ཚུལ་ཁྲིམས།   འདུལ་བརྒྱུད་ཀྱི་མཁན་སློབ་རྣམས་ལ་ཕྱག་འཚལ་ལོ། ། ༧ རབ་འབྱམས་ཕྱོགས་བཅུའི་རྒྱལ་བ་ཐམས་ཅད་ཀྱི། ཕྲིན་ལས་ཕུང་པོ་གཅིག་ཏུ་བསྡུས་པ་ཡི། རྣམ་དཀར་དགེ་ལ་འདོམས་པའི་འཕྲུལ་ངག་བོན། མཐའ་ཡས་འགྲོ་བའི་དཔྱིད་དུ་འབར་བར་ཤོག   ༧ ཤིན་ཏུ་རྒྱས་པའི་སྡེ་སྣོད་འཛིན་མའི་ཁྱོན། ལེགས་འཁྲུངས་འདུལ་བའི་སྤྱོད་པ་པདྨོའི་ཚལ། རབ་བཞད་གསེར་གྱི་འདབ་མ་གཡོ་བ་ཡི། དྲི་བསུང་ཕྱོགས་བཅུ་ཀུན་དུ་འཕྲོ་བར་ཤོག   ༧རྨད་བྱུང་ཡན་ལག་བརྒྱད་ལྡན་དགེ་བའི་དཔལ།…

མཉམ་མེད་ཤེས་རབ་རྒྱལ་མཚན་གྱི་སྙན་དངགས་སྒྲ་རྒྱན། མཁྱེན་གསོལ་རྣམ་དག་ཆུ་རྒྱུན་ལས་དྲངས།   བསྭོ་བསྐང་ངོ་ལྷ་སྲུང་ཐུགས་དམ་བསྐང༌། བསྐང་བའི་དམ་རྫས་སྣ་ཚོགས་འདི། ཚུལ་ཁྲིམས་ས་གཞི་ཝངས་སེ་ཝངས་སེ། ཏིང་འཛིན་རི་བོ་ཟངས་སེ་ཟངས། ཤེས་རབ་དཔག་བསམ་ལྡེམས་སེ་ལྡེམས། ཐོས་པའི་རྒྱ་མཚོ་མེ་རེ་རེ། བསམ་པའི་རྦ་རླབས་ཀྱི་ལི་ལི། སྒོམ་རྟོགས་ནོར་བུ་སྤུངས་སེ་སྤུངས། འཆད་པའི་འབྲུག་སྒྲ་ལྡི་རི་རི། རྩོམ་པའི་གཡུ་བུན་ཐུ་ལུ་ལུ། རྩོད་པའི་ཐོག་སྒྲ་ཆེམས་སེ་ཆེམས། བསྐྱེད་པའི་སྐར་ཚོགས་ཁྲ་ལ་ལ། རྫོགས་པའི་གཞའ་འོད་ལམ་སེ་ལམ། ཟུང་འཇུག་ཉི་ཟླ་ལྷགས་སེ་ལྷག བསྙེན་པའི་སྤྲིན་དཔུངས་འཐིབས་སེ་འཐིབས། བསྒྲུབ་པའི་ཆར་ཆེན་སིབས་སེ་སིབས། ལས་སྦྱོར་གློག་དམར་འཁྱུགས་སེ་འཁྱུག…

  འཕགས་པའི་སྐྱེ་བོ་དམ་པ་ཁུང་ཙི་སོགས་ཀྱི་སློབ་མའི་བསླབ་བྱ་སྟོད་ཆ། མཁན་པོ་བསོད་དར་རྒྱས་ཀྱིས་བསྒྱུར། སྤྱིའི་སྡོམ་ཚིག སློབ་མའི་བསླབ་བྱ་འདི། ། འཕགས་པའི་སྐྱེ་བོའི་གསུང་། ། སྲི་ཞུ་གུས་བཀུར་དང༌། ། བག་ཡོད་ཡིད་རྟོན་བྱ། ། ཀུན་ལ་བྱམས་པས་སྐྱོང༌། ། བཤེས་གཉེན་དམ་པ་བསྟེན། ། ད་དུང་སྒྲུབ་ནུས་ན། ། ཤེས་བྱ་གཞན་ཀྱང་སློབ། །སློབ་མའི་བསླབ་བྱ་ཞེས་པ་འདི་ནི་སྔོན་གྱི་འཕགས་པའི་སྐྱེ་བོ་དམ་པ་ཁུང་ཙི་…

  མདོ་སྔགས་ཀྱི་སྒོམ་དོན་བསྡུས་པ་བཞུགས་སོ། ། ཆོས་རྗེ་དྭགས་པོ་ལྷ་རྗེའི་གསུང་། ན་མོ་གུ་རུ། ངན་སོང་གསུམ་གྱི་སྡུག་བསྔལ་གྱིས་འཇིགས་ནས། སྐྱབས་སུ་སངས་རྒྱས་ཉག་གཅིག་ཡིན་པར་ཤེས་ཤིང་། སྲོག་གི་ཕྱིར་ཡང་སྐྱབས་འགྲོ་མི་གཏོང་བ་ནི། སྐྱེས་བུ་ཆུང་ངུའི་ཆོས་ཡིན་པས། དུས་རྟག་ཏུ་ངན་སོང་གསུམ་གྱི་སྡུག་བསྔལ་སོམས་ལ་སྐྱབས་འགྲོ་གྱིས། འཁོར་བ་མཐའ་དག་ལ་ཡིད་ཕྱུང་ནས། རང་ཐར་པ་མྱ་ངན་ལས་འདས་པ་ཐོབ་པར་འདོད་པས། མི་དགེ་བ་བཅུ་སྤོང་། དགེ་བ་བཅུ་སྒྲུབ་པ་ནི། སྐྱེས་བུ་འབྲིང་གི་ཆོས་ཡིན་པས། དུས་རྟག་ཏུ་འཁོར་བའི་སྡུག་བསྔལ་སོམས་ལ། མི་དགེ་བ་ཕྲ་མོ་ནས་སྤོངས། དགེ་བ་མཐའ་དག་དང་དུ་ལེན་པར་གྱིས། འཁོར་བའི་མ་རྣམས་ཀྱི་སྡུག་བསྔལ་མ་བཟོད་ནས་དེ་རྣམས་ཀྱི་དོན་དུ་བླ་ན་མེད་པའི་བྱང་ཆུབ་ཐོབ་པར་འདོད་པ་ནི། སྐྱེས་བུ་མཆོག་གི་ཆོས་ཡིན་པས།…

  འཇམ་དབྱངས་བསྟོད་སྤྲིན་རྒྱ་མཚོ། ༄༅། །རིང་ནས་གོམས་པའི་ཐུགས་རྗེའི་ཆབ་ཀྱིས་རང་བདེ་འདོད་པའི་ཡིད་ཀྱི་མེ་དཔུང་བཅིལ།།ཟབ་མོའི་རང་བཞིན་ཇི་བཞིན་གཟིགས་པས་ཀུན་ཏུ་རྟོག་པའི་སྤྲོས་པའི་དྲ་བ་བཅད། །ཉིད་ཀྱིས་གཟིགས་གང་འགྲོ་ལ་བསྐྲུན་ཕྱིར་གཞན་ཕན་ཁུར་ཆེན་སྐྱོ་མེད་ཐུགས་ཀྱིས་འཁྱེར། །ལྷག་པའི་ལྷ་དེར་ཡིད་གཏད་དང་བའི་རླུང་གིས་བསྐྱོད་པའི་བསྟོད་ཚིག་མེ་ཏོག་ལ། །ཉིན་བྱེད་འཆར་ཀའི་མདངས་ཀྱིས་རབ་འཁྱུད་པའི། །ལྷུན་སྡུག་གསེར་གྱི་རི་བོའི་ངོས་བཞིན་དུ། །དམར་སེར་འོད་ཀྱི་ཕུང་པོ་ལྷམ་མེ་བ། །འཇམ་དབྱངས་མཁྱེན་པའི་གཏེར་ཁྱོད་ཡུད་ཙམ་དགོངས། །མ་ལུས་ཞིང་དུ་འབད་པས་བཙལ་ན་ཡང་།།ཁྱོད་ལས་གཞན་པའི་སྐྱབས་བཟང་མ་མཆིས་པས། །བདག་ཡིད་ཁྱོད་ཀྱི་རྗེས་སུ་ཕྱོགས་པ་ནི། །ཉི་མས་གདུངས་པའི་གླང་ཆེན་པད་མཚོར་བཞིན། །དེ་ཕྱིར་ཁྱོད་ཀྱི་ཡོན་ཏན་བརྗོད་ལ་བདག །ཡིད་ལ་རེ་བ་སྐོང་པར་བྱེད་པ་ཡི། །གཏོང་བས་མཛེས་པའི་སྦྱིན་བདག་མཐོང་བ་ན། །འབྱོར་བས་དམན་པའི་སློང་མོ་བ་བཞིན་གྱུར། །ཁྱོད་སྐུ་རི་དབང་ཇི་བཞིན་མཐོ་ཞིང་དྲང་། །ནྱ་གྲོའི་ལྗོན་པ་ལྟར་རྒྱས་ཆུ་ཞེང་གབ། །བཙོ་མའི་གསེར་ལྟར་དག་ཅིང་གསལ་བ་ཡི།…

  འཕགས་པ་ཐུགས་རྗེ་ཆེན་པོའི་དམར་ཁྲིད་ཕྱག་རྫོགས་ཟུང་འཇུག་གི་ཉམས་ལེན་སྙིང་པོ་བསྡུས་པ་བཞུགས་སོ། ། རྣལ་འབྱོར་པ་རཱ་ག་ཨསྱས་ཀྱིས་མཛད་པ། ན་མོ་མ་ཧཱ་ཀཱ་རུ་ཎི་ཀཱ་ཡེ། མདོ་རྒྱུད་གཞུང་ལུགས་རྒྱ་ཆེ་གྲངས་མང་ཡང༌། །ཚེ་ཐུང་ཤེས་རབ་ཆུང་བས་མཐའ་ཆོད་དཀའ། །མང་དུ་ཤེས་ཀྱང་ཉམས་སུ་མ་བླང་ན། །རྒྱ་མཚོའི་འགྲམ་དུ་སྐོམ་གྲིར་ཤི་དང་འདྲ། །མཁས་པའི་མལ་དུ་ཐ་མལ་རོ་འབྱུང་སྲིད། །མདོ་རྒྱུད་ལུང་དང་རྒྱ་བོད་མཁས་གྲུབ་གསུང༌། །བྱིན་རླབས་ཆེ་ཡང་ཕལ་པས་གོ་བ་དཀའ། །གྲྭ་སར་བཤད་པ་བྱེད་ན་མཁོ་ལགས་ཀྱང༌། །རྩེ་གཅིག་ཉམས་སུ་ལེན་ལ་དགོས་པ་ཆུང༌། །དེ་བས་རྒན་མོ་འཛུབ་ཚུགས་སེམས་ལ་ཕན། །ཕྱག་རྫོགས་ལ་སོགས་ཟབ་ཆོས་དཔག་མེད་རྣམས། །སོ་སོའི་རང་གཞུང་མ་འཆུག་ངེས་པ་ཅན། །ཆོས་བརྒྱུད་སློབ་མར་སྤེལ་ན་མཁོ་ལགས་ཀྱང༌། །རང་དོན་ཕྱི་མའི་དོན་གཉེར་ཉམས་ལེན་ལ། །ཐམས་ཅད་གཅིག་ཏུ་དྲིལ་ནས་ཉམས་ལེན་ཟབ།…

  བརྒྱད་ཅུའི་དུས་སྟོན་གྱི་སྨོན་ཚིག འཁོར་ལོ་གསུམ་གྱི་རྒྱལ་ཐབས་ལ། ། ཅི་དགར་དབང་བའི་མཐོ་རིས་གྲོང་། ། རྟོགས་ལྡན་བཀྲ་ཤིས་འཁྱིལ་བའི་གླིང་། ། དམ་པའི་འོད་དཀར་འབྱུང་བའི་མཚོ། །   འགྲོ་ཀུན་གཉེན་དུ་གཟིགས་པ་ཡིས། ། རྩུབ་རེག་བྲལ་བ་འཇམ་པའི་དབྱངས། ། རིམ་དགུར་སྟོན་པའི་མཁྱེན་རབ་ཀྱི། ། རྒྱ་མཚོ་ཆེ་ལ་ཅིས་མི་དད། །  …